ວັນທີ 12 ພະຈິກ 2023 ທ່ານ ສົມສະຫວາດ ເລັ່ງສະຫວັດ ອະດີດກໍາມະການກົມການເມືອງສູນກາງພັກ, ອະດີດຮອງນາຍົກລັດຖະມົນຕີ ແຫ່ງ ສປປລາວ ພ້ອມດ້ວຍ ທ່ານ ຮອງລັດຖະມົນຕີກະຊວງພາຍໃນ ແລະ ຄະນະຕິດຕາມ ໄດ້ເຄື່ອນໄຫວຢ້ຽມຢາມ ແລະ ເຮັດວຽກຮ່ວມກັບ ບໍລິສັດ ຊີໂນ-ອາກຣີ ໂປຕາສ ຈໍາກັດ ທີ່ບ້ານ ດົງໃຕ້ ເມືອງທ່າແຂກ, ໂດຍມີ ທ່ານ ວັນໄຊ ພອງສະຫວັນ ເຈົ້າແຂວງຄໍາມ່ວນ ແລະ ບັນດາພະແນກການທີ່ກ່ຽວຂ້ອງຂັ້ນແຂວງ, ເມືອງເຂົ້າຮ່ວມຕິດຕາມ.
ໂດຍໄດ້ຮັບການຕ້ອນຮັບຢ່າງອົບອຸ່ນຈາກ ທ່ານ ຢົງຈິນ ຮອງຜູ້ອໍານວຍການ ບໍລິສັດ ຊີໂນ-ອາກຣີ ໂປຕາສ ຈໍາກັດ, ພ້ອມທັງ ລາຍງານຫຍໍ້ກ່ຽວກັບສະພາບໂດຍລວມຂອງບໍລິສັດ ແລະ ຄວາມຄືບໜ້າໃນການດໍາເດີນທຸລະກິດ ໂດຍສະເພາະແຜນການຜະລິດ ເຊິ່ງພາຍໃຕ້ການສະໜັບສະໜູນຈາກການນໍາພາຂອງລັດຖະບານຂັ້ນສູນກາງ ແລະ ຂອງແຂວງ ເຮັດໃຫ້ການກໍ່ສ້າງຂະຫຍາຍກໍາລັງການຜະລິດຂອງບໍລິສັດປະຕິບັດໄດ້ສະດວກ ແລະ ປະສົບຜົນສໍາເລັດເປັນຢ່າງດີ ກໍ່ຄືການກໍ່ສ້າງ 1 ລ້ານໂຕ່ນ/ປີ, 2 ລ້ານໂຕ່ນ/ປີ, ປະຈຸບັນໃກ້ສໍາເລັດການກໍ່ສ້າງກໍາລັງການຜະລິດຝຸ່ນໂປຕາສບັນລຸ 3 ລ້ານໂຕນ/ປີ, ພ້ອມນັ້ນ ໃນການພັດທະນານິຄົມອຸດສາຫະກຳ ໂປຕາສ ແມ່ນໄດ້ສໍາເລັດການຈັດປະຊາສໍາພັນການລົງທຶນຄັ້ງທໍາອິດຢູ່ ສປ ຈີນ ໃນເດືອນ ກໍລະກົດ ຜ່ານມາ ແລະ ໄດ້ສໍາເລັດການເຊັນບົດບັນທຶກໃນການລົງທຶນຮ່ວມມືກັນປະມານ 10 ໂຄງການ, ມູນຄ່າທັງໝົດ 835 ລ້ານໂດລາສະຫະລັດ, ດ້ານການກໍ່ສ້າງຕົວເມືອງອັດສະລິຍະອາຊີໂປຕາສ ປະຈຸບັນເລີ່ມກໍ່ສ້າງຫໍພັກຄົນງານ ແລະ ໄດ້ສໍາເລັດການກໍ່ສ້າງບ້ານວິນລາ, ຫໍພັກພະນັກງານ, ຕຶກອາຄານຮ້ານຊັບພະສິນຄ້າ ແລະ ສິ່ງອື່ນໆ ເພື່ອສະໜອງຄວາມສະດວກສະບາຍໃຫ້ແກ່ພະນັກງານທີ່ເຮັດວຽກໃນເຂດດັ່ງກ່າວ. ນອກນີ້ຍັງໄດ້ເອົາໃຈໃສ່ຊ່ວຍເຫລືອໃນການແກ້ໄຂຄວາມທຸກຍາກຂອງປະຊາຊົນໃນຂອບເຂດໂຄງການ ໂດຍສະເພາະການຈັດຕັ້ງປະຕິບັດໂຄງການແກ້ໄຂຄວາມທຸກຍາກປະຊາຊົນ ຢູ່ບ້ານຊຽງແຫວນ ເມືອງທ່າແຂກ.
![](https://medialaos.net/wp-content/uploads/2023/11/401725466_654399536883249_4451181888054163319_n-1024x591.jpg)
ທ່ານ ສົມສະຫວາດ ເລັ່ງສະຫວັດ ຍັງໄດ້ມີຄໍາເຫັນ ແລະ ຕິລາຄາສູງຕໍ່ຜົນງານການເຄື່ອນໄຫວ ດໍາເນີນທຸລະກິດຂອງບໍລິສັດໃນໄລຍະຜ່ານມາ ແລະ ສະແດງຄວາມຂອບໃຈຕໍ່ການຕ້ອນຮັບ, ພ້ອມນີ້ ຍັງໄດ້ສະແດງຄວາມຊົມເຊີນມາຍັງບໍລິສັດທີ່ຊ່ວຍພັດທະນາບ້ານທຸກຍາກ, ແກ້ໄຂຫລາຍບັນຫາໃນຊຸມຊົນ, ລວມເຖິງກິດຈະກໍາຕ່າງໆ ເພື່ອສ້າງລາຍຮັບທີ່ໝັ້ນຄົງໃຫ້ແກ່ປະຊາຊົນໃນເຂດໂຄງການ ແລະ ເຂດອື່ນໆ. ໂອກາດດຽວກັນທ່ານອາດີດຮອງນາຍົກລັດຖະມົນຕີຍັງໄດ້ມີຄໍາສະເໜີແລກປ່ຽນ ຕາມການສະເໜີໃນເມືອກ່ອນໃຫ້ທາງບໍລິສັດຊ່ວຍສ້າງຜະລິດຕະພັນຝຸ່ນປຸຍ ເພື່ອນໍາໃຊ້ເຂົ້າໃນການຜະລິດກະສິກໍາ ຢູ່ ສປປ ລາວ ພວກເຮົາ ມາຮອດປະຈຸບັນທາງບໍລິສັດໄດ້ມີແຜນຄືແນວໃດ, ດ້ານການເຮັດໂຮງງານໄຟຟ້າຄວາມຮ້ອນດ້ວຍຖ່ານຫີນ, ດ້ານການຊຸກຍູ້ສົ່ງເສີມແຮງງານລາວການພັດທະນາບຸກຄະລາກອນໃຫ້ສົມທົບກັບມະຫາວິທະຍາໄລແຫ່ງຊາດ ຫລື ໂຮງຮຽນວິຊາຊີບໃດໜຶ່ງ ເພື່ອມີແຜນໄປພັດທະນາບຸກຄະລາກອນຕາມຄວາມຕ້ອງການຂອງບໍລີສັດ ໂດຍເພີ່ມແຮງງານທີ່ເປັນຄົນລາວໃຫ້ນັບມື້ຫລາຍຂຶ້ນເລື້ອຍໆ, ກ່ຽວກັບການຄຸ້ມຄອງພົນລະເມືອງລາວໃນການປະຕິບັດພັນທະ ແລະ ສິດຂອງພົນລະເມືອງລາວ ເຂດໂຄງການທາງບໍລິສັດໄດ້ມີວິທີຈັດຕັ້ງປະຕິບັດຄືແນວໃດ ແລະ ສະເໜີໃຫ້ບໍລິສັດເບິ່ງຄືນໃນການພັດທະນາ ກໍ່ສ້າງເສັ້ນທາງເຂົ້າສູ່ເຂດຕົວເມືອງອັດສະລິຍະໃຫ້ສົມກັບວ່າເປັນເຂດຕົວເມືອງອັດສະລິຍະ. ໂອກາດດຽວກັນຍັງໄດ້ສະເໜີໃຫ້ກະຊວງພາຍໃນ ສໍາຫລວດເກັບກໍາຂໍ້ມູນບັນດາບໍລິສັດຂອງຕ່າງປະເທດທີ່ມາລົງທຶນຢູ່ ສປປ ລາວ ວ່າມີບໍລິສັດໃດທີ່ໃຫ້ການຊ່ວຍເຫລືອຄື ບໍລິສັດ ຊີໂນ-ອາກຣີ ໃນການແກ້ໄຂຄວາມທຸກຍາກ ປະຊາຊົນ ບ້ານ ຊຽງ ແຫວນ.