ຄະນະສື່ມວນຊົນຈາກສູນກາງ ລົງເຄື່ອນໄຫວຕິດຕາມ ແລະ ລາຍງານຜົນການຈັດຕັັ້ງປະຕິບັດວຽກງານໂພຊະນາການຂອງແມ່-ເດັກ ການລ້ຽງດູເດັກອ່ອນ ແລະ ເດັກນ້ອຍ ຢູ່ແຂວງຫຼວງພະບາງ ເພື່ອສົ່ງເສີມວຽກງານດັ່ງກ່າວການ ໂຄສະນາຜ່ານສື່ ໃຫ້ສອດຄ່ອງຕາມບັ້ນການໂຄສະນາເຜີຍແຜ່ບັ້ນສົ່ງເສີມໂພຊະນາການຂອງແມ່ ເດັກອ່ອນ ແລະ ເດັກ.ການລົງເຄື່ອນໄຫວຄັ້ງນີ້ມີຂຶ້ນລະຫວ່າງວັນທີ 25-29 ກັນຍາ 2023 ນໍາພາໂດຍ ທ່ານ ວັນນະສິນ ສິມມະວົງ ຮອງຫົວໜ້າກົມສື່ມວນຊົນ ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ແລະ ໄດ້ຮັບການສະໜັບສະໜູນຈາກ EU ຜ່ານອົງການ Unicef.
ທ່ານ ວັນນະສິນ ສິມມະວົງ ກ່າວວ່າ: ຈຸດປະສົງຂອງການເຄື່ອນໄຫວໃນຄັ້ງນີ້ ເປັນການຕິດຕາມ, ຕີລາຄາການຈັດຕັ້ງປະຕິບັດວຽກງານໂພຊະນາການແມ່-ເດັກ ຢູ່ແຂວງຫຼວງພະບາງ ໃນໄລຍະຜ່ານມາໃຫ້ເຫັນໄດ້ຂໍ້ສະດວກ ແລະ ຂໍ້ຫຍຸ້ງຍາກ ແລະ ທິດທາງແຜນການ ເພື່ອນໍາໄປເຜີຍແຜ່ຜ່ານສ່ອງທາງສື່ຕ່າງໆ ທັງນີ້ກໍເພື່ອສອດຄ່ອງກັບບັ້ນການໂຄສະນາເຜີຍແຜ່ບັ້ນສົ່ງເສີມໂພຊະນາການຂອງແມ່-ເດັກ ແລະ ການລ້ຽງດູເດັກອ່ອນ ແລະ ເດັກນ້ອຍ ທີ່ລັດຖະບານ ຮ່ວມກັບອົງການ EU-Unicef ຈັດຕັ້ງປະຕິບັດໃຫ້ບັນລຸຜົນສໍາເລັດຕາມລະດັບຄາດໝາຍ.
ບັ້ນການສົ່ງເສີມວຽກງານດັ່ງກ່າວເເມ່ນໄດ້ສຸມໃສ່ການເຜີຍແຜ່ຂໍ້ມູນຂ່າວສານ ກ່ຽວກັບພຶດຕິກໍາການໃຫ້ອາຫານຕໍ່ເດັກ ຜ່ານສື່ຫຼາກຫຼາຍຮູບແບບເຊັ່ນ: ວິທະຍຸ ໂທລະພາບ ແລະ ຮູບພາບ, ຄຽງຄູ່ກັບສື່ດິຈິຕອລ ແລະ ສື່ສັງຄົມອອນລາຍ ເພື່ອເຂົ້າເຖິງກຸ່ມເປົ້າໝາຍຕ່າງໆ ທັງນີ້ກໍເພື່ອເຮັດໃຫ້ວຽກງານໂຄສະນາສົ່ງເສີມໂພຊະນາການແມ່-ເດັກ ແລະ ການລ້ຽງດູເດັກອ່ອນ ແລະ ເດັກນ້ອຍ ໄດ້ຖືກຈັດຕັ້ງປະຕິບັດຢ່າງມີປະສິດທິຜົນ ແລະ ບັນລຸຕາມຄາດໝາຍທີ່ວາງໄວ້.
ທ່ານ ດຣ ຫຸມພັນ ຈີລະສັກ ຮອງຫົວໜ້າພະແນກສາທາລະນະສູກແຂວງຫຼວງພະບາງ ໃຫ້ສໍາພາດຕໍ່ສື່ມວນຊົນໃນໂອກາດທີ່ຄະນະນັກຂ່າວຈາກສູນກາງເຄື່ອນໄຫວເກັບກໍາຂ່າວໃນບັ້ນໂຄສະນາການລ້ຽງດູເດັກອ່ອນດ້ວຍນົມແມ່ ເພື່ອໂພຊະນາການທີ່ດີຜ່ານສື່ມວນຊົນວ່າ: ສະພາບໂພຊະນາການຢູ່ແຂວງຫຼວງພະບາງ ປັດຈຸບັນຖືວ່ານັບມື້ນັບດີຂຶ້ນຫຼາຍ ຖ້າທຽບໃສ່ຊຸມປີທີ່ຜ່ານມາ ໂດຍສະເພາະທຽບໃສ່ 11 ຕົວຊີ້ບອກ ຂອງລັດຖະບານວາງອອກແມ່ນສາມາດບັນລຸໄດ້ທັງໝົດໃນປີ 2022 ແລະ ໃນປີ 2023 ນີ້ກໍມີຄວາມອາດສາມາດຈະບັນລຸໄດ້ເຊັ່ນດຽວກັນ.
ໃນປີ 2022, ອີງຕາມຂໍ້ມູນຈາກ………. ອັດຕາເດັກລຸ່ມ 5 ປີ ທີ່ມີນ້ຳໜັກຫຼຸດມາດຕະຖານຢູ່ທີ່ 7,7%, ເດັກທີ່ມີລວງສູງບໍ່ໄດ້ມາດຕະຖານແມ່ນ 10,5%, ອັດຕາການຕາຍຂອງເດັກລຸ່ມ 1 ປີຕາຍແມ່ນ 11,5\1,000 ຂອງເດັກເກີດມີຊີວິດ , ອັດຕາການຕາຍຂອງເດັກລຸ່ມ 5 ປີແມ່ນ 13,2\1,000ຂອງເດັກເກີດມີຊີວິດ, ອັດຕາການຕາຍຂອງແມ່ແມ່ນ 72,8\100,000 ຂອງເດັກເກີດມີຊີວິດ. ອັດຕາການເກີດລູກຢູ່ສະຖານທີ່ບໍລິການ ແລະ ເກີດຢູ່ບ້ານທີ່ມີແພດຊ່ວຍ ກວມໄດ້ 89%, ອັດຕາການສັກວັກຊິນກັນພະຍາດ ແພັນຕາ 3 ກວມໄດ້ 100%. ນອກຈາກນີ້, ວຽກງານນໍ້າສະອາດ ແລະ ສຸຂະອະນາໄມ ກໍສາມາດບັນລຸຕາມຄາດໝາຍເຊັ່ນດຽວກັນ.
ທ່ານ ນາງ ບຸນຕາ ສຸລິຍະມາດ ຮອງປະທານສະະພັນແມ່ຍິງແຂວງຫຼວງພະບາງ ກ່າວວ່າ: ນັບຕັ້ງແຕ່ສູນກາງສະຫະພັນແມ່ຍິງລາວ ໄດ້ບັນຈຸວຽກງານໂພຊະນາການເຂົ້າໃນປື້ມຄູ່ມືການສ້າງຄອບຄົວ ແລະ ບ້ານແມ່ຍິງ 3 ດີ ເຊັ່ນ: ການລ້ຽງລູກດ້ວຍນົມແມ່, ການຝາກທ້ອງ 4 ຄັ້ງ, ການເກີດລູກຢູ່ສຸກສາລາ ເພື່ອເປັນຂໍ້ມູນໃນການປະເມີນຜົນວຽກງານແມ່ຍິງ ນອກນັ້ນຍັງໄດ້ເອົາໃຈໃສ່ໃນການໂຄສະນາຕິດພັນກັບວຽກງານແມ່ຍິງ 3 ດີ ໂດຍສະເພາະບ້ານໃນກຸ່ມເປົ້າໝາຍ.
ສໍາລັບວຽກງານໂພຊະນາການອົງການຢູນີເຊັບ ເເລະ ສະຫະພາບເອີຣົບ ໄດ້ເຮັດວຽກຮ່ວມກັນເປັນເວລາຫຼາຍປີ ເພື່ອໃຫ້ການສະໜັບສະໜູນເເກ່ລັດຖະບານເເຫ່ງ ສປປ ລາວ ໃນການປັບປຸງໂພຊະນາການຂອງເດັກນ້ອຍ ເເລະ ເເມ່ຍິງລາວ. ໜື່ງໂຄງການຮ່ວມມືລະຫວ່າງ ອົງການຢູນີເຊັບ, ລັດຖະບານເເຫ່ງ ສປປ ລາວ ເເລະ ສະຫະພາບເອີຣົບ ທີ່ເປັນເອກະລັກນັ້ນເເມ່ນ ບັ້ນການໂຄສະນາເພື່ອສົ່ງເສີມໂພຊະນາການຂອງແມ່-ເດັກ ແລະ ການລ້ຽງດູເດັກອ່ອນ ແລະ ເດັກນ້ອຍ (MIYCN) ເຊິ່ງເປັນບັ້ນທີ່ມີຈຸດປະສົງເພື່ອສົ່ງເສີມພຶດຕິກໍາທີ່ດີໃນການໃຫ້ອາຫານຕໍ່ເດັກຂອງບັນດາແມ່ ແລະ ຄອບຄົວ, ປູກຝັງຄວາມເຂົ້າໃຈກ່ຽວກັບພຶດຕິກໍາ ທີ່ກ່ຽວຂ້ອງກັບໂພຊະນາການທີ່ດີໃຫ້ຫຼາຍຂຶ້ນ ແລະ ປັບປຸງໂພຊະນາການໂດຍລວມຂອງເດັກໃນ 1000 ວັນທໍາອິດຂອງຊີວິດພວກເຂົາ ຊື່ງຈະຊ່ວຍໃຫ້ເດັກມີໂພຊະນາການທີ່ດີໄດ້ຕ້ອງປະຕິບັດ 3ດີ ກໍຄື: ໃຫ້ອາຫານທີ່ມີໂພຊະນາການດີ, ການເບິ່ງແຍງເອົາໃຈໃສ່ທີ່ດີ ແລະ ການໃຫ້ບໍລິການທີ່ດີ.
