ຫຼວງພະບາງ ເອົາໃຈໃສ່ການຈັດຕັ້ງປະຕິບັດວຽກງານໂພຊະນາການ

ພະແນກສາທາລະນະສຸກແຂວງຫຼວງພະບາງ ສົມທົບກັບຂະແໜງການທີ່ກ່ຽວຂ້ອງເອົາໃຈໃສ່ໃນການຈັດຕັ້ງປະຕິບັດກິດຈະກໍາສົ່ງເສີມໂພຊະນາການ ຄາດວ່າທ້າຍປີນີ້ຈະສາມາດບັນລຸຕາມ 11 ໂຕຊີ້ບອກຂອງຂອງລັດຖະບານວາງອອກ.

ທ່ານ ດຣ ຫຸມພັນ ຈີລະສັກ ຮອງຫົວໜ້າພະແນກສາທາລະນະສູກແຂວງຫຼວງພະບາງ ໃຫ້ສໍາພາດໃນວັນທີ 26 ກັນຍາ 2023 ໃນໂອກາດ ທີ່ຂະນະນັກຂ່າວຈາກສູນກາງເຄື່ອນໄຫວເກັບກໍາຂ່າວໃນບັ້ນຂະບວນການສົ່ງເສີມໂພຊະນາການຂອງແມ່ຍິງ-ເດັກນ້ອຍ ແລະ ການລ້ຽງດູເດັກອ່ອນ ແລະ ເດັກນ້ອຍ ຜ່ານສື່ມວນຊົນວ່າ: ສະພາບໂພຊະນາການຢູ່ແຂວງຫຼວງພະບາງ ປະຈຸບັນຖືວ່ານັບມື້ນັບດີຂຶ້ນຫຼາຍຖ້າທຽບໃສ່ຊຸມປີທີ່ຜ່ານມາ ໂດຍສະເພາະທຽບໃສ່ 11 ຕົວຊີ້ບອກຂອງລັດຖະບານວາງອອກແມ່ນສາມາດບັນລຸໄດ້ທັງໝົດໃນປີ 2022 ແລະ ໃນປີ 2023 ນີ້ກໍມີຄວາມອາດສາມາດຈະບັນລຸໄດ້ເຊັ່ນດຽວກັນ.

ໃນປີ 2022 ​ອີງໃສ່ຂໍ້ມູນສະຖິຕິຈາກພະແນກສາທາລະນະສຸກ ແຂວງຫຼວງພະບາງ ສະແດງໃຫ້ເຫັນອັດຕາເດັກລຸ່ມ 5 ປີ ທີ່ມີນໍ້າໜັກຫຼຸດມາດຕະຖານ ຢູ່ທີ່ 7,7%, ເດັກທີ່ມີລວງສູງບໍ່ໄດ້ມາດຕະຖານແມ່ນ 10,5%, ອັດຕາການຕາຍຂອງເດັກລຸ່ມ 1 ປີ ແມ່ນ 11,5/1,000 ຂອງເດັກເກີດມີຊີວິດ, ອັດຕາການຕາຍຂອງເດັກລຸ່ມ 5 ປີຕາຍແມ່ນ 13,2/1000ຂອງເດັກເກີດມີຊີວິດ, ອັດຕາການຕາຍຂອງແມ່ແມ່ນ 72,8/100,000 ຂອງເດັກເກີດມີຊີວິດ. ອັດຕາການເກີດລູກຢູ່ສະຖານທີ່ບໍລິການ ແລະ ເກີດຢູ່ບ້ານທີ່ມີແພດຊ່ວຍກວມໄດ້ 89%, ອັດຕາການສັກຢາວັກຊິນກັນພະຍາດ ແພັນຕາ 3 ໄດ້ 100%. ນອກຈາກນີ້, ວຽກງານນໍ້າສະອາດ ແລະ ສຸຂະອະນາໄມ ກໍສາມາດບັນລຸຕາມຄາດໝາຍເຊັ່ນດຽວກັນ. ບັນດາຜົນສໍາເລັດດັ່ງກ່າວທີ່ຍາດມາໄດ້ນັ້ນພວກເຮົາມີທ່າແຮງດັ່ງຕໍ່ໄປນີ້: ທາງດ້ານພື້ນຖານຕາໜ່າງສາທາລະນະສຸກແມ່ນທົ່ວເຖິງ ມີໂຮງໝໍແຂວງ 1 ແຫ່ງ ໂຮງໝໍເມືອງ 12 ແຫ່ງ ແລະ ສຸກສາລາ 83 ແຫ່ງ ບວກກັບເຮົາມີອາສາສະໝັກສາທາລະນະສຸກທີ່ໄດ້ຜ່ານການຝຶກອົບຮົມ ແລະ ຍັງເຄື່ອນໄຫວຢູ່ຈຳນວນ 386  ຄົນ ແພດບ້ານ 14 ຄົນ.

ນອກນັ້ນ ຄະນະກຳມະການເພື່ອສຸຂະພາບແມ່ ແລະ ເດັກແຕ່ລະຂັ້ນໄດ້ໃຫ້ການສະໜັບສະໜູນ ແລະໃຫ້ຄວາມສໍາຄັນຕໍ່ວຽກງານສາທາລະນະສຸກຫລາຍຂຶ້ນ ໂດຍສະເພາະພາຍຫຼັງທີ່ພົບວິກິດການລະບາດຂອງພະຍາດໂຄວິດ-19 ເປັນຕົ້ນມາ ການສະໜອງງົບປະມານ ສຳລັບລົງເຄື່ອນທີ່ເຊື່ອມສານວຽກງານແມ່ ແລະ ເດັກ ສັກຢາກັນພະຍາດ ແລະ ໂພຊະນາການມີບໍ່ໄດ້ຂາດ, ພະນັກງານຢູ່ຂັ້ນພື້ນຖານໄດ້ມີຄວາມຫ້າວຫັນ ແລະ ໄດ້ຮັບການຍົກລະດັບຄວາມສາມາດຢ່າງເປັນປົກກະຕິໄດ້ຮັບການສະໜັບສະໜູນຈາກອົງການຈັດຕັ້ງສາກົນ ໃນການເຄື່ອນໄຫວພ້ອມມີວິຊາການປະຈຳເຮັດວຽກຮ່ວມນໍາການປະສານງານທາງດ້ານວິຊາການສາຍຕັ້ງລະຫວ່າງສູນກາງແຂວງ ແລະ ທ້ອງຖິ່ນກໍ່ນັບມື້ນັບດີຂຶ້ນ ພ້ອມນັ້ນກໍຍັງມີໂຮງໝໍເພື່ອນລາວທີ່ມີຄວາມສາມາດສູງໃນການປິ່ນປົວເດັກ ໂດຍສະເພາະເດັກຂາດສານອາຫານຮຸນແຮງ ແລະ ມີລະບົບການສົ່ງຕໍ່ໃນການປິ່ນປົວຈາກທ້ອງຖິ່ນຫາແຂວງ ແລະ ການສົ່ງກັບຈາກແຂວງກັບຄືນທ້ອງຖິ່ນເພື່ອຕິດຕາມ ແລະ ສືບຕໍ່ປິ່ນປົວໃຫ້ຫາຍຂາດ.

ການລົງເຄື່ອນໄຫວຂອງຄະນະນັກຂ່າວຄັ້ງນີ້ແມ່ນໄດ້ຮັບການສະໜັບສະໜູນຈາກ EU ຜ່ານອົງການ Unicef ນໍາພາໂດຍ ກົມສື່ມວນຊົນ ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ.