“ ເທເລກຣາຟ ” ລາຍງານຂ່າວວ່າ ຊາອູດິ ໂປຣລີກ ໄດ້ມີການປັບປ່ຽນໂຄຕານັກເຕະຕ່າງປະເທດຂອງແຕ່ລະສະໂມສອນອີກຄັ້ງ ໂດຍໃນລະດູການໜ້າ ອະນຸຍາດໃຫ້ແຕ່ລະທີມມີນັກເຕະຕ່າງປະເທດໄດ້ 10 ຄົນ ເພີ່ມຂຶ້ນຈາກລະດູການນີ້ທີ່ໃຫ້ມີໄດ້ 8 ຄົນ.
ຈາກການທີ່ທີມໃນລີກມະຫາເສດຖີໄດ້ທຸ່ມເງິນຊື້ນັກເຕະໃນລີກເອີຣົບມາເສີມທີມຢ່າງຄຶກຄັກໃນໄລຍະລະດູຮ້ອນທີ່ຜ່ານມາ ເຮັດໃຫ້ ຊາອຸດິ ໂປຣລີກ ກາຍເປັນລີກທີ່ໃຊ້ເງິນເສີມທີມສູງສຸດເປັນອັນດັບ 5 ຂອງໂລກ ເປັນຮອງພຽງ ພຣີເມຍລີກ ອັງກິດ, ລີກ 1 ຝຣັ່ງ, ບຸນເດສລີກາ ເຢຍລະມັນ ແລະ ກັນໂຊ່ ເຊເຣຍ A ອີຕາລີ ເທົ່ານັ້ນ ລວມທັງເໜືອກວ່າລາລີກາ ແອັດສະປາຍ.
ອັລ ອາລີ ເປັນທີມທີ່ເສີມທີມດ້ວຍນັກເຕະຕ່າງປະເທດຄົບ 8 ຄົນ ໃນລະດູການນີ້ ໂດຍໄດ້ທັງ ຣິຢາດ ມາເຣຊ, ໂຣແບໂຕ ຟີມິໂນ, ອັລລອງ ແຊງ-ແມັກຊີແມງ, ຟຣອງ ເຄສຊີເຢ່, ເອດູອາ ເມນດີ, ໂຣເຈີ ອິບາເນຊ, ກາບຣຽວ ເວກາ, ເມຣີ ເດມິຣາວ.
