ເນື່ອງໃນໂອກາດ ວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ (20/1/1949-20/1/2024), ໃນວັນທີ 9 ມັງກອນ 2024, ສະຫາຍ ສອນໄຊ ສີພັນດອນ ກໍາມະການກົມການເມືອງສູນກາງພັກ ນາຍົກລັດຖະມົນຕີ ພ້ອມດ້ວຍຄະນະໄດ້ລົງຢ້ຽມຢາມ ແລະ ໂອ້ລົມ ນາຍ ແລະ ພົນທະຫານ ກອງພັນໃຫຍ່ 605, ໂດຍມີ ສະຫາຍ ພົນຕີ ວົງຄໍາ ພົມມະກອນ ກໍາມະການສູນກາງພັກ, ຮອງລັດຖະມົນຕີກະຊວງປ້ອງກັນປະເທດ, ພ້ອມດ້ວຍຄະນະພັກ-ຄະນະບັນຊາ ກອງພັນໃຫຍ່ 605, ນາຍ ແລະ ພົນທະຫານ ໃຫ້ການຕ້ອນຮັບ.
ສະຫາຍ ພັນເອກ ປະເສີດ ທ່ຽງທໍາ ຫົວໜ້າການທະຫານກອງພັນໃຫຍ່ 605 ໄດ້ລາຍງານໃຫ້ຮູ້ວ່າ: ກົມກອງມີພາລະບົດບາດ ສໍາຄັນໃນກນເປັນເສນາທິການໃຫ້ກະຊວງປ້ອງກັນປະເທດໃນການເຄື່ອນໄຫວຮັບປະກັນເຮັດໃຫ້ສະພາບມີຄວາມສະຫງົບ ພາຍໃຕ້ການຊີ້ນໍາ-ບັນຊາໂດຍກົງຮອບດ້ານ ຂອງຄະນະພັກກະຊວງປ້ອງກັນປະເທດ, ເປັນກຳລັງຫຼັກແຫຼ່ງ ໃນການຈັດຕັ້ງປະຕິບັດວຽກງານປ້ອງກັນຊາດ-ປ້ອງກັນຄວາມສະຫງົບຊ່ວຍໜູນກົມກອງເຫຼົ່າຮົບທະຫານຮາບ ພ້ອມນັ້ນຍັງໄດ້ຈັດຕັ້ງ ກຳລັງຫັນລົງກໍ່ສ້າງຮາກຖານການເມືອງ ຕາມຂອບເຂດກົມກອງຕັ້ງທັບ, ແບບທາງກວ້າງ ແລະ ທາງເລິກ, ປະສານສົມທົບກັບກົມກອງອ້ອມຂ້າງແລະ ອໍານາດການປົກຄອງທ້ອງຖິ່ນໃນການປົກປັກຮັກສາເຮັດໃຫ້ສະພາບມີຄວາມສະຫງົບໂດຍພື້ນຖານ, ເອົາໃຈໃສ່ປັບປຸງກໍ່ສ້າງກຳລັງ ໃຫ້ເຕີບໃຫຍ່ເຂັ້ມແຂງໃນທຸກດ້ານ, ສຸມໃສ່ອົບຮົມ-ຫັດແອບ ແລະ ປັບປຸງ ລະບຽບແບບແຜນ ວິທີເຮັດວຽກໃຫ້ມີຄວາມຮັດກຸມເປັນເອກະພາບ; ຊີ້ນໍາຄະນະພັກ-ຄະນະບັນຊາແຕ່ລະຂັ້ນ, ກົມກອງຮາກຖານສ້າງພະລາທິການກັບທີ່ ຕາມທິດເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ ໂດຍສຸມໃສ່ເພີ່ມພູນຜະລິດຜົນປູກຝັງ-ລ້ຽງສັດ ເພື່ອຮັບປະກັນການ ແກ້ໄຂຊີວິດການເປັນຢູ່ຂອງພະນັກງານ-ນັກຮົບ ນັບມື້ດີຂຶ້ນ,ຄຸ້ມຄອງພາຫະນະເຕັກນິກການທະຫານໃຫ້ມີຄຸນນະພາບແລະນໍາໃຊ້ໄດ້ຍາວນານ. ຄຽງຄູ່ກັນນັ້ນ, ກໍໄດ້ເອົາໃຈໃສ່ຈັດຕັ້ງປະຕິບັດຂົງເຂດວຽກງານຕ່າງໆ ທີ່ປິ່ນອ້ອມໜ້າທີ່ການເມືອງຂອງຕົນໂດຍສາມາດຍາດໄດ້ຜົນສໍາເລັດທີ່ເປັນພື້ນຖານຫຼາຍດ້ານ.
ໂອກາດນີ້, ສະຫາຍ ສອນໄຊ ສີພັນດອນ ໄດ້ມີຄໍາເຫັນໂອ້ລົມ ໂດຍໄດ້ຕີລາຄາສູງຕໍ່ໝາກຜົນຂອງການປະຕິວັດ ແລະ ມູນເຊື້ອອັນພິລະອາດຫານຂອງກອງທັບປະຊາຊົນລາວ ຕະຫຼອດໄລຍະ 75 ປີ ເວົ້າລວມ, ເວົ້າສະເພາະ ຜົນສຳເລັດ ທີ່ນາຍ ແລະ ພົນທະຫານ ກອງພັນໃຫຍ່ 605 ຍາດມາໄດ້, ພ້ອມທັງຍົກໃຫ້ເຫັນສະພາບການພົ້ນເດັ່ນທີ່ເກີດຂຶ້ນຢູ່ພາຍໃນ ແລະ ຕ່າງປະເທດ, ສະພາບການພັດທະນາເສດຖະກິດ-ສັງຄົມແຫ່ງຊາດ ໂດຍສະເພາະຄວາມພະຍາຍາມຂອງພັກ-ລັດຖະບານ ແລະ ພາກສ່ວນທີ່ກ່ຽວຂ້ອງມີຜົນສຳເລັດ, ຂໍ້ສະດວກ-ຫຍຸ້ງຍາກ ແລະ ສິ່ງທ້າທາຍ ຕໍ່ການປົກປັກຮັກສາ ແລະ ສ້າງສາພັດທະນາປະເທດເຮົາ ໃນປັດຈຸບັນ. ຕໍ່ສະພາບການດັ່ງກ່າວ, ສະຫາຍ ສອນໄຊ ສີພັນດອນ ໄດ້ເນັ້ນໜັກ ໃຫ້ຄະນະ ພັກ-ຄະນະບັນຊາ ຕະຫຼອດຮອດພະນັກງານ-ນັກຮົບ ທົ່ວກອງພັນໃຫຍ່ 605 ຕ້ອງຍົກສູງດ້ານຄຸນທາດການເມືອງໃຫ້ໜັກແໜ້ນເຂັ້ມແຂງໃນການປະຕິບັດແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານຂອງພັກຕິດພັນກັບການຈັດຕັ້ງສອງວາລະແຫ່ງຊາດຂອງພັກ ແລະ ລັດຖະບານ ວ່າດ້ວຍການແກ້ໄຂເສດຖະກິດ-ການເງີນ ແລະ ບັນຫາຢາເສບຕິດໃຫ້ຂາດຕົວ ໄປສົມຄູ່ກັບການຫັນເອົາກໍາລັງລົງກໍ່ສ້າງຮາກຖານການເມືອງພັດທະນາຊົນນະບົດຮອບດ້ານຕາມ 4 ເນື້ອໃນ 4 ຄາດໝາຍ, ສ້າງທ່າສະໜາມຕາໜ່າງປ້ອງກັນຊາດເຂັ້ມແຂງ, ກຸ່ມບ້ານປ້ອງກັນຄວາມສະຫົງບດີຕິດພັນກັບບ້ານພັດທະນາຕາມທິດ 3 ສ້າງຂອງພັກໃນການສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາຢ່າງແຂງແຮງ; ປັບປຸງແບບແຜນວິທີເຮັດວຽກໃຫ້ມີລັກສະນະປະຕິວັດບຸກ, ມີວິທະຍາສາດ, ແທດເໝາະກັບຕົວຈິງ ແລະ ໂປ່ງໃສ, ມີການແບ່ງວຽກ ແລະ ມອບໝາຍຄວາມຮັບຜິດຊອບຢ່າງຈະແຈ້ງ ແລະ ມີແບບແຜນນຳພາຢ່າງປະດິດສ້າງ, ກ້າຄິດ, ກ້າເຮັດ ແລະ ກ້າຮັບຜິດຊອບ ຕໍ່ຜົນໄດ້ຜົນເສຍໃນການຈັດຕັ້ງປະຕິບັດໜ້າທີ່ການເມືອງ ແລະ ວິຊາສະເພາະທີ່ນອນໃນຂອບເຂດຄວາມຮັບຜິດຊອບ ໂດຍຖືເອົາຜົນປະໂຫຍດລວມຂອງຊາດ, ຂອງປະຊາຊົນ ເປັນບ່ອນອີງຕັ້ງໜ້າປັບປຸງກໍ່ສ້າງກຳລັງໃນທຸກດ້ານ ໃຫ້ໜັກແໜ້ນເຂັ້ມແຂງ, ເອົາໃຈໃສ່ປັບປຸງລະບອບຄຸ້ມຄອງນໍາພາ-ບັນຊາ, ປັບປຸງກຳລັງປະເພດຕ່າງໆ ໂດຍຖືເອົາຄຸນນະພາບເປັນກົກ, ສໍາຄັນແມ່ນຍົກສູງວຽກງານອົບຮົມ-ຫັດແອບການເມືອງ, ການທະຫານ,ພະລາທິການ, ເຕັກນິກການທະຫານ ແລະ ວິຊາສະເພາະເຫຼົ່າຮົບເປັນປະຈໍາ; ພ້ອມນັ້ນກໍ່ສຸມທຸກເງື່ອນໄຂທ່າແຮງບົ່ມຊ້ອນຂອງຕົນ ໃນການສ້າງເສດຖະກິດ ແກ້ໄຂຊີວິດການເປັນຢູ່ຂອງພະນັກງານ-ນັກຮົບ ເພື່ອກ້າວໄປເຖິງການກຸ້ມຕົນເອງ ຢ່າງຮອບດ້ານ.
ເອົາໃຈໃສ່ວຽກງານຄຸ້ມຄອງພາຫະນະເຕັກນິກການທະຫານໃຫ້ມີຄຸນນະພາບກຽມພ້ອມສູ້ຮົບ ແລະ ສູ້ຮົບມີໄຊ; ປະກອບສ່ວນສໍາຄັນເຂົ້າໃນການສ້າງເສດຖະກິດ, ວັດທະນາທໍາ-ສັງຄົມ ຢູ່ທ້ອງຖິ່ນຮາກຖານໃຫ້ເຂັ້ມແຂງ ແລະ ຊ່ວຍເຫຼືອປະຊາຊົນ ໃນການປັບປຸງຊີວິດການເປັນຢູ່ທາງດ້ານວັດຖຸ ແລະ ຈິດໃຈໃຫ້ນັບມື້ນັບດີຂຶ້ນດັ່ງຄໍາເວົ້າທີ່ວ່າ: (ກອງທັບກັບປະຊາຊົນຄືປາກັບນໍ້າ). ຍາດແຍງເອົາການຮ່ວມມືຊ່ວຍເຫຼືອກັບກອງທັບປະເທດເພື່ອນມິດຍຸດທະສາດ ແລະ ການຮ່ວມມືກັບບັນດາປະເທດສັງຄົມນິຍົມອ້າຍນ້ອງ ເພື່ອປັບປຸງກໍ່ສ້າງກອງທັບ ເວົ້າລວມເວົ້າສະເພາະກໍຄືກົມກອງພວກສະຫາຍໃຫ້ມີແບບແຜນແລະທັນສະໃໝ, ພ້ອມນັ້ນກໍ່ຕ້ອງເສີມຂະຫຍາຍບົດບາດເປັນກໍາລັງຫຼັກແຫຼ່ງແກ່ນສານໃນການປະຕິບັດສອງໜ້າທີ່ຍຸດທະສາດຄື:ປົກປັກຮັກສາແລະສ້າງສາພັດທະນາປະເທດຊາດ. ກອງທັບເວລາໃດກໍ່ນໍາໜ້າທຸກຂົງເຂດວຽກງານ, ເດັດດ່ຽວໜຽວແໜ້ນຜ່ານຜ່າທຸກອຸປະສັກເຮັດສໍາເລັດທຸກໜ້າທີ່ສົມແລ້ວເປັນກໍາລັງແກ່ນສານຂອງການປະຕິວັດ ເປັນເຄື່ອງມືອັນແຫຼມຄົມຂອງພັກຢ່າງແທ້ຈິງ. ພ້ອມນັ້ນ, ຍັງໄດ້ມອບວັດຖຸປັດໃຈຈໍານວນໜຶ່ງໃຫ້ກອງພັນໃຫຍ່ 605 ຕື່ມອີກ.
