ຕາມການລາຍງານຈາກ ທ່ານ ສຸກສັນ ພາທະວົງ ຮອງອຳນວຍການ ໂຮງຮຽນ ມ ປາຍຕົວແບບ ແຂວງຫົວພັນ ໃຫ້ຮູ້ວ່າ: ໂຮງຮຽນ ມ ປາຍຕົວແບບ ເປັນໂຮງຮຽນໜຶ່ງທີ່ມີຄວາມພ້ອມໃນການໄຂສົກຮຽນໃໝ່ 2023-2024 ເຊິ່ງໂຮງຮຽນຂອງພວກເຮົາມີຄູອາຈານ ທັງໝົດ 42 ຄົນ, ຍິງ 24 ຄົນ, ມີ 15 ຫ້ອງຮຽນ ສາມາດຮັບນັກຮຽນໄດ້ທັງໝົດ 500-600 ຄົນ, ແຕ່ລະຫ້ອງບັນຈຸນັກຮຽນໄດ້ 30-35 ຄົນ, ມີ 3 ຊັ້ນຮຽນຄື: ຊັ້ນ ມ5, ຊັ້ນ ມ6 ແລະ ຊັ້ນ ມ7.
ການຮຽນ-ການສອນ ໃນສົກຮຽນນີ້ແມ່ນອີງຕາມທິດຊີ້ນຳຂອງຂັ້ນເທິງ ກໍຄື ພະແນກ ສຶກສາທິການ ແລະ ກິລາແຂວງ ໂດຍເລັ່ງໃສ່ 3 ໜ້າວຽກໃຫຍ່ຄື: ກະກຽມຄວາມພ້ອມດ້ານອາຄານສະຖານທີ່ໄດ້ຈັດຫ້ອງຮຽນ, ອະນາໄມອາຄານສະຖານທີ່, ກະກຽມເຄື່ອງໃຊ້ຢູ່ຫ້ອງການຄູ ແລະ ຫ້ອງຮຽນເພື່ອສະດວກໃນການຮຽນ-ການສອນ; ດ້ານວຽກງານວິຊາການໄດ້ເປີດກອງປະຊຸມສະພາຄູ ເພື່ອເປັນການທົບທວນຄືນບັນຫາຕ່າງໆ.
ໂດຍສະເພາະວຽກງານແນວຄິດຂອງພະນັກງານຄູ ເຊິ່ງໄດ້ນຳເອົາແນວທາງນະໂຍບາຍຕ່າງໆຂອງພັກ-ລັດມາເຜີຍແຜ່ເຊັ່ນ: ດຳລັດວ່າດ້ວຍລັດຖະກອນຄູ, ກົດລະບຽບການຄຸ້ມຄອງຄູ ແລະ ນັກຮຽນ, ຈັນຍາບັນຂອງຄູ ໃຫ້ຄູພາຍໃນໂຮງຮຽນໄດ້ຮັບຮູ້ຢ່າງທົ່ວເຖິງ ແລະ ປະຖົມນິເທດການຮຽນ-ການສອນ ເພື່ອເປັນເອກະພາບໃນການຜະລິດການສ້າງແຜນການສອນ; ດ້ານກຽມຄວາມພ້ອມໃນການຮັບນັກຮຽນ ໄດ້ມີການປະສານສະມາຄົມຜູ້ປົກຄອງນັກຮຽນແຈ້ງໃຫ້ບັນດາບ້ານທີ່ຂຶ້ນກັບຄວາມຮັບຜິດຊອບຂອງໂຮງຮຽນນຳພາລູກຫລານມາໂຮງຮຽນໃຫ້ທັນກັບກຳນົດເວລາ ໃນມື້ເປີດສົກຮຽນໃໝ່ ວັນທີ 01 ກັນຍາ 2023 ນີ້.
ຂ່າວ:ສີອຳພອນ
