ໃນວັນທີ 06 ກັນຍາ 2023 ທີ່ ຈາກາຕາ, ປະເທດອິນໂດເນເຊຍ, ທ່ານ ສອນໄຊ ສີພັນດອນ, ນາຍົກລັດຖະມົນຕີ ແຫ່ງ ສປປ ລາວ ໄດ້ເຂົ້າຮ່ວມກອງປະຊຸມສຸດຍອດອາຊຽນ-ສປ ຈີນ ຄັ້ງທີ 26, ກອງປະຊຸມສຸດຍອດອາຊຽນ-ສ.ເກົາຫຼີ ຄັ້ງທີ 24, ກອງປະຊຸມສຸດຍອດອາຊຽນ-ຍີ່ປຸ່ນ ຄັ້ງທີ 26, ກອງປະຊຸມສຸດຍອດອາຊຽນບວກສາມ ຄັ້ງທີ 26, ກອງປະຊຸມສຸດຍອດອາຊຽນ-ສະຫະລັດ ອາເມລິກາ (ສ. ອາເມ ລິກາ) ຄັ້ງທີ 11 ແລະ ກອງປະຊຸມສຸດຍອດອາຊຽນ-ການາດາ.
ໃນໂອກາດກອງປະຊຸມສຸດຍອດອາຊຽນ -ສປ ຈີນ ຄັ້ງທີ 26, ຜູ້ນໍາອາຊຽນ ແລະ ສປ ຈີນ ໄດ້ສະແດງຄວາມຊົມເຊີຍຕໍ່ການສະເຫຼີມສະຫຼອງການເຂົ້າເປັນພາຄີສົນທິສັນຍາໄມຕີຈິດ ແລະ ການຮ່ວມມືໃນອາຊີຕາເວັນອອກສ່ຽງໃຕ້ຂອງ ສປ ຈີນ ຄົບຮອບ 20 ປີ, ງານວາງສະແດງສິນຄ້າອາຊຽນ-ຈີນ ທີ່ ໜານໜິງ ຄົບຮອບ 20 ປີ ແລະ ຂໍ້ລິເລີ່ມໜຶ່ງແລວ-ໜຶ່ງເສັ້ນ ທາງ ຄົບຮອບ 10 ປີ, ພ້ອມທັງສະແດງຄວາມຍິນດີຕໍ່ການຈັດຕັ້ງປະຕິບັດປີແຫ່ງການພັດທະນາທາງດ້ານກະສິກໍາ ແລະ ການຮ່ວມມືດ້ານຄວາມໝັ້ນຄົງທາງສະບຽງອາຫານ ອາຊຽນ-ຈີນ ໃນປີ 2023. ພິເສດ, ກອງປະຊຸມຄັ້ງນີ້ ໄດ້ຮັບຮອງເອົາຖະແຫຼງການຮ່ວມ ວ່າດ້ວຍການຮ່ວມມືຕ່າງຝ່າຍຕ່າງໄດ້ຮັບຜົນປະໂຫຍດ ກ່ຽວກັບແນວຄວາມຄິດອາຊຽນ ກ່ຽວກັບອິນໂດ-ປາຊີຟິກ, ຖະແຫຼງການຮ່ວມ ອາຊຽນ-ຈີນ ວ່າດ້ວຍການຮັດແໜ້ນການຮ່ວມມືດ້ານກະສິກໍາ, ຂໍ້ລິເລີ່ມອາຊຽນ -ຈີນ ວ່າດ້ວຍການເສີມຂະຫຍາຍໂຄງການຮັດແໜ້ນດ້ານນະວັດຕະກໍາ, ເຕັກໂນໂລຊີ ແລະ ວິທະຍາສາດ ແລະ ຂໍ້ລິເລີ່ມ ວ່າດ້ວຍການຮັດແໜ້ນການຮ່ວມມືດ້ານການຄ້າອີເລັກໂຕຣນິກ.
ກອງປະຊຸມສຸດຍອດອາຊຽນ-ສ. ເກົາຫຼີ ຄັ້ງທີ 24 ໄດ້ສະແດງຄວາມຊົມເຊີຍຕໍ່ຄວາມຄືບໜ້າໃນການຈັດຕັ້ງປະຕິບັດແຜນປະຕິບັດງານການຮ່ວມມື ອາຊຽນ-ສ. ເກົາຫຼີ (2021-2025) ແລະ ຕີລາຄາສູງຕໍ່ຄວາມໝາຍໝັ້ນຂອງ ສ. ເກົາຫຼີ ໃນການເພີ່ມທະວີການຮ່ວມມືກັບອາຊຽນ ໂດຍຜ່ານຂໍ້ລິເລີ່ມ ວ່າດ້ວຍຄວາມສາມັກຄີອາຊຽນ-ສ.ເກົາຫຼີ (KASI).
ໃນນີ້, ກອງປະຊຸມ ໄດ້ເຫັນດີຍົກລະດັບການພົວພັນຮ່ວມມືອາຊຽນ-ສ.ເກົາຫຼີ ຂຶ້ນເປັນຄູ່ຮ່ວມຍຸດທະສາດຮອບດ້ານ (CSP) ໃນໂອກາດຄົບຮອບ 35 ປີ ແຫ່ງການພົວພັນອາຊຽນ-ສ.ເກົາຫຼີ ໃນປີ 2024. ພ້ອມນີ້, ກອງປະຊຸມ ໄດ້ຮັບຮອງເອົາຖະແຫຼງການຮ່ວມອາຊຽນ-ສ.ເກົາຫຼີ ວ່າດ້ວຍການຮ່ວມມືພາຍໃຕ້ແນວຄວາມຄິດອາຊຽນ ກ່ຽວກັບອິນໂດ-ປາຊີຟິກ.
ກອງປະຊຸມສຸດຍອດອາຊຽນ-ຍີ່ປຸ່ນ ຄັ້ງທີ 26 ໄດ້ເຫັນດີຍົກລະດັບການພົວພັນອາຊຽນ-ຍີ່ປຸ່ນ ຂຶ້ນເປັນຄູ່ຮ່ວມ ຍຸດທະສາດຮອບດ້ານ ໂດຍໄດ້ຮັບຮອງເອົາຖະແຫຼງການຮ່ວມ ວ່າດ້ວຍການສ້າງຕັ້ງຄູ່ຮ່ວມຍຸດທະສາດຮອບດ້ານ ອາຊຽນ-ຍີ່ປຸ່ນ. ພ້ອມນີ້, ບັນດາຜູ້ນໍາອາຊຽນ ແລະ ຍີ່ປຸ່ນ ຍັງໄດ້ເຫັນດີຈັດກອງປະຊຸມສຸດຍອດສະເຫຼີມສະຫຼອງ ຄົບຮອບ 50 ປີ ແຫ່ງມິດຕະພາບ ແລະ ການຮ່ວມມືອາຊຽນ-ຍີ່ປຸ່ນ ໃນວັນທີ 16-18 ທັນວາ 2023 ທີ່ ໂຕກຽວ, ຍີ່ປຸ່ນ.
ໃນໂອກາດກອງປະຊຸມສຸດຍອດອາຊຽນບວກສາມ ຄັ້ງທີ 26, ຜູ້ນໍາ ໄດ້ສະແດງຄວາມຍິນດີຕໍ່ໝາກຜົນຂອງການພົວພັນຮ່ວມມືອາຊຽນບວກສາມ ຕະຫຼອດໄລຍະ 26 ປີ ຜ່ານມາ ແລະ ເຫັນດີໃຫ້ສືບຕໍ່ເພີ່ມທະວີການຮ່ວມມືກັນ ໂດຍຜ່ານບັນດາກົນໄກ ແລະ ຂໍ້ລິເລີ່ມຂອງອາຊຽນບວກສາມ ທີ່ມີຢູ່ໃນປັດຈຸບັນ ເປັນຕົ້ນແມ່ນກອງທຶນການຮ່ວມມືຫຼາຍຝ່າຍ ພາຍໃຕ້ຂໍ້ລິເລີ່ມຊຽງໃໝ່, ຫ້ອງການຕິດຕາມເສດຖະກິດມະຫາພາກອາຊຽນບວກສາມ, ຄັງແຮເຂົ້າສຸກເສີນອາຊຽນບວກສາມ, ເວທີປຶກສາຫາລືອາຊີຕາເວັນອອກ ແລະ ເຄືອຂ່າຍຄັງປັນຍາອາຊີຕາເວັນອອກ ໃຫ້ມີຄວາມເຂັ້ມແຂງ ແລະ ມີປະສິດທິພາບຫຼາຍຂຶ້ນ. ກອງປະຊຸມ ໄດ້ຊຸກຍູ້ໃຫ້ບັນດາປະເທດອາຊຽນບວກສາມ ສືບຕໍ່ຮ່ວມມືໃນຂົງເຂດວິທະຍາສາດ ແລະ ເຕັກໂນໂລຊີ ທີ່ທັນສະໄໝ ໄປຄຽງຄູ່ກັບການປົກປັກຮັກສາສິ່ງແວດລ້ອມ ແລະ ການພັດທະນາແບບຍືນຍົງ. ໃນນີ້, ກອງປະຊຸມ ໄດ້ຮັບຮອງເອົາຖະແຫຼງການຂອງຜູ້ນໍາອາຊຽນບວກສາມ ວ່າດ້ວຍການພັດທະນາລະບົບນິເວດລົດໄຟຟ້າ.
ກອງປະຊຸມສຸດຍອດອາຊຽນ-ສ.ອາເມລິກາ ຄັ້ງທີ 11 ໄດ້ຕີລາຄາສູງຕໍ່ການພົວພັນຮ່ວມມືອາຊຽນ-ສ. ອາເມລິກາ ໃນໄລຍະຜ່ານມາ ໂດຍສະເພາະແມ່ນຄວາມຄືບໜ້າໃນການຈັດຕັ້ງປະຕິບັດແຜນປະຕິບັດງານອາຊຽນ-ສະຫະລັດ (2021-2025). ພ້ອມນີ້, ກອງປະຊຸມ ໄດ້ປະກາດສ້າງຕັ້ງສູນອາຊຽນ-ສະຫະລັດ ແລະ ໄດ້ຮັບຮອງເອົາຖະແຫຼງການຜູ້ນໍາ ອາຊຽນ-ສ.ອາເມລິກາ ວ່າດ້ວຍການຮ່ວມມືເພື່ອສົ່ງເສີມແນວຄວາມຄິດອາຊຽນ ກ່ຽວກັບອິນໂດ-ປາຊິຟິກ.
ກອງປະຊຸມສຸດຍອດອາຊຽນ-ການາດາ ໄດ້ເຫັນດີຍົກລະດັບການຮ່ວມມືຂຶ້ນເປັນຄູ່ຮ່ວມມືຍຸດທະສາດອາຊຽນ-ການາດາ ໂດຍໄດ້ຮັບຮອງເອົາຖະແຫຼງການຮ່ວມຂອງຜູ້ນໍາ ວ່າດ້ວຍຄູ່ຮ່ວມຍຸດທະສາດອາຊຽນ-ການາດາ ແລະ ຖະແຫຼງການຮ່ວມຂອງຜູ້ນໍາອາຊຽນ-ການາດາ ວ່າດ້ວຍການຮ່ວມມືດ້ານຄວາມໝັ້ນຄົງດ້ານສະບຽງອາຫານໃນຍາມມີວິກິດການ ເພື່ອເປັນທິດທາງໃນເສີມຂະຫຍາຍການຮ່ວມມື ລະຫວ່າງອາຊຽນ ແລະ ການາດາ ໃນຕໍ່ໜ້າ.
ໃນມື້ດຽວກັນ, ທ່ານນາຍົກລັດຖະມົນຕີ ສອນໄຊ ສີພັນດອນ ຍັງໄດ້ພົບປະສອງຝ່າຍ ກັບ ນາຍົກລັດຖະມົນຕີ ຕີມໍ ແລັດສະເຕ, ນາຍົກລັດຖະມົນຕີອົດສະຕຣາລີ ແລະ ຮັບການເຂົ້າຢ້ຽມຂໍ່ານັບຂອງຜູ້ອໍານວຍການຂອງກອງທຶນການເງິນສາກົນ.
ຂ່າວ;ພາບ: ກົມການຂ່າວ ກະຊວງການຕ່າງປະເທດ
