ພິທີປະດັບຫຼຽນໄຊແຮງງານຊັ້ນ I ຈາກ ພັກ ແລະ ລັດ ແຫ່ງ ສາທາລະນະລັດ ສັງຄົມນິຍົມ ຫວຽດນາມ ໃຫ້ ສະຫາຍ ແສງເພັດ ຮຸ່ງບຸນຍວງ ເອກອັກຄະລັດຖະທູດວິສາມັນ ຜູ້ມີອຳນາດເຕັມ ແຫ່ງ ສປປ ລາວ ປະຈຳ ສສ ຫວຽດນາມ ໄດ້ຈັດຂຶ້ນໃນວັນທີ 30 ສິງຫາ ຜ່ານມາ ທີ່ເຮືອນຮັບແຂກລັດຖະບານຫວຽດນາມ ເປັນກຽດປະດັບໂດຍ ສະຫາຍ ບຸຍ ແທັງ ເຊີນ ກຳມະການສູນກາງພັກ ລັດຖະມົນຕີ ກະຊວງການຕ່າງ ປະເທດຫວຽດນາມ.
ໃນໂອກາດດັ່ງກ່າວ ສະຫາຍ ບຸ່ຍ ແທງ ເຊີນ ໄດ້ຕີລາຄສູງຕໍ່ຜົນງານການເຄື່ອນໄຫວ ຂອງ ສະຫາຍ ແສງເພັດ ຮຸ່ງບຸນຍວງ ຕະຫຼອດໄລຍະທີ່ມາດຳລົງຕຳແໜ່ງ ເປັນເອກອັກ ຄະລັດຖະທູດວິ ສາມັນຜູ້ມີອຳນາດເຕັມ ແຫ່ງ ສປປ ລາວ ປະຈໍາ ສສ ຫວຽດນາມ ຊຶ່ງເປັນໄລຍະ ທີ່ມີລັກສະນະພິ ເສດ ເນື່ອງຈາກວ່າຖືກກັບໄລຍະການແຜ່ລະບາດຂອງເຊື້ອພະຍາດໂຄວິດ-19 ຢູ່ທົ່ວໂລກ ກໍຄືຢູ່ ລາວ ແລະ ຫວຽດນາມ ຊຶ່ງໄດ້ສົ່ງຜົນກະທົບ ຢ່າງຮ້າຍແຮງ ຕໍ່ມວນມະນຸດ ໂດຍສະເພາະແມ່ນການ ໄປມາຫາສູ່ ແລະ ລວມທັງກະທົບຕໍ່ການເຄື່ອນໄຫວ ວຽກຕ່າງໆ, ແຕ່ເຖິງຢ່າງໃດກໍຕາມ ຕະຫຼອດ ໄລຍະການປະຕິບັດໜ້າທີ່ຢູ່ຫວຽດນາມ ສະຫາຍເອກອັກຄະລັດຖະທູດ ໄດ້ໃຫ້ຄວາມສຳຄັນ ເປັນຢ່າງ ຍິ່ງຕໍ່ການຊຸກຍູ້ສົ່ງເສີມສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມື ຮອບດ້ານ ລະຫວ່າງ ລາວ-ຫວຽດນາມ ໃຫ້ເຂົ້າສູ່ລວງເລິກ ແລະ ມີໝາກຜົນຕົວຈິງ, ເປັນຕົ້ນການ ກະກຽມໃຫ້ແກ່ການແລກປ່ຽນ ການຢ້ຽມຢາມຂອງການນຳຂັ້ນສູງສອງປະເທດ ຂອງເລຂາທິການ ໃຫຍ່, ປະທານປະເທດ, ນາຍົກລັດຖະມົນຕີ, ປະທານສະພາ ຕະຫຼອດຮອດບັນດາການນຳ, ວິຊາການ ຂອງບັນດາກະຊວງ, ຂະແໜງການ ທັງສູນກາງ ແລະ ທ້ອງຖິ່ນ; ຊຸກຍູ້ການຈັດຕັ້ງປະຕິບັດການ ຕົກລົງຂອງການນໍາຂັ້ນສູງ ກໍຄືຂໍ້ຕົກລົງຂອງບັນດາກະຊວງ, ຂະແໜງການສູນກາງ ແລະ ທ້ອງຖິ່ນ ຂອງສອງຝ່າຍ, ຊຸກຍູ້ອໍານວຍຄວາມສະດວກໃຫ້ແກ່ການໄປມາຫາສູ່ຊຶ່ງກັນ ແລະ ກັນ ລະຫວ່າງ ປະຊາຊົນສອງປະເທດ, ອັນສໍາຄັນໄດ້ກະກຽມໃຫ້ແກ່ການພົບປະລະຫວ່າງສອງກົມການເມືອງ ປະຈໍາປີ 2020; 2021; 2022 ແລະ 2023; ກອງປະຊຸມ ຄັ້ງທີ 42, 43, 44, 45 ຂອງຄະນະກໍາມະການ ຮ່ວມມືລະຫວ່າງສອງລັດຖະບານ ເປັນຕົ້ນ.
ພິເສດ ແມ່ນຊຸກຍູ້ການຈັດກິດຈະກໍາ ການສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ, ຫວຽດນາມ-ລາວ ປີ 2022 ເພື່ອສະເຫຼີມສະຫຼອງສອງວັນປະຫວັດສາດ ທີ່ສຳຄັນ ຂອງສອງ ຊາດຄື: ວັນສ້າງຕັ້ງສາຍພົວພັນການທູດ ຄົບຮອບ 60 ປີ (5/9/1962–5/9/2022) ແລະ ວັນເຊັນ ສົນທິສັນຍາ ມິດຕະພາບລາວ-ຫວຽດນາມ ຄົບຮອບ 45 ປີ (18/7/1977–18/7/2022) ຢ່າງເປັນ ຂະບວນຄຶກຄື້ນ.
ເຫັນໄດ້ ຜົນງານການປະກອບສ່ວນອັນສຳຄັນດັ່ງກ່າວ ຂອງສະຫາຍ ເອກອັກຄະລັດຖະທູດ ເຂົ້າໃນການເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການ ຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ, ພັກ ແລະ ລັດຖະບານ ແຫ່ງ ສສ ຫວຽດນາມ ຈຶ່ງໄດ້ຕົກລົງປະດັບຫຼຽນໄຊແຮງງານ ຊັ້ນ I ໃຫ້ແກ່ສະຫາຍ ແສງເພັດ ຮຸ່ງບຸນຍວງ ເນື່ອງໃນໂອກາດສໍາເລັດການປະຕິບັດໜ້າທີ່ວຽກງານການທູດ ຢູ່ ສສ ຫວຽດນາມ.
ສະຫາຍເອກອັກຄະລັດຖະທູດໄດ້ສະແດງຄວາມຂອບໃຈ ແລະ ຮູ້ບຸນຄຸນຢ່າງສູງມາຍັງພັກ, ລັດ ຫວຽດນາມ ທີ່ໃຫ້ຄວາມສຳຄັນ ແລະ ຍ້ອງຍໍຜົນງານຂອງຕົນ, ຜົນງານຜົນສຳເລັດດັ່ງກ່າວ ກໍຍ້ອນການຮ່ວມມື, ສະໜັບສະໜູນຊ່ວຍເຫຼືອທີ່ດີ ຈາກການນຳກໍຄືບັນດາກະຊວງ, ຂະແໜງການ ແຕ່ສູນກາງຮອດທ້ອງຖິ່ນຂອງຫວຽດນາມ ໃນນັ້ນພິເສດ ແມ່ນກະຊວງການຕ່າງປະເທດ ແລະ ຄະນະ ພົວພັນການຕ່າງປະເທດສູນກາງພັກ.
ເນື່ອງໃນໂອກາດວັນຊາດຫວຽດນາມ ຄົບຮອບ 78 ປີ (ວັນທີ 2/9/1945-2/9/2023) ສະ ຫາຍເອກອັກຄະລັດຖະທູດໄດ້ຕາງໜ້າການນໍາພັກ, ລັດ ກອງທັບ ແລະ ປະຊາຊົນລາວ ອວຍພອນ ມາຍັງການນຳພັກ, ລັດ, ກອງທັບ ແລະ ປະຊາຊົນ ຫວຽດນາມ ອ້າຍນ້ອງ ພາຍໃຕ້ການຊີ້ນໍາ – ນໍາພາອັນສະຫຼາດສ່ອງໃສຂອງພັກກອມມູນິດຫວຽດນາມ ໂດຍມີສະຫາຍ ເລຂາທິການໃຫຍ່ ຫງວຽນ ຝູ ຈ້ອງ ເປັນຜູ້ນໍາພາ, ສສ ຫວຽດນາມ ຈະສືບຕໍ່ຍາດໄດ້ ຜົນສຳເລັດ ອັນໃຫຍ່ຫຼວງກວ່າເກົ່າ ເພື່ອໃຫ້ບັນລຸຕາມມະຕິກອງປະຊຸມໃຫຍ່ ຄັ້ງທີ 13 ຂອງພັກ ວາງອອກ ກໍຄືວິໄສທັດຮອດປີ 2045 ເພື່ອໃຫ້ຫວຽດນາມກາຍເປັນປະເທດພັດທະນາທີ່ມີລາຍຮັບປານກາງສູງ, ອວຍພອນໃຫ້ສາຍພົວພັນ ມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງ ລາວ-ຫວຽດ ນາມ, ຫວຽດນາມ-ລາວ ຈົ່ງຂຽວສົດງົດງາມຕະຫຼອດກາລະນານ.
ຂ່າວ, ພາບ: ສະຖານທູດລາວທີ່ຮ່າໂນ້ຍ ສສ ຫວຽດນາມ
