ຕາມຂ່າວຈາກ ວິທະຍຸ ສາກົນ ສປ ຈີນ, ອົງການ ພະລັງງານ ແຫ່ງຊາດຈີນ ແຈ້ງວ່າ: ແຕ່ເດືອນມັງກອນ ຫາເດືອນ ສິງຫາປີນີ້, ກຳລັງ ຕິດຕັ້ງ ໄຟຟ້າ ແສງ ຕາເວັນ ໃນທົ່ວປະເທດຈີນ ເພີ່ມໃໝ່ ຫລາຍກວ່າ 100 ລ້ານກິໂລວັດ, ກວມປະມານ 57% ຂອງຍອດ ກຳລັງ ຕິດຕັ້ງ ໄຟຟ້າ ທີ່ເພີ່ມໃໝ່ ທັງໝົດ. ນັບມາຮອດ ທ້າຍເດືອນ ສິງຫາປີນີ້, ຍອດກຳລັງ ຕິດຕັ້ງໄຟຟ້າ ແສງຕາເວັນ ຂອງຈີນ ມີທັງໝົດ ປະມານ 510 ລ້ານກິໂລວັດ, ເພີ່ມຂຶ້ນ 44,4% ເມື່ອທຽບໃສ່ ໄລຍະດຽວກັນ ຂອງປີຜ່ານມາ 510 ລ້ານ ກິໂລວັດ ເທົ່າກັບ ຍອດກຳລັງ ຕິດຕັ້ງ ໄຟຟ້າ ຂອງເຂື່ອນຊານເຊຍ 23 ແຫ່ງ. ນັບມາຮອດ ທ້າຍເດືອນ ສິງຫາປີນີ້, ຍອດກຳລັງ ຕິດຕັ້ງ ໄຟຟ້າ ໃນທົ່ວປະເທດຈີນ ມີທັງໝົດ ປະມານ 2,76 ຕື້ກິໂລວັດ, ເພີ່ມຂຶ້ນ 11,9% ເມື່ອທຽບໃສ່ ໄລຍະດຽວກັນ ຂອງປີຜ່ານມາ. ແຕ່ເດືອນມັງກອນ ຫາເດືອນສິງຫາປີນີ້, ໂຄງ ການແຫລ່ງໄຟຟ້າ ຂອງ ວິສາຫະກິດ ຜະລິດໄຟຟ້າ ຕົ້ນຕໍ ໃນທົ່ວປະເທດຈີນ ໄດ້ສຳເລັດການລົງທຶນ 470,3 ຕື້ຢວນ, ເພີ່ມຂຶ້ນ 46,6% ເມື່ອທຽບໃສ່ ໄລຍະດຽວກັນ ຂອງປີ ຜ່ານມາ. ໂຄງການ ເຄືອຂ່າຍໄຟຟ້າ ໄດ້ສຳເລັດ ການລົງທຶນ 270,5 ຕື້ຢວນ, ເພີ່ມຂຶ້ນ 1,4% ເມື່ອທຽບໃສ່ ໄລຍະດຽວກັນ ຂອງປີກາຍ.
(ບັນນາທິການຂ່າວ: ຕ່າງປະເທດ)
ຮຽບຮຽງ ຂ່າວໂດຍ: ສະໄຫວ ລາດປາກດີ
