ພິທີສະເຫຼີມສະຫຼອງວັນລະນຶກເຖິງການຕ້ານການໃຊ້ຄວາມຮຸນແຮງຕໍ່ແມ່ຍິງ 25 ພະຈິກ ພາຍໃຕ້ຫົວຂໍ້ “16 ມື ຮ່ວມກັນ ລົງທຶນເພື່ອປ້ອງກັນ ແລະ ແກ້ໄຂການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງ” ຈັດຂຶ້ນວັນທີ 8 ທັນວາ 2023 ທີ່ບ້ານປາກຊາບໃໝ່ ເມືອງໄຊທານີ ນະຄອນຫຼວງວຽງຈັນ ມີ ທ່ານນາງ ອິນທະນາ ບຸບຜາສະ ຫວັນ ຜູ້ອຳນວຍການສະມາຄົມເພື່ອພັດທະນາແມ່ຍິງ ແລະ ການສຶກສາກົດ ໝາຍ ທ່ານ ໄມເຄີນ ຄອນນີ ຜູ້ຕ່າງໜ້າຈາກອົງການພັດທະນາສາກົນປະເທດສະຫະລັດອະເມລີກາ USAID ຜູ້ຕ່າງໜ້າຈາກຫ້ອງການສານ ໄອຍະການ ແລະ ຍຸຕິທຳເມືອງໄຊທານີ ທີ່ ຄູອາຈານ ແລະ ນັກສຶກສາຈາກຄະນະກະເສດສາດ ມະຫາວິທະຍາໄລແຫ່ງ ຊາດ ແລະ ຂະແໜງການກ່ຽວຂ້ອງເຂົ້າຮ່ວມ.
ທ່ານ ນາງ ອິນທະນາ ບຸບຜາສະຫວັນ ກ່າວວ່າ ປີນີ້ອົງການສະຫະປະຊາຊາດໄດ້ເໜັ້ນໜັກເຖິງການມີສ່ວນຮ່ວມຂອງທຸກຄົນ ແລະ ທຸກພາກສ່ວນໃນການລົງທຶນໃສ່ວຽກ ງານການຕ້ານການໃຊ້ຄວາມຮຸນແຮງຕໍ່ແມ່ຍິງ ໂດຍສະເພາະຕ້ອງໄດ້ລົງທຶນເພື່ອປ້ອງກັນ ແລະ ແກ້ໄຂການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງ ເຊິ່ງສະມາຄົມເພື່ອພັດທະນາແມ່ຍິງ ແລະ ການສຶກສາກົດໝາຍໄດ້ຖືເອົາເປັນວຽກງານຫຼັກໃນການຈັດຕັ້ງງານນີ້ຂຶ້ນມາໃນທຸກໆປີ ພ້ອມກັນນັ້ນສະມາຄົມເພື່ອພັດທະນາແມ່ຍິງ ແລະ ການສຶກສາກົດໝາຍ ໄດ້ສົ່ງເສີມຄວາມສະເໝີພາບຍິງຊາຍ ສິດທິແມ່ຍິງ ແລະ ໂຄສະນາເຜີຍແຜ່ກົດໝາຍເພື່ອເຮັດໃຫ້ອົງການປົກຄອງບ້ານ ໜ່ວຍໄກ່ເກ່ຍ ແລະ ອາສາສະໝັກກົດໝາຍປະຈຳບ້ານໄດ້ມີຄວາມເຂົ້າ ໃຈ ນຳ ເອົາວຽກງານດັ່າງກ່າວໄປຈັດຕັ້ງປະຕິບັດເຂົ້າໃນວຽກງານຂອງຕົນ ພ້ອມກັນນີ້ສະມາຄົມຍັງໄດ້ສ້າງຈິດສຳນຶກຄວາມສະເໝີພາບຍິງຊາຍ ແລະ ສິດທິແມ່ຍິງພ້ອມທັງສ້າງຄວາມສາມາດໃຫ້ປະຊາ ຊົນໃຫ້ເຂົ້າເຖິງລະບົບກົດໝາຍໂດຍການບໍລິການຂອງສູນໜອງສອງຫ້ອງທີ່ໃຫ້ຄຳປຶກສາດ້ານກົດໝາຍໂດຍບໍ່ເສຍຄ່າ.
ເຖິງແມ່ນວ່າສະມາຄົມເພື່ອພັດທະນາແມ່ຍິງ ແລະ ການສຶກສາກົດໝາຍໄດ້ມີຄວາມພະຍາຍາມເຮັດກິດ ຈະກຳຕ່າງໆໃນການສົ່ງເສີມສິດສະເໝີພາບຍິງຊາຍ ແລະ ສິດທິແມ່ຍິງຫຼາຍປານໃດກໍຕາມແຕ່ປະຊາຊົນໃນ 35 ບ້ານເປົ້າໝາຍຂອງເມືອງໄຊທານີ ຍັງບໍ່ທັນມີການປ່ຽນແປງພຶດຕິກຳທີ່ມີການຈຳແນກຕໍ່ແມ່ຍິງໄດ້ເທື່ອ ເນື່ອງຈາກວ່າຍັງມີບາງຮີດຄອງປະເພນີທີ່ຫຼ້າຫຼັງຍັງຝັງແໜ້ນຢູ່ໃນແນວຄິດຂອງປະຊາຊົນ ເຊິ່ງເປັນສາຍເຫດທີ່ຍັງມີການໃຊ້ຄວາມຮຸນແຮງຕໍ່ແມ່ຍິງແຜຫຼາຍຢູ່ໃນຊຸມຊົນບ້ານເປົ້າ ໝາຍຂອງໂຄງການ ໂດຍເຫັນໄດ້ຈາກສູນໃຫ້ຄຳປືກສາດ້ານກົດໝາຍບ້ານໜອງສອງຫ້ອງໄດ້ຊ່ວຍເຫຼືອຜູ້ຖືກໃຊ້ຄວາມຮຸນແຮງ ເກືອບ 200 ເລື່ອງໃນ 15 ບ້ານເປົ້າ ໝາຍພາຍໃນໄລຍະ 9 ປີຜ່ານມາ ໂດຍສະເພາະແມ່ນຂໍ້ຂັດແຍ່ງສາຍຜົວພັນທາງຜົວເມຍ ການຢູ່ນຳກັນກ່ອນການແຕ່ງງານ ການຂໍຄ່າລ້ຽງດູລູກ ການຂົ່ມຂືນແມ່ຍິງ ແລະ ເດັກນ້ອຍ.
