Thursday, April 25, 2024
Homeຂ່າວພາຍໃນແຂວງໄຊຍະບູລີ ຈະຈັດງານມະຫະກຳບຸນຊ້າງ ໄປພ້ອມກັບການເປີດປີທ່ອງທ່ຽວລາວ 2024 ຢ່າງຍິ່ງໃຫຍ່.

ແຂວງໄຊຍະບູລີ ຈະຈັດງານມະຫະກຳບຸນຊ້າງ ໄປພ້ອມກັບການເປີດປີທ່ອງທ່ຽວລາວ 2024 ຢ່າງຍິ່ງໃຫຍ່.

ທ່ານ ເພັດພິໄຊ ສູນວິໄລ ຮອງເຈົ້າແຂວງໄຊຍະບູລີ ປະທານຈັດງານມະຫະກໍາບຸນຊ້າງປະຈໍາປີ 2024 ໄດ້ຖະແຫຼງຂ່າວຕໍ່ສື່ມວນຊົນ ແຂວງໄຊຍະບູລີ ໃນວັນທີ 13ທັນວາ 2023 ນີ້ວ່າ:ແຂວງໄຊຍະບູລີ ເປັນແຂວງໜຶ່ງທີ່ຕັ້ງຢູ່ພາກເໜືອຂອງ ສປປ ລາວ, ມີເສັ້ນທາງຄົມມະນາຄົມທີ່ເຊື່ອມຕໍ່ກັບບັນດາແຂວງຕ່າງໆ ແລະ ປະເທດໃກ້ຄຽງ, ຢູ່ໃນອານຸພາກພື້ນທີ່ສໍາຄັນ; ມີປ່າສະຫງວນແຫ່ງຊາດທີ່ອຸດົມສົມບູນໄປດ້ວຍຊີວະນາໆພັນ ແລະ ເປັນແຂວງດຽວທີ່ມີປະຊາກອນຊ້າງຫລາຍກວ່າໝູ່ ຖ້າທຽບໃສ່ແຂວງອື່ນໆໃນ ສປປ ລາວ. ດ້ວຍເຫດນັ້ນ ເພື່ອເປັນການອະນຸລັກ, ຮັກສາຊ້າງບໍ່ໃຫ້ສູນພັນແລະທັງເປັນການສືບຕໍ່ປົກປັກຮັກສາວັດທະນະທຳ, ຮີດຄອງປະເພນີອັນດີງາມ ແລະ ວິຖີການດຳລົງຊີວິດຂອງປະຊາຊົນລາວບັນດາເຜົ່າ ທີ່ຕິດພັນກັບຊ້າງມາແຕ່ອາດີດຕະການ ໃຫ້ຢືນຍົງຄົງຕົວ ແລະ ຢູ່ກັບປະຊາຊົນລາວບັນດາເຜົ່າ, ໂດຍສະເພາະປະຊາຊົນຊາວແຂວງໄຊຍະບູລີ ທັງເປັນການໂຄສະນາດຶງດູດນັກທ່ອງທ່ຽວພາຍໃນແລະຕ່າງປະເທດ ໃຫ້ເຂົ້າມາທ່ອງທ່ຽວ ສປປ ລາວ ກໍ່ຄືແຂວງໄຊຍະບູລີ ໃຫ້ຫຼາຍຂຶ້ນ, ຈຶ່ງໄດ້ຈັດງານມະຫະກຳບຸນຊ້າງ ແລະ ໄປພ້ອມກັບການເປີດປີທ່ອງທ່ຽວລາວ 2024 ຂອງແຂວງໄຊຍະບູລີ ຂຶ້ນຢ່າງເປັນທາງການ.ເຊິ່ງການຈັດງານມະຫະກໍາບຸນຊ້າງໃນປີນີ້ຈະມີກິດຈະກຳທີ່ຕິດພັນກັບປີທ່ອງທ່ຽວລາວ 2024 ຢູ່ແຂວງໄຊຍະບູລີ ທັງໝົດ 12 ກິດຈະກໍາ ຄື:ກິດຈະກໍາລະດັບຊາດ ແມ່ນກໍານົດເອົາງານມະຫາກໍາບຸນຊ້າງ ປະຈໍາປີ 2024 ແລະ ເປັນພິທີເປີດປີທ່ອງທ່ຽວລາວ 2024 ຂອງແຂວງ.ກິດຈະກໍາລະດັບແຂວງ ແມ່ນກໍານົດເອົາເທດສະການບຸນກອງເຂົ້າໃຫຍ່ ເມືອງພຽງໃນວັນທີ 9-12 ມັງກອນ 2024,ເປີດແຫຼ່ງທ່ອງທ່ຽວສູນອານຸລັກຊ້າງພູແຄນ ໃນເດືອນກຸມພາ 2024,ກິດຈະກຳລະດັບເມືອງມີ 10 ກິດຈະກໍາ. ສຳລັບການຈັດງານມະຫະກໍາບຸນຊ້າງແຂວງໄຊຍະບູລີ ໃນປີ 2024 ນີ້ ຖືວ່າເປັນຄັ້ງທີ 17 ພວກເຮົາຈະໄດ້ຈັດເປັນງານໃຫຍ່ ເຊິ່ງຈະປະກອບມີກິດຈະກຳຕ່າງໆ ດັ່ງນີ້:ກິດຈະກໍາຫຼັກ ມີຄື:ວັນທີ 12 ກຸມພາ 2024 ເປີດງານຕະຫລາດນັດວາງສະແດງສິນຄ້າທັງພາຍໃນ ແລະ ຕ່າງປະເທດ, ໃນຕອນຄໍ່າຂອງວັນທີ 12-13 ກຸມພາ 2024 ຈະມີການສະແດງສິນລະປະວັນນະຄະດີ ມີ 12 ຄະນະ, 36 ລາຍການ (ຄືນລະ 18 ລາຍການ) ແລະ ຈັດການສະແດງຄອນເສີດຂອງວົງດົນຕີ-ນັກຮ້ອງທີ່ມີຊື່ສຽງ ທີ່ພວກເຮົາຈະໄດ້ເຊີນມາຈາກນະຄອນຫຼວງວຽງຈັນ, ວັນທີ 14-15 ກຸມພາ 2024 ຊ້ອມໃຫຍ່ຂະບວນແຫ່ກ້ອນສະແດງຕ່າງໆ ໃນພິທີເປີດງານ, ໃນຕອນຄໍ່າຂອງວັນທີ 14 ກຸມພາ 2024 ຈະມີການແຂ່ງຂັນປະກວດນັກຮ້ອງສຽງດີ ແລະ ດົນຕີພື້ນເມືອງ, ໃນຕອນຄໍ່າຂອງວັນທີ 15 ກຸມພາ 2024 ປະກວດນາງສາວງາມທິດາບຸນຊ້າງ, ວັນທີ 16 ກຸມພາ 2024 ພິທີຕັກບາດອຸທິດສ່ວນກູສົນໃຫ້ຊ້າງ ແລະ ກວດກາຄວາມພ້ອມຮອບດ້ານ, ພ້ອມກັນນັ້ນ ໃນຕອນຄໍ່າຂອງວັນທີ 16 ກຸມພາ 2024 ພວກເຮົາກໍ່ໄດ້ຈັດການແຂ່ງຂັນຕີກອງຫາງ, ວັນທີ 17 ກຸມພາ 2024 ເປີດງານມະຫະກໍາບຸນຊ້າງ ແລະ ເປີດປີທ່ອງທ່ຽວລາວ 2024 ຢູ່ແຂວງໄຊຍະບູລີ ຢ່າງເປັນທາງການ ແລະ ຊົມການສະແດງໂດດຈ້ອງ, ວັນທີ 18 ກຸມພາ 2024 ສືບຕໍ່ກິດຈະກໍາທີ່ຕິດພັນກັບຊ້າງ ແລະ ການອະນຸລັກຊ້າງ ໂດຍສະເພາະການສະແດງຂອງຊ້າງຄຳຮູ້, ການໃຫ້ອາຫານຊ້າງ, ການບໍລິການຂີ່ຊ້າງ, ການສະແດງສິລະປະວັນນະຄະດີ ແລະ ໃນຕອນຄໍ່າຂອງວັນທີ 18 ກຸມພາ 2024 ພວກເຮົາຈະໄດ້ຊົມກອງສະແດງກາຍຍະສິນ ຈາກກອງກາຍຍະສິນແຫ່ງຊາດ.ສໍາລັບກິດຈະກຳປິ່ນອ້ອມ ມີຄື:ກິດຈະກໍາທາງດ້ານກິລາວັນທີ 12 ກຸມພາ 2024 ກິດຈະກໍາຍ່າງເພື່ອການກຸສົນ ຈາກເດີ່ນກິລາຮົມຂອງແຂວງ ຫາ ເດີ່ນສະໜາມຫຼວງ ຫາ ສະຖານທີ່ຈັດງານຕະຫຼາດນັດ (ໃນມື້ເປີດງານຕະຫລາດນັດ), ວັນທີ 14 ກຸມພາ 2024 ກິດຈະກໍາແຂ່ງຂັນຟຸດຊໍ.ກິດຈະກໍາດ້ານການທ່ອງທ່ຽວ ມີຄື: ກາບໄຫວ້ບູຊາວັດສີບຸນເຮືອງ (ບ້ານໃຫຍ່), ຫໍຫຼັກເມືອງ ແລະ ວັດພູທອກ, ທ່ຽວຊົມສູນອະນຸລັກຊ້າງລາວ (ອ່າງນ້ຳຕຽນ), ສູນອະນຸລັກ ແລະ ຂະຫຍາຍພັນຊ້າງອາຊີ (ຢູ່ພູແຄນ) ແລະ ມູນນິທິອະນຸລັກສັດ ແລະ ສິ່ງແວດລ້ອມລາວ (ບ້ານນາຕໍໃຫຍ່), ຢ້ຽມຊົມຫໍສະໝຸດຊ້າງ ແລະ ກິດຈະກຳອານຸລັກຊ້າງຢູ່ສູນອານຸລັກຊ້າງນໍ້າຕຽນ, ນອກຈາກນີ້ຍັງມີກິດຈະກໍາແຂ່ງຂັນແຕ້ມຮູບ ແລະ ພັດກ໋ອບເພື່ອສ້າງທັກສະ ແລະ ສ້າງຈິດສໍານຶກກ່ຽວກັບຊ້າງ ໃຫ້ເຍົາວະຊົນ, ຊາວໜຸ່ມ ຢູ່ທີ່ສະໜາມຊ້າງນ້ອຍກ໋ອບ.ພ້ອມກັນນີ້ ໄດ້ມີຄວາມພ້ອມບໍລິການເຕັ້ນນອນຢູ່ແຄມນໍ້າຮຸ່ງສໍາລັບນັກທ່ອງທ່ຽວ, ຂີ່ເຮືອຊົມວິວນ້ຳຂອງ (ບ້ານທ່າເດື່ອ).ຄຽງຄູ່ກັນນັ້ນ ແຂວງໄຊຍະບູລີຂອງພວກເຮົາ ກໍ່ໄດ້ຈັດຝຶກອົບຮົມດ້ານການບໍລິການຮ້ານອາຫານ, ບ່ອນພັກເຊົາ ແລະ ສະຖານທີ່ບໍລິການຕ່າງໆ ໃຫ້ມີຄວາມສະອາດປອດໄພ, ໄດ້ຄວບຄຸມລາຄາສິນຄ້າທີ່ສົມເຫດສົມຜົນ ເພື່ອຕອບສະໜອງໃຫ້ແກ່ແຂກ ແລະ ນັກທ່ອງທ່ຽວທີ່ໄດ້ມາທ່ຽວມາຊົມງານມະຫາກໍາບຸນຊ້າງຂອງພວກເຮົາໃນຄັ້ງນີ້ ໃຫ້ມີຄວາມປະທັບໃຈ.ບັນດາທ່ານຈະໄດ້ຮັບຂໍ້ມູນຂ່າວສານຂອງງານດັ່ງກ່າວຜ່ານທາງເພຈບຸກ, ເພຈລາວສະຕາ, ເພຈໂທລະໂຄ່ງ, ເພຈຂ່າວສົດ, ເພຈປະເທດລາວ, ເພຈ Media Laos ແລະ ເພຈNews.XBL.

ໃນໂອກາດທີ່ມີຄວາມໝາຍສໍາຄັນນີ້ ຕາງໜ້າອົງການປົກຄອງແຂວງໄຊຍະບູລີ ແລະ ໃນນາມປະທານຄະນະຮັບຜິດຊອບຈັດງານມະຫະກຳບຸນຊ້າງ ແລະ ການເປີດປີທ່ອງທ່ຽວລາວ 2024 ຂອງແຂວງໄຊຍະບູລີ, ຂ້າພະເຈົ້າ ຖືໂອກາດນີ້ ຂໍເຊີນຊວນບັນດາທ່ານແຂກທີ່ມີກຽດ ທ່ານຍິງ, ທ່ານຊາຍ, ນັກທ່ອງທ່ຽວຈາກພາຍໃນ ແລະ ຕ່າງປະເທດ ເຂົ້າມາທ່ຽວມາຊົມງານມະຫະກຳບຸນຊ້າງຢູ່ແຂວງໄຊຍະບູລີຂອງພວກເຮົາ ຕາມກຳນົດເວລາດັ່ງກ່າວ.

…………………………

ຂ່າວ: ມະໄລວັນ

RELATED ARTICLES

LEAVE A REPLY

Please enter your comment!
Please enter your name here

- Advertisment -
Google search engine

Most Popular

Recent Comments