ແຫລ່ງຂ່າວຈາກ ແຂວງຈໍາປາສັກ ໃຫ້ຮູ້ວ່າ: ຕອນບ່າຍວັນທີ 31 ສິງຫາ 2023, ການນຳແຂວງຈຳປາສັກ ນຳໂດຍ ສະຫາຍ ສະນັ່ນ ສີພາພົມມະຈັນ ຮອງເລຂາພັກແຂວງ, ຫົວໜ້າຄະນະຈັດຕັ້ງແຂວງຈຳປາສັກ, ສະຫາຍ ສົມບູນ ເຮືອງວົງສາ ຄະນະປະຈຳພັກແຂວງ, ຮອງເຈົ້າແຂວງຈຳປາສັກ ໄດ້ ເຂົ້າອວຍພອນ ສະຫາຍ ຫງວຽນ ວັນ ຈຸງ ກົງສຸນໃຫຍ່ ແຫ່ງ ສສ ຫວຽດນາມ ປະຈຳພາກໃຕ້ລາວ, ເນື່ອງໃນໂອກາດວັນຊາດ ສາທາລະນະລັດ ສັງຄົມນິຍົມ ຫວຽດນາມ ຄົບຮອບ 78 ປີ (2/9/1945-2/9/2023).
ໂອກາດນີ້, ສະຫາຍ ສະນັ່ນ ສີພາພົມມະຈັນ ໄດ້ຕາງໜ້າ ຄະນະພັກ-ອົງການປົກຄອງ ຕະຫລອດຮອດ ປະຊາຊົນ ພາຍໃນແຂວງຈຳປາສັກ ສະແດງ ຄໍາອວຍພອນໄຊອັນປະເສີດ ມາຍັງ ສະຫາຍ ຫງວຽນ ວັນ ຈຸງ ກົງສຸນໃຫຍ່ ແຫ່ງ ສສ ຫວຽດນາມ ປະຈຳພາກໃຕ້ລາວ ແລະ ບັນດາສະຫາຍ ໄປຍັງຄະນະບໍລິຫານງານສູນກາງພັກກອມມູນິດຫວຽດນາມ, ລັດຖະບານ ແລະ ປະຊາຊົນຫວຽດນາມ ອ້າຍນ້ອງ, ຊຶ່ງພວກເຮົາມີຄວາມປິຕິຊົມຊື່ນ ແລະ ພາກພູມໃຈເປັນຢ່າງຍິ່ງ ທີ່ເຫັນວ່າຕະຫລອດໄລຍະເວລາ 78 ປີ, ພາຍໃຕ້ການນໍາພາອັນສະຫລາດສ່ອງໃສ ຂອງພັກກອມມູນິດຫວຽດນາມ ທີ່ມີກຽດສະຫງ່າ ໄດ້ນຳພາປະຊາຊົນຫວຽດນາມ ດຳເນີນພາລະກິດປົດປ່ອຍ ແລະ ທ້ອນໂຮມປະເທດຊາດ ຍາດໄດ້ໄຊຊະນະມາສູ່ປະເທດຊາດຢ່າງສົມບູນ ແລະ ດຳເນີນພາລະກິດປ່ຽນໃໝ່ໃນການສ້າງສາພັດທະນາປະເທດຊາດຂອງຕົນຢ່າງວ່ອງໄວ, ມີເສດຖະກິດຂະຫຍາຍຕົວ ແລະ ເຂັ້ມແຂງຢູ່ໃນພາກພື້ນ ແລະ ສາກົນ. ພ້ອມນີ້ ກໍໄດ້ຊົມເຊີຍ ແລະ ຕີລາຄາສູງ ຕໍ່ສະຫາຍກົງສຸນໃຫຍ່ ພ້ອມດ້ວຍຄະນະ ໃນການປະສານງານ, ການພົວພັນຮ່ວມມື, ຄວາມສາມັກຄີພິເສດ ແລະ ການມືຮອບດ້ານ ລະຫວ່າງ ລາວ-ຫວຽດນາມ ໂດຍສະເພາະ ແຂວງຈໍາປາສັກ ກັບ ບັນດາແຂວງ, ນະຄອນ ຂອງ ສສ ຫວຽດນາມ ໃນໄລຍະຜ່ານມາ.
ໂອກາດດຽວກັນນີ້, ທ່ານ ຫງວຽນ ວັນ ຈຸງ ກໍໄດ້ສະແດງຄວາມຂອບໃຈຕໍ່ຄຳອວຍພອນໄຊອັນປະເສີດ ແລະ ຕີລາຄາສູງ ຕໍ່ຄະນະພັກ-ອົງການປົກຄອງແຂວງຈຳປາສັກ ໃນການນຳພາ-ຊີ້ນໍາ ການພັດທະນາເສດຖະກິດ-ສັງຄົມຂອງແຂວງ ແລະ ການພົວພັນຮ່ວມມືລະຫວ່າງແຂວງຈຳປາສັກ ກັບ ບັນດາແຂວງຂອງ ສສ ຫວຽດນາມ, ພ້ອມກັນນັ້ນ, ກໍໄດ້ເນັ້ນຢໍ້າເຖິງສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານ ສອງຊາດ ຫວຽດນາມ-ລາວ ແລະ ຍັງຢັ້ງຍືນວ່າ ຈະສືບຕໍ່ ໃນການປະສານງານການພົວພັນຮ່ວມມື, ປະກອບສ່ວນເຂົ້າໃນການເສີມຂະຫຍາຍມູນເຊື້ອ ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ຂອງສອງຊາດ ລາວ-ຫວຽດນາມ ໂດຍສະເພາະ ແຂວງຈໍາປາສັກ ກັບ ບັນດາແຂວງ, ນະຄອນ ຂອງ ສສ ຫວຽດນາມ ໃຫ້ນັບມື້ກ້າວເຂົ້າສູ່ລວງເລິກ, ອວຍພອນໃຫ້ສາຍພົວພັນແບບພິເສດ ແລະ ການຮ່ວມມືຮອບດ້ານລະຫວ່າງສອງຊາດ ລາວ-ຫວຽດນາມ ຈົ່ງໝັ້ນຄົງ ແລະ ແຕກດອກອອກຜົນ ດີຂຶ້ນໄປເລື້ອຍໆ.
ຂ່າວ: ທັດຊະນະ.
