ການຍົກລະດັບ ແລະ ປັບປຸງລະບົບການຂ້າສັດ ແລະ ປຸງແຕ່ງຜະລິດຕະພັນສັດ ແລະ ສັດນໍ້າໃຫ້ມີຄຸນນະພາບ ແລະ ປອດໄພຕໍ່ຜູ້ບໍລິໂພກ ແມ່ນເງື່ອນໄຂຈໍາເປັນທີ່ຕ້ອງໄດ້ເຮັດ ເພື່ອຍົກສູງຄຸນນະພາບຜະລິດຕະພັນສັດ ແລະ ສັດນໍ້າ ຊຶ່ງຈະສາມາດເພີ່ມມູນຄ່າສັດ ແລະ ສັດນໍ້າ ໃຫ້ສູງຂຶ້ນ.
ເພື່ອຈະເຮັດໄດ້ແນວນັ້ນ, ຈໍາຕ້ອງມີການຍົກລະດັບ ການຂ້າສັດ, ການປຸງແຕ່ງ ແລະ ການວາງຂາຍ ຜະລິດຕະພັນສັດ-ສັດນໍ້າ ໃຫ້ສະອາດ ແລະ ປອດໄພ ທັງຕ້ອງໄດ້ເພີ່ມທະວີການໂຄສະນາປູກຈິດສໍານຶກກ່ຽວກັບຄວາມປອດໄພຂອງຜະລິດຕະພັນສັດ-ສັດນໍ້າ ຂັ້ນຕົ້ນ ແລະ ປຸກລະດົມໃຫ້ຜູ້ປະກອບການ ປະກອບສ່ວນຍົກລະດັບ ຄຸນນະພາບຜະລິດຕະພັນສັດ-ສັດນໍ້າ ໃຫ້ສູງຂຶ້ນ ແນໃສ່ແກ້ໄຂບັນຫາໂຮງຂ້າສັດ ຍັງປະຖົມປະຖານ ແລະ ບໍ່ໄດ້ມາດຕະຖານສຸຂານາໄມ ຂອງພາກພື້ນ ແລະ ສາກົນ; ຄຸນນະພາບ ຂອງ ຊີ້ນ ແລະ ຜະລິດຕະພັນສັດ-ສັດນໍ້າ ຍັງຕໍ່າ ຜູ້ບໍລິໂພກມີຄວາມສ່ຽງສູງທີ່ຈະໄດ້ຮັບເຊື້ອພະຍາດ ແລະ ສານປົນເປື້ອນຈາກຜະລິດຕະພັນ; ຜູ້ລ້ຽງ, ຜູ້ຄ້າ, ຜູ້ຂ້າ, ຜູ້ຂົນສົ່ງ ແລະ ຜູ້ວາງຂາຍ ຍັງບໍ່ທັນເອົາໃຈໃສ່ໃນການຮັກສາຄຸນນະພາບ ຂອງຜະລິດຕະພັນ; ການລົງທຶນໃນການພັດທະນາພື້ນຖານໂຄງລ່າງດ້ານການຂ້າສັດ, ຂົນສົ່ງ, ປຸງແຕ່ງ, ການເກັບຮັກສາ ແລະ ການວາງຂາຍ ຜະລິດຕະພັນສັດ-ສັດນໍ້າ ຍັງບໍ່ສູງ.
ດັ່ງນັ້ນ, ລັດຖະບານ ຈຶ່ງໄດ້ມີນະໂຍບາຍສົ່ງເສີມດ້ານຄຸນນະພາບຂອງຜະລິດຕະພັນສັດ ແລະ ສັດນໍ້າ ຊຶ່ງລະບຸແຈ້ງເປັນນະໂຍບາຍ ຂໍ້ທີ 4 ໃນຈໍານວນນະໂຍບາຍແຫ່ງຊາດ 8 ຂໍ້ ທີ່ເປັນການສົ່ງເສີມການລ້ຽງສັດ ແລະ ສັດນໍ້າ. ໃນການສົ່ງເສີມດ້ານຄຸນນະພາບຂອງຜະລິດຕະພັນສັດ ແລະ ສັດນໍ້າ ລັດຈະໄດ້ຂົນຂວາຍແຫຼ່ງທຶນກູ້ ເພື່ອສ້າງຕັ້ງ ໂຮງຂ້າສັດ ແລະ ໂຮງປຸງແຕ່ງຊີ້ນທີ່ທັນສະໄໝ, ຖືກສຸຂານາໄມ ຕາມມາດຕະຖານສາກົນ ແລ້ວມອບໂອນໃຫ້ພາກເອກະຊົນ ສໍາປະທານດໍາເນີນການ ແລ້ວໃຊ້ໜີ້ທົດແທນໃຫ້ລັດ; ພ້ອມກັນນີ້, ລັດສະໜັບສະໜູນ ແລະ ອໍານວຍຄວາມສະດວກໃຫ້ແກ່ຜູ້ລົງທຶນ ສ້າງ ແລະ ດໍາເນີນທຸລະກິດການຂ້າສັດ ແລະ ປຸງແຕ່ງຜະລິດຕະພັນສັດ ດ້ວຍການໃຫ້ນະໂຍບາຍຍົກເວັ້ນພາສີ, ອາກອນມູນຄ່າເພີ່ມ ໃນການນໍາເຂົ້າວັດຖຸອຸປະກອນທີ່ກ່ຽວຂ້ອງກັບການສ້າງພື້ນຖານໂຄງລ່າງຂອງການຂ້າສັດ ແລະ ປຸງແຕ່ງຜະລິດຕະພັນສັດ ແລະ ສັດນໍ້າ; ສົ່ງເສີມການສ້າງສາງເກັບຮັກສາ, ລົດຂົນສົ່ງ ແລະ ບ່ອນວາງຂາຍທີ່ໄດ້ມາດຕະຖານ; ຍົກລະດັບລະບົບການກວດກາອະນາໄມຊີ້ນໃນໂຮງຂ້າສັດ, ການວິໄຈ ແລະ ການເຮັດກາໝາຍສິນຄ້າ ສະອາດປອດໄພ ທີ່ສອດຄ່ອງກັບມາດຕະຖານຂອງສາກົນ.
ສັງລວມແລ້ວ, ນັ້ນກໍແມ່ນເພື່ອປັບປຸງ ຍົກລະດັບຄຸນນະພາບ ໃນການນໍາໃຊ້ມາດຕະການນັບແຕ່ເລີ່ມຕົ້ນຂະບວນການຄັດ, ການລ້ຽງຈົນປ້ອນເຂົ້າໂຮງງານຕ່າງໆ ໂດຍສຸຂານາໄມສູງຂຶ້ນ ຄຸນນະພາບຜະລິດຕະພັນສັດ ແລະ ສັດນໍ້າສູງຂຶ້ນ ກໍຈະໄດ້ລາຄາທີ່ສູງຂຶ້ນ; ທັງນີ້, ຈະເປັນໂອກາດໃຫ້ແກ່ການຕື່ນຕົວຍົກລະດັບຄຸນນະພາບສິນຄ້າຂອງ ສປປ ລາວ ໃຫ້ສູງຂຶ້ນ ແລະ ໃຫ້ສາມາດເຂົ້າເຖິງຕະຫຼາດໄດ້ຫຼາຍຂຶ້ນ. ເມື່ອສັງເກດໃນສັງຄົມຕົວຈິງ, ເຮົາຈະເຫັນວ່າການຂະຫຍາຍຕົວທາງດ້ານເສດຖະກິດຂອງລາວ ແລະ ປະ ເທດໃກ້ຄຽງ ໂດຍສະເພາະ ສສ ຫວຽດນາມ ແລະ ສປ ຈີນ ແມ່ນມີຄວາມຕ້ອງການທີ່ເພີ່ມຂຶ້ນ ຊຶ່ງຄາດວ່າ ລາຄາສັດ ແລະ ຜະລິດຕະພັນສັດ ກໍຈະເພີ່ມຂຶ້ນເຊັ່ນກັນ.
ໂດຍ: ສ.ບຸດປະຊາ
