ແຫລ່ງຂ່າວຈາກ ແຂວງຫົວພັນ ໃຫ້ຮູ້ວ່າ: ແຂວງຫົວພັນ ປະກາດເປັນແຂວງຢຸດຕິການຖ່າຍຊະຊາຍຢ່າງເປັນທາງການ ໃນວັນທີ 22 ທັນວາ 2023 ທີ່ສະໜາມກິລາແຂວງ ເພື່ອແນໃສ່ເຮັດໃຫ້ປະຊາຊົນບັນດາເຜົ່າພາຍໃນແຂວງຫົວພັນ ໄດ້ມີການຫັນປ່ຽນການດໍາລົງຊີວິດແບບທຳມະຊາດຄອງເດີມ ໄປສູ່ການດຳລົງຊີວິດທີ່ຖືກຫລັກອະນາໄມ 3 ສະອາດ ເພື່ອຮັບປະກັນໃຫ້ສຸຂະພາບຂອງປະຊາຊົນບັນດາເຜົ່າມີສຸຂະພາບດີຂຶ້ນ, ເພື່ອປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງແຂວງໃຫ້ນັບມື້ກ້າວສູ່ຄວາມຈະເລີນ. ເຂົ້າຮ່ວມພີທິຄັ້ງນີ້ໂດຍທ່ານ ດຣ ບຸນແຝງ ພູມມະໄລສິດ ລັດຖະມົນຕີກະຊວງ ສາທາລະນະສຸກ ແລະ ທ່ານ ຄຳແພງ ໄຊສົມແພງ ເຈົ້າແຂວງໆຫົວພັນ, ມີບັນດາການນຳຈາກ 17 ແຂວງທົ່ວປະເທດ ພ້ອມດ້ວຍມວນຊົນເທສະບານເມືອງຊຳເໜືອເຂົ້າຮ່ວມ.
![](https://medialaos.net/wp-content/uploads/2023/12/411367593_793938816093760_1504269006097318027_n.jpg)
ທ່ານ ດຣ ວິລະພອນ ພົມວົງສີ ຫົວໜ້າພະແນກສາທາລະນະສຸກ ແຂວງຫົວພັນ ໄດ້ລາຍງານການຈັດຕັ້ງປະຕິບັດ ການສ້າງແຂວງຫົວພັນເປັນແຂວງຢຸດຕິການຖ່າຍຊະຊາຍ ປະຈຳປີ 2023 ເຊິ່ງໄດ້ຍົກໃຫ້ເຫັນສະພາບລວມ, ຂັ້ນຕອນ ແລະ ຜົນສຳເລັດຂອງການຈັດຕັ້ງປະຕິບັດ ວຽກງານສົ່ງເສີມການຊົມໃຊ້ວິດຖ່າຍໂດຍເລີ່ມຈາກບ້ານ ແລະ ເມືອງ. ທົ່ວແຂວງມີ 54.369 ຄົວເຮືອນ ໃນນີ້, ຄົວເຮືອນທີ່ມີວິດຖ່າຍເປັນຂອງຕົນເອງ 52.669 ຄົວເຮືອນ ເທົ່າກັບ 96.8%, ຄົວເຮືອນທີ່ຍັງໃຊ້ວິດຖ່າຍຮ່ວມນໍາພີ່ນ້ອງມີທັງໝົດ 636 ຄົວເຮືອນ ເທົ່າກັບ 1,16%, ໂຮງຮຽນປະຖົມ, ມັດທະຍົມຕົ້ນ ແລະ ມັດທະຍົມປາຍ ຈຳນວນ 644 ແຫ່ງມີວິດຖ່າຍຊົມໃຊ້ 100% ພ້ອມນີ້ 10 ເມືອງທົ່ວແຂວງກໍໄດ້ຮັບຮອງເປັນເມືອງຢຸດຕິການຖ່າຍຊະຊາຍສຳເລັດ ຜ່ານການປະເມີນຜົນຕົວຈິງເຫັນວ່າຄົບຖ້ວນຕາມມາດຖານ ແລະ ເງື່ອນໄຂ ເພື່ອຮັບຮອງເປັນແຂວງຢຸດຕິການຖ່າຍຊະຊາຍ.
ຄຽງຄູ່ກັນນີ້ກໍຍັງມີຂໍ້ຄົງຄ້າງທີ່ຈະໄດ້ສືບຕໍ່ປັບປຸງແກ້ໄຂໃນຕໍ່ໜ້າເປັນຕົ້ນ ຄະນະກຳມະການຮັບຜິດຊອບຂັ້ນບ້ານ ເຖິງວ່າໄດ້ຮັບການຝຶກອົບຮົມ ແລະ ແຕ່ງຕັ້ງແລ້ວກໍຕາມ ແຕ່ຍັງມີບາງບ້ານບໍ່ທັນໄດ້ເຄື່ອນໄຫວຕາມສິດ, ໜ້າທີ່ ແລະ ພາລະບົດບາດຂອງຕົນຢ່າງເຕັມເມັດເຕັມໜ່ວຍ ເຮັດໃຫ້ການຊີ້ນໍາຊ່ວຍເຫລືອປະຊາຊົນຍັງບໍ່ທັນໄດ້ດີ, ຄວາມເປັນເຈົ້າການຂອງອໍານາດການປົກຄອງ ແລະ ປະຊາຊົນບັນດາເຜົ່າຈໍານວນໜຶ່ງໃນການສ້າງຂະບວນການອະນາໄມສາມສະອາດ, ການຮັກສາສິ່ງແວດລ້ອມ ແລະ ຄວາມຕື່ນຕົວເປັນເຈົ້າການໃນ ຮັກສາສຸຂະພາບ ໃນຊຸມຊົນຕົນເອງຍັງເຮັດບໍ່ທັນໄດ້ດີ ແລະ ຊິວິດການເປັນຢູ່ແບບທໍາມະຊາດບໍ່ທັນຖືກຫລັກສຸຂະອະນາໄມ.
ສຳລັບທິດທາງແຜນການໃນຕໍ່ໜ້າຈະສືບຕໍ່ລົງໂຄສະນາວຽກງານສຸຂະສຶກສາໃຫ້ແກ່ປະຊາຊົນບັນດາເຜົ່າຮັບຮູ້ ແລະ ເຂົ້າໃຈຢ່າງທົ່ວເຖິງ ໂດຍຖືເອົາການປ້ອງກັນພະຍາດ ແລະ ສົ່ງເສີມສຸຂະພາບເປັນຕົ້ນຕໍ, ການປິ່ນປົວເປັນສຳຄັນ ແລະ ຍຸດທະສາດຕາມ 8 ແຜນງານຂອງກະຊວງ ສາທາລະນະສຸກ ວາງອອກຢ່າງເປັນຮູບປະທຳ, ສືບຕໍ່ປັບປຸງຕາໜ່າງສາທາລະນະສຸກແຕ່ລະຂັ້ນ ໃຫ້ມີຄວາມເຂັ້ມແຂງ ເພື່ອຮັບປະກັນການບໍລິການສຸຂະພາບໃຫ້ປະຊາຊົນຕາມນະໂຍບາຍ 5 ດີ 1 ພໍໃຈຂອງກະຊວງສາທາລະນະສຸກວາງອອກ ເພື່ອຮັກສານາມມະຍົດແຂວງຫົວພັນເປັນແຂວງຢຸດຕິການຖ່າຍຊະຊາຍ ໃຫ້ມີຄວາມຍືນຍົງຕະຫລອດໄປ.
ໂອກາດນີ້ກໍໄດ້ຜ່ານຂໍ້ຕົກລົງ ຂອງລັດຖະມົນຕີກະຊວງສາທາລະນະສຸກ ສະບັບເລກທີ 4032 ລົງວັນທີ 11 ທັນວາ 2023 ວ່າດ້ວຍການຢັ້ງຢືນ ແລະ ຮັບຮອງເອົາແຂວງຫົວພັນ ເປັນແຂວງ ຢຸດຕິການຖ່າຍຊະຊາຍ ແຂວງທີ 4 ຂອງ ສປປ ລາວ ເປັນກຽດມອບໃບຢັ້ງຢືນໂດຍທ່ານ ດຣ ບຸນແສງ ພູມມະໄລສິດ ແລະ ຕາງໜ້າຮັບໂດຍ ທ່ານ ຄຳແພງ ໄຊສົມແພງ. ພ້ອມນີ້ຍັງໄດ້ມອບໃບຍ້ອງຍໍ ໃຫ້ກົມກອງ, ບຸກຄົນທີ່ມີຜົນງານດີເດັ່ນຕາມລຳດັບ.
ຂ່າວ: ໄມຄຳ, ພາບ:ສີອຳພອນ