ບໍລິສັດທີ່ປຶກສາດ້ານການພັດທະນາ ແລະ ວິສາຫະກິດ ຈໍາກັດ (EDC) ຮ່ວມກັບບັນ ດາຄູ່ຮ່ວມງານ ແລະ ເພື່ອນມິດຈູນລະວິສາຫະກິດ ແລະ ທຸລະກິດຂະໜາດນ້ອຍ-ກາງ (ຈວນກ) ໄດ້ຈັດງານເປີດໂຄງການເສີມສ້າງຄວາມອາດສາມາດ ໃຫ້ແກ່ຜູ້ປະ ກອບການ ຈວນກ ແມ່ຍິງອາຊຽນ ກ້າວສູ່ການດໍາເນີນທຸລະກິດແບບດີຈິຕອນ ຫຼື ໂຄງການ ໄອເດຍສ໌ ປະຈໍາລາວ.
ໂຄງການ ໄອເດຍສ໌ ເປັນໂຄງການຮ່ວມມືລະຫວ່າງອາຊຽນ ແລະ ສ.ເກົາຫຼີ ໂດຍເລັ່ງໃສ່ການສ້າງຄວາມເຂັ້ມແຂງທາງດ້ານເສດຖະກິດໃຫ້ແກ່ທຸລະກິດຂອງແມ່ຍິງທີ່ເປັນຈູນລະວິສາຫະກິດ ວິສາຫະກິດຂະໜາດນ້ອຍ ແລະ ກາງ ເປີດໂອກາດໃຫ້ແກ່ທຸລະ ກິດເຂົາເຈົ້າໄດ້ຮັບການຍົກລະດັບທັກສະດິຈິຕອນ ເພື່ອການດໍາເນີນທຸລະກິດແບບອອນລາຍ ແລະ ຂະຫຍາຍຕະຫຼາດສູ່ພາກພື້ນ ອາຊຽນ ແລະ ສາກົນຫຼາຍຂຶ້ນ ເຊິ່ງໂຄງການມີໄລຍະການດໍາເນີນງານ 5 ປີ ເລີ່ມປີ 2022-2026 ປະກອບມີບາດກ້າວໃນແຕ່ລະໄລຍະຄື:ປີ 2022 ໄລຍະກະກຽມວາງແຜນຮ່ວມກັບບັນດາຄູ່ຮ່ວມງານຈາກອາຊຽນ ແລະ ສ.ເກົາຫຼີ ລວມເຖິງສະຖາບັນການຈັດຕັ້ງປະຕິບັດໂຄງການຈາກ 10 ປະ ເທດ ສະມາຊິກອາຊຽນ ປີ 2023 ສ້າງຄະນະຄູເຝິກສະເພາະໂຄງການ 14 ທ່ານ ກະ ກຽມຫຼັກສູດເຝິກອົບຮົມດ້ານທັກສະການດໍາເນີນທຸລະກິດແບບດິຈິຕອນ ພ້ອມທັງເປີດກວ້າງເຜີຍແຜ່ຂໍ້ມູນຂ່າວສານກ່ຽວກັບເຝິກອົບຮົມແບບບໍ່ເສຍຄ່າ ຮັບສະໝັກບັນດາທຸລະກິດຂອງແມ່ຍິງ 242 ທຸລະກິດທີ່ສົນໃຈເຂົ້າຮ່ວມຫຼັກສູດເຝິກອົບຮົມ ປີ 2024-2025 ໃຫ້ບໍລິການສະໜອງເຝິກອົບຮົມ ໃຫ້ຄໍາປຶກສາບໍ່ເສຍຄ່າແກ່ 242 ທຸ ລະກິດທີ່ໄດ້ລົງທະບຽນສະໝັກ ຕາມເງື່ອນໄຂຂອງໂຄງການ ມີຄາດໝາຍ ຈວນກ ບໍ່ຕໍ່າກວ່າ 100 ຫົວໜ່ວຍ ໄດ້ມີການນໍາໃຊ້ທັກສະໄອຊີທີ ສ້າງສື່ສົ່ງເສີມການດໍາເນີນທຸ ລະກິດແບບດິຈິຕອນຕົວຈິງ ແລະ ມີ ຈວນກ ຢ່າງໜ້ອຍ 30 ຫົວໜ່ວຍທີ່ເປັນຕົວແບບໃນການດໍາເນີນທຸລະກິດອອນລາຍທີ່ມີຜົນສໍາເລັດ ປີ 2026 ເຂົ້າຮ່ວມງານມະ ຫາກໍາ ໂຄງການ ໄອເດຍສ໌ ລະດັບອາຊຽນ ເພື່ອວາງສະແດງຜົນງານ ແລກປ່ຽນ ເຜີຍ ແຜ່ຜົນສໍາເລັດການສ້າງຄວາມອາດສາມາດໃຫ້ແກ່ບັນດາທຸລະກິດ ຈວນກ ຂອງແມ່ຍິງອາຊຽນ ແລະ ການປະກອບສ່ວນໃນເສດຖະກິດດິຈິຕອນ.
ໂຄງການ ໄອເດຍສ໌ ເປີດໂອກາດໃຫ້ແກ່ຜູ້ປະກອບການແມ່ຍິງ ໃນການລົງທະບຽນເພື່ອສະໝັກເຂົ້າຮ່ວມຫຼັກສູດເຝິກອົບຮົມໄລຍະ 1–3 ມື້ ອີງໃນຫຼັກສູດ ແບບບໍ່ເສຍຄ່າ ກ່ຽວກັບທັກສະການດໍາເນີນທຸລະກິດແບບດີຈິຕອນໂດຍມີເງື່ອນໄຂດັ່ງນີ້:ເຈົ້າຂອງທຸລະກິດເປັນແມ່ຍິງ ສັນຊາດລາວ ເປັນຈຸນລະວິສາຫະກິດ ທຸລະກິດຂະໜາດນ້ອຍ-ກາງ ທີ່ດຳເນີນທຸລະກິດປົກກະຕິ (ອັອບລາຍ ຫຼື ອອນລາຍ) ສະຖານທີ່ເຝິກອົບຮົມ ຫ້ອງເຝິກອົບຮົມຂອງ EDC ນະຄອນຫຼວງວຽງຈັນ.
ພິທີເປີດໂຄງການດັ່ງກ່າວ ໄດ້ຈັດຂຶ້ນວັນທີ 8 ກັນຍາ 2023 ທີ່ ບໍລິສັດ EDC ອາຄານສີຂຽວ ບ້ານນາໄຊ ເມືອງ ໄຊເສດຖາ ນະຄອນຫຼວງວຽງຈັນ ເປັນປະທານຮ່ວມຂອງ ທ່ານ ນາງ ລັດທະນາ ດວງບຸບຜາ ຮອງຫົວໜ້າກົມສົ່ງເສີມທຸລະກິດຂະໜາດນ້ອຍ-ກາງ ກະຊວງອຸດສາຫະກໍາ ແລະ ການຄ້າ ແລະ ທ່ານນາງ ທິພາພອນ ເພັດມະນີ ຜູ້ອໍານວຍການບໍລິສັດທີ່ປຶກສາ EDC ມີບັນດາຄູເຝິກ ຄູ່ຮ່ວມງານ ຄະນະຮັບຜິດຊອບໂຄງການ ຫົວໜ່ວຍທຸລະກິດ ແລະ ແຂກຖືກເຊີນເຂົ້າຮ່ວມ.
