ວິທະຍຸກະຈາຍສຽງຫວຽດນາມລາຍງານວ່າ: ເມື່ອບໍ່ດົນມານີ້, ທ່ານ ຈໍເຈຍ ເມໂລນີ ນາຍົກລັດຖະມົນຕີ ອີຕາລີ ກ່າວວ່າ: ອະນາຄົດສະຫະພາບເອີຣົບ (ອີຢູ) ພວມຢືນຢູ່ຕໍ່ໜ້າສິ່ງທ້າທາຍອັນໃຫຍ່ຫຼວງ ເມື່ອຈຳນວນຊາວອົບພະຍົບເຄື່ອນຍ້າຍໄປເກາະແລມເພດູຊາ (ເກາະໃນທະລາເມດີເຕຣານຽນ) ນັບມື້ນັບຫຼາຍຂຶ້ນ.
ຂ່າວລະບຸວ່າ: ກ່າວຄຳເຫັນໃນກອງປະຊຸມຖະແຫຼງຂ່າວກັບ ທ່ານນາງ ອູຊູລາ ວອນເດິເລເຢນ ປະທານຄະນະກຳມະການເອີຣົບ (EC) ໃນການເດີນທາງໄປສຳຫຼວດເກາະແລມເພດູຊາ, ທ່ານ ຈໍເຈຍ ເມໂລນີ ຖືວ່າ: ບັນດາປະເທດ ອີຢູ ຕ້ອງສົມທົບກັນເພື່ອຮັບມືກັບບັນດາສິ່ງທ້າທາຍລວມ ຈາກກະແສຟອງຊາວອົບພະຍົບທີ່ນັບມື້ນັບເກີນຂອບເຂດການຄວບຄຸມ. ບັນຫາດັ່ງກ່າວ ພວມນາບຂູ່ເຖິງອະນາຄົດ ຊຶ່ງເປັນອະນາຄົດທີ່ຂຶ້ນກັບຄວາມສາມາດຂອງທັງກຸ່ມ ໃນການຮັບມືກັບບັນດາສິ່ງທ້າທາຍໃຫຍ່.
ສ່ວນທ່ານນາງ ອູຊູລາ ວອນເດິເລເຢນ ຖືວ່າ: ກະແສຟອງຊາວອົບພະຍົບຜິດກົດໝາຍ ແມ່ນສິ່ງທ້າທາຍຂອງທົ່ວທະວີບເອີຣົບ, ສະນັ້ນ ຕ້ອງມີວິທີຮັບມືລວມຂອງທັງກຸ່ມ. ທ່ານຮຽກຮ້ອງໃຫ້ບັນດາປະເທດສະມາຊິກອື່ນໆຂອງ ອີຢູ ເຂົ້າຊ່ວຍເຫຼືອຊາວອົບພະຍົບເພື່ອແບ່ງປັນຄວາມຮັບຜິດຊອບກັບ ອີຕາລີ.
