ຂ່າວຕ່າງປະເທດລາຍງານ ໃນວັນທີ 18 ກັນຍາ ຜ່ານມາ, ກະຊວງກະສິກຳຂອງອາເມຣິກາ ໄດ້ເປີດເຜີຍບົດລາຍງານໂດຍລະບຸວ່າ: ຟີລິບປິນໄດ້ອະນຸມັດການນຳເຂົ້າ-ເຂົ້າ ຈຳນວນ 3,9 ລ້ານໂຕນ ໃນລະຫວ່າງເດືອນມັງກອນ 2022 – ທັນວາ 2023 ຖືວ່າເປັນປະເທດທີ່ນຳເຂົ້າ-ເຂົ້າຫຼາຍທີ່ສຸດໃນໂລກໃນປີນີ້ ນຳໜ້າປະເທດຈີນ ຊຶ່ງຄອງສະຖິຕິຜູ້ນຳເຂົ້າ-ເຂົ້າລາຍໃຫຍ່ທີ່ສຸດຂອງໂລກຕັ້ງແຕ່ປີ 2019 ແລະ ອະນຸມັດການນຳເຂົ້າ-ເຂົ້າ ຈຳນວນ 3,5 ລ້ານໂຕນ ໃນໄລຍະເວລາດຽວກັນ.
ທັງນີ້, ຟີລິບປິນນຳເຂົ້າ-ເຂົ້າຈາກໄທ ແລະ ຫວຽດນາມຫຼາຍທີ່ສຸດ ໂດຍທັງສອງປະເທດເປັນຜູ້ສົ່ງອອກເຂົ້າລາຍໃຫຍ່ອັນດັບ 2 ແລະ 3 ຂອງໂລກຕາມລຳດັບ ຮອງຈາກອິນເດຍ. ຂະນະດຽວກັນ, ໄທ ແລະ ຫວຽດນາມ ຕ່າງກໍຕັ້ງຄວາມຫວັງວ່າ ການທີ່ອິນເດຍຢຸດຕິການສົ່ງອອກເຂົ້າເກືອບທຸກຊະນິດຕັ້ງແຕ່ວັນທີ 20 ກໍລະກົດ ຜ່ານມາ ຈະເພີ່ມໂອກາດໃຫ້ກັບເຂົ້າຂອງປະເທດຕົນເອງອອກສູ່ຕະຫຼາດໂລກໄດ້ຫຼາຍຂຶ້ນ. ອີກຢ່າງໜຶ່ງ, ທ່ານ ເຟີດິນານ ມາກອສ ຈູເນຍ ປະທານາທິບໍດີຟີລິບປິນ ໄດ້ມີຄຳສັ່ງໃນວັນທີ 1 ກັນຍາ ຜ່ານມາ ໃຫ້ຮັກສາລາຄາເຂົ້າຂາວປົກກະຕິໄວ້ ບໍ່ເກີນ 41 ເປໂຊ (ສະກຸນເງິນຟີລິບປິນ) ຕໍ່ 1 ກິໂລ ແລະ ກຳນົດລາຄາເຂົ້າເກດດີໄວ້ ບໍ່ເກີນ 45 ເປໂຊຕໍ່ 1 ກິໂລ.
ນອກຈາກນີ້, ທ່ານ ເຟີດິນານ ມາກອສ ຈູເນຍ ຊຶ່ງເປັນທັງປະທານາທິບໍດີ ແລະ ລັດຖະມົນຕີກະຊວງກະສິກຳຂອງຟີລິບປິນ ໄດ້ອອກຄຳສັ່ງໃຫ້ໜ່ວຍງານທີ່ກ່ຽວຂ້ອງທຸກແຫ່ງເພີ່ມລະດັບການກວດສອບເຂົ້າຕາມໂຮງສີ ເພື່ອກວດສອບຄຸນນະພາບ ປ້ອງກັນການກັກຕຸນສິນຄ້າ ແລະ ສະກັດກັ້ນການລັກສົ່ງອອກເຂົ້າ.
