ສະມາຊິສະພາແຫ່ງຊາດເຂດເລືອກຕັ້ງທີ 7 ແລະ ສະມາຊິກສະພາປະຊາຊົນແຂວງໄຊຍະບູລີ ໄດ້ລົງພົບປະຜູ້ມີສິດເລືອກຕັ້ງ ແລະ ເຜີຍແຜ່ຜົນສຳເລັດກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດຊຸດທີ IX ແລະ ສະພາປະຊາຊົນແຂວງໄຊຍະບູລີຊຸດທີ II ຢູ່ເມືອງບໍ່ແຕນ ໄດ້ເຄື່ອນໄຫວຢູ່ 6 ຈຸດຄື: ບ້ານ ຕາລິ່ງ, ບ້ານໃຫຍ່ດອນເກືອ,ບ້ານໜອງປາຈີດ, ບ້ານໂພນໄຊ, ບ້ານນາຂ່າ ແລະ ສຳນັກງານອົງການ ຊຶ່ງຈັດທີ່ຫ້ອງປະຊຸມຂອງເມືອງ ໃນວັນທີ 7 ກັນຍາ ນີ້ ຊຶ່ງນຳໂດຍ ທ່ານ ພົທ ສຸວອນ ເລືອງບຸນມີ ຮອງປະທານສະພາແຫ່ງຊາດ ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 7. ມີ ທ່ານ ເພັງນິລັນ ຄຳພັນເພັງ ຮອງເລຂາພັກແຂວງ ປະທານສະພາປະຊາຊົນແຂວງໄຊຍະບູລີ, ມີບັນດາທ່ານຄະນະທີມງານສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ຄະນະພັກ-ອົງການປົກຄອງເມືອງ, ພະນັກງານຫຼັກແຫຼ່ງຂອງເມືອງທັງ 6 ຈຸດເຂົ້າຮ່ວມຮັບຟັງ.
ໃນພິທີບັນດາສະມາຊິກສະພາແຫ່ງຊາດເຂດ 7 ແລະ ສະມາຊິກສະພາປະຊາຊົນແຂວງກໍໄດ້ເຜີຍແຜ່ຜົນສຳເລັດຂອງກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX, ກອງປະຊຸມໄດ້ຄົ້ນຄວ້າ, ພິຈາລະນາ ແລະ ຮັບຮອງເອົາບັນຫາສໍາຄັນຕ່າງໆ ເປັນຕົ້ນໄດ້ພິຈາລະນາ, ຮັບຮອງເອົາບົດລາຍງານຂອງລັດຖະບານ ກ່ຽວກັບການຈັດຕັັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 6 ເດືອນຕົ້ນປີ 2023 ແລະ ທິດທາງແຜນການ 6 ເດືອນທ້າຍປີ 2023, ແຜນວຽກຈຸດສຸມ ແລະ ມາດຕະການຈັດຕັັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 6 ເດືອນທ້າຍປີ 2023, ກອງປະຊຸມເຫັນດີເປັນເອກະພາບຕໍ່ທິດທາງແຜນວຽກຈຸດສຸມຂອງແຜນພັດທະນາເສດຖະກິດ -ສັງຄົມແຫ່ງຊາດ 6 ເດືອນທ້າຍປີ 2023 ແລະ ມາດຕະການຈັດຕັ້ງປະຕິບັດຕາມການສະເໜີ ຂອງລັດຖະບານ ແລະ ບັນຫາອື່ນໆຂອງກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX ໄດ້ຮັບຮອງເອົາ.
ພ້ອມທັງໄດ້ເຜີຍແຜ່ຜົນສໍາເລັດກອງປະຊຸມສະໄໝສາມັນ ເທື່ອທີ 5 ຂອງສະພາປະຊາຊົນແຂວງໄຊຍະບູລີ ຊຸດທີ II ທີ່ກອງປະຊຸມໄດ້ຄົ້ນຄວ້າ, ພິຈາລະນາ ແລະ ຮັບຮອງເອົາບັນຫາສໍາຄັນພື້ນນຖານຂອງແຂວງ ເປັນຕົ້ນແມ່ນກອງປະຊຸມໄດ້ພິຈາລະນາ, ຮັບຮອງເອົາແຜນພັດທະນາເສດຖະກິດ-ສັງຄົມ ຂອງແຂວງ ກ່ຽວກັບການຈັດຕັ້ງປະຕິບັດວຽກງານ ໄລຍະກາງສະໄໝຂອງແຜນການ 5 ປີ (2021-2025), ທິດທາງແຜນການທ້າຍສະໄໝ., ຮັບຮອງເອົາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງ ໄລຍະກາງສະໄໝຂອງແຜນການ 5 ປີ (2021-2025), ຮັບຮອງເອົາທິດທາງແຜນການພັດທະນາເສດຖະກິດ-ສັງຄົມຂອງແຂວງ ທ້າຍສະໄໝ ຮອດປີ 2025, ບັນດາຄາດໝາຍເສດຖະກິດມະຫາພາກ, ຄາດໝາຍເສດຖະກິດຂອງບັນດາຂະແໜງການ, ຄາດໝາຍວັດທະນະທໍາ-ສັງຄົມ.
ພ້ອມນັ້ນ, ກອງປະຊຸມໄດ້ພິຈາລະນາ, ຮັບຮອງເອົາແຜນພັດທະນາເສດຖະກິດ-ສັງຄົມ ຂອງແຂວງ ການຈັດຕັ້ງປະຕິບັດ 6 ເດືອນຕົ້ນປີ ແລະ ແຜນການ 6 ເດືອນທ້າຍປີ 2023. ຈຸດປະສົງກໍເພື່ອເຮັດໃຫ້ພາກສ່ວນເຂົ້າຮ່ວມໄດ້ຮັບຮູ້ເຂົ້າໃຈ ແລະ ພ້ອມກັນນຳໄປຈັດຕັ້ງປະຕິບັດຜັນຂະຫຍາຍເຂົ້າໃນຂົງເຂດວຽກງານຂອງຕົນໃຫ້ມີຜົນສຳເລັດ ແລະ ໃຫ້ບັນລຸຕາມຄາດໝາຍ.
ຂ່າວ-ພາບ: ສາຍຄຳ ບຸນຍາວົງ
