ສະຖາບັນວິຈິດສິນແຫ່ງຊາດ ໄດ້ຈັດພິທີສະຫຼຸບການຮຽນ-ການສອນສົກສຶກສາ 2022-2023 – ເປີດສົກຮຽນໃໝ່ 2023-2024 ແລະ ມອບ-ຮັບ ໃບປະກາສະນີຍະບັດໃຫ້ຜູ້ສໍາເລັດການສຶກສາ ປະຈໍາສົກສຶກສາ 2022-2023 ຂຶ້ນໃນວັນທີ 19 ກັນຍາ ນີ້ ທີ່ສະຖາບັນວິຈິດສິນແຫ່ງຊາດ ໂດຍການເຂົ້າຮ່ວມ ແລະ ມອບໃບປະກາສະນີຍະບັດ ຂອງທ່ານ ວັນສີ ກົວມົວ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ), ທ່ານ ຄໍາສຸກ ແກ້ວວົງຊາຍ ຜູ້ອໍານວຍການສະຖາບັນວິຈິດສິນແຫ່ງຊາດ, ພ້ອມດ້ວຍພາກສ່ວນກ່ຽວຂ້ອງ, ຄູ-ອາຈານ, ຜູ້ປົກຄອງ ແລະ ນັກສຶກສາເຂົ້າຮ່ວມ.
ທ່ານ ສາຍສະໝອນ ໂພທະລິນ ຮອງຜູ້ອໍານວຍການສະຖາບັນວິຈິດສິນແຫ່ງຊາດ ໄດ້ຜ່ານບົດສະຫຼຸບການຈັດຕັ້ງປະຕິບັດແຜນການ ສົກປີ 2022-2023 ແລະ ທິດທາງແຜນການ ສົກປີ 2023-2024ວ່າ: ສະຖາບັນວິຈິດສິນແຫ່ງຊາດ ເປັນກອງວິຊາການລະດັບ I ໃນໂຄງປະກອບກົງຈັກການຈັດຕັ້ງ ຂອງກະຊວງ ຖວທ ມີພາລະບົດບາດໜ້າທີ່ ເປັນເສນາທິການຊ່ວຍລັດຖະມົນຕີ ໃນການກໍ່ສ້າງ – ພັດທະນາວິຊາການດ້ານວິຈິດສິນ ແລະ ການໂຄສະນາເຜີຍແຜ່ອອກສູ່ສັງຄົມ, ສະຖາບັນມີສໍານັກງານບໍລິຫານ, ຫ້ອງຮຽນຢູ່ຄຸ້ມໂພນປ່າເປົ້າ ແລະ ຫ້ອງວາງສະແດງຜົນງານຢູ່ຄຸ້ມອານຸ, ປັດຈຸບັນມີຫຼັກສູດວິຈິດສິນ ໃນລະດັບປະລິນຍາໂທ, ປະລິນຍາຕີ ແລະ ຊັ້ນສູງ, ມີບຸກຄະລາກອນທັງໝົດ 69 ຄົນ ຍິງ 30 ຄົນ ໃນນີ້ເປັນລັດຖະກອນຄູ 56 ຄົນ ຍິງ 10 ຄົນ, ຕົ້ນປີມີນັກສຶກສາທັງໝົດ 316 ຄົນ ຍິງ 88 ຄົນ, ທ້າຍປີມີນັກສຶກ 286 ຄົນ ຍິງ 76 ຄົນ. ດ້ານວຽກງານວິຊາສະເພາະ ໄດ້ຈັດຕັ້ງປະຕິບັດຫຼັກສູດ ການຮຽນ – ການສອນ ຕາມການຮັບຮອງອະນຸມັດຈາກກະຊວງສຶກສາທິການ ແລະ ກິລາ, ກະຊວງ ຖວທ, ສະຖາບັນໄດ້ດໍາເນີນການຮຽນ – ການສອນ ຢູ່ 3 ລະດັບ ເຊັ່ນ: ຫຼັກສູດລະດັບອະນຸປະລິນຍາລະບົບ 3 ປີ, ມີ 3 ສາຂາວິຊາຄື: ສາຂາວິຊາຈິດຕະກໍາ, ປະຕິມະກໍາ ແລະ ສິລະປະພາບພິມ, ຫຼັກສູດລະດັບປະລິນຍາຕີ ລະບົບ 5 ປີ, ປະກອບມີ 5 ພາກວິຊາເຊັ່ນ: ພາກວິຊາ ຈິດຕະກຳ, ພາກວິຊາ ປະຕິມະກຳ, ພາກວິຊາ ສິລະປະພາບພິມ, ພາກວິຊາ ສິລະປະພື້ນເມືອງ-ປະຕິສັງຂອນ, ພາກວິຊາ ອອກແບບນິເທດສິນ ແລະ ປະກອບດ້ວຍ 9 ສາຂາວິຊາເຊັ່ນ : ຈິດຕະກຳ, ປັ້ນ-ຫຼໍ່, ຄັວດແກະສະຫຼັກ, ສິລະປະປັ້ນດິນເຜົາ, ສິລະປະໂລຫະ, ສິລະປະພາບພິມ, ສິລະປະພື້ນເມືອງ-ປະຕິສັງຂອນ, ຮູບເງົາ-ກາຕູນ ແລະ ອອກແບບບັນຈຸພັນ, ໄດ້ມີຫຼັກສູດລະດັບປະລິນຍາໂທ ລະບົບ 2 ປີ ມີ 1 ສາຂາວິຊາ ຄື : ສາຂາວິຊາ ບໍລິຫານຄຸ້ມຄອງ ສິລະປະ-ວັດທະນະທໍາ.
ສໍາລັບນັກສຶກສາປະລິນຍາຕີ ປີ V ມີສິດເຂົ້າສອບເສັງຈໍານວນ 61 ຄົນ ຍິງ 18 ຄົນ, ຂໍໂຈະການເຮັດບົດຈົບຊັ້ນ 3 ຄົນ, ລົງທະບຽນເຂົ້າສອບເສັງຕົວຈິງ 58 ຄົນ, ສອບເສັງຈົບຊັ້ນໄດ້ 56 ຄົນ ຍິງ 17 ຄົນ, ຄິດເປັນ 96,55%; ນັກສຶກສາທີ່ມາຮຽນລະດັບປະລິນຍາຕີລະບົບຕໍ່ເນື່ອງ ຈໍານວນ 6 ຄົນ, ໄດ້ຍົກຍ້າຍມາຮຽນລະດັບອະນຸປະລິນຍາ ຈໍານວນ 1 ຄົນ; ນັກສຶກສາຊັ້ນອະນຸປະລິນຍາ ປີທີ 3 ສາຂາໂຮງຮຽນວິຈິດສິນ ສອບເສັງໄດ້ຈໍານວນ 11 ຄົນ ຍິງ 1 ຄົນ, ຄິດເປັນ 90% ແລະ ນັກສຶກສາຈົບປະລິນຍາໂທ ສາຂາວິຊາ ບໍລິຫານຄຸ້ມຄອງ ສິລະປະ-ວັດທະນະທໍາ ປະກອບມີຮຸ່ນທີ I, II, III ຈໍານວນ 16 ຄົນ ຍິງ 7 ຄົນ.
ຂ່າວ: ຍຸພິນທອງ
