ທະນາຄານພັດທະນາອາຊີ (ADB) ໄດ້ອອກບົດລາຍງານ ເມື່ອວັນທີ 4 ເມສາ 2023 ໂດຍລະບຸວ່າ: ເສດຖະກິດຂອງ ສປປ ລາວ ຄາດວ່າຈະຂະຫຍາຍຕົວໃນລະດັບປານກາງໃນປີນີ້ ແລະ ປີໜ້າ ໂດຍໄດ້ຮັບແຮງຍູ້ຈາກການຟື້ນຕົວຂອງຂະແໜງບໍລິການ ແລະ ການລົງທຶນຂອງພາກເອກະຊົນ ເນື່ອງຈາກມີການຜ່ອນຄາຍຫຼາຍໆມາດຕະການເພື່ອຄວບຄຸມພະຍາດລະບາດໃນທົ່ວພາກພື້ນ.
ບົດລາຍງານ ການຄາດຄະເນການພັດທະນາຂອງອາຊີ ສະບັບເດືອນເມສາ ປີ 2023 ຄາດຄະເນວ່າ ການເຕີບໂຕ ຂອງລວມຍອດຜະລິດຕະພັນລວມພາຍໃນປະເທດ (GDP) ຂອງ ສປປ ລາວ ຢູ່ໃນລະດັບ 4% ສຳລັບປີນີ້ ແລະ ປີໜ້າ. ການລົງທຶນໃໝ່ໃນຂະແໜງພະລັງງານທົດແທນ ລວມທັງໂຄງການພະລັງງານລົມ ທີ່ມີຂະໜາດ 600 ເມກາວັດ ທີ່ໄດ້ຮັບການສະໜອງທຶນໃນວົງເງິນ 692,55 ລ້ານໂດລາ ແລະ ການເປີດຊາຍແດນຄືນໃໝ່ ຈະເປັນແຮງຍູ້ໃຫ້ແກ່ການຟື້ນຕົວດ້ານເສດຖະກິດ.
ບົດລາຍງານຂອງ ADB ລະບຸວ່າ: ຍ້ອນການສຳເລັດ ການຍົກລະດັບພື້ນຖານໂຄງລ່າງ ຂອງການເຊື່ອມຕໍ່ ແລະ ການເປີດຊາຍແດນຄືນໃໝ່ ລວມທັງ ສາທາລະນະລັດ ປະຊາຊົນ ຈີນ, ຈໍານວນນັກ ທ່ອງທ່ຽວ ສາກົນຄາດວ່າ ຈະເພີ່ມຂຶ້ນສອງເທົ່າເມື່ອທຽບໃສ່ປີຜ່ານມາ ຊຶ່ງຄາດວ່າມີປະມານ 2,6 ລ້ານເທື່ອຄົນ. ການຂົນສົ່ງສິນຄ້າຜ່ານແດນ ຄາດວ່າຈະສືບຕໍ່ຂະຫຍາຍຕົວ ຢ່າງຕໍ່ເນື່ອງ ຊຶ່ງເມື່ອປີ 2022 ຜ່ານມາມີຜູ້ໂດຍສານ 1,3 ລ້ານ ຄົນ ແລະ ສິນຄ້າ 1,9 ລ້ານໂຕນ ໄດ້ຂົນສົ່ງຜ່ານເສັ້ນທາງລົດໄຟ ລາວ-ຈີນ.
ແນວໃດກໍຕາມ ຍັງມີຫຼາຍສິ່ງທ້າທາຍຫຼາຍຢ່າງ ໂດຍສະເພາະຄວາມກົດດັນຂອງອັດຕາເງິນເຟີ້ ຊຶ່ງຈະຍັງຢູ່ໃນລະດັບສູງໃນປີ 2023 ແລະ ຄາດວ່າຈະຢູ່ໃນລະດັບ 16% ກ່ອນຈະຫຼຸດລົງມາຢູ່ໃນລະດັບ 5% ໃນປີ 2024. ລາຄາສິນຄ້າຄາດວ່າຈະເພີ່ມຂຶ້ນ ໂດຍສະເພາະສິນຄ້ານຳເຂົ້າ ແລະ ຄ່າແຮງງານທີ່ເພີ່ມສູງຂຶ້ນ. ການປັບປ່ຽນຍັງຢູ່ໃນແຜນການປັບຂຶ້ນຂອງຄ່າໄຟຟ້າ, ເມື່ອເປັນຄືແນວນັ້ນ, ການບໍລິໂພກພາຍໃນ ແລະ ຕະຫຼາດການຈ້າງງານ ຄາດວ່າຈະຍັງອ່ອນແອ.
ທ່ານ ນາງ ໂຊໂນມິ ທະນາກະ ຫົວໜ້າຫ້ອງການ ADB ປະຈຳ ສປປ ລາວ ໃຫ້ຮູ້ວ່າ: “ ການຟື້ນຕົວທາງດ້ານເສດຖະກິດແມ່ນ ມີທ່າອ່ຽງດີຂຶ້ນ,” ທ່ານຍັງໄດ້ໃຫ້ຮູ້ຕື່ມອີກວ່າ: “ຄວາມກັງວົນຕໍ່ຄວາມກົດດັນຂອງອັດຕາເງິນເຟີ້ ແມ່ນຍັງສູງໃນປີ 2023. ບັນຫາດັ່ງກ່າວ ນີ້ເຮັດໃຫ້ເກີດມີຄວາມສ່ຽງຕໍ່ການດຸ່ນດ່ຽງລະຫວ່າງລາຍຮັບ ກັບລາຍຈ່າຍຂອງຄົວເຮືອນ, ທຸລະກິດ ແລະ ລັດຖະບານ. ສຸມໃສ່ການປະສານສົມທົບດ້ານນະໂຍບາຍໃນການຕອບໂຕ້ ແມ່ນມີຄວາມຈໍາເປັນ ເພື່ອຮັບປະກັນການຟື້ນຕົວຂອງເສດຖະກິດແບບທົ່ວເຖິງ ແລະ ກຽມພ້ອມຮັບມືກັບການປ່ຽນແປງໃນອະນາຄົດ.”
ປັດຈຸບັນ, ປະຊາກອນເກືອບ 2 ສ່ວນ 3 ຂອງປະຊາກອນລາວທັງໝົດ ແມ່ນຢູ່ໃນໄວທີ່ເຮັດວຽກ ຊຶ່ງເປັນແຮງງານໄວໜຸ່ມທີ່ຈະປະກອບສ່ວນເຂົ້າໃນການຜະລິດ ແລະ ການຂະຫຍາຍຕົວທາງເສດຖະກິດ, ແຕ່ຢ່າງໃດກໍຕາມ, ອັດຕາເງິນເຟີ້ສູງ ແລະ ຄ່າແຮງງານທີ່ຕໍ່າ ໝາຍຄວາມວ່າ ຜູ້ອອກແຮງງານຫຼາຍໆຄົນເລືອກທີ່ຈະໄປເຮັດວຽກຢູ່ປະເທດເພື່ອນບ້ານ ຊຶ່ງເຂົາເຈົ້າສາມາດມີລາຍຮັບຫຼາຍກວ່າ.
ລັດຖະບານຈຳເປັນຕ້ອງມີແຜນງານທີ່ຮັດກຸມ ເພື່ອແກ້ໄຂຄວາມສ່ຽງດ້ານເສດຖະກິດມະຫາພາກ ແລະ ສິ່ງທ້າທາຍໃນຕະຫຼາດແຮງງານ ຊຶ່ງມີຄວາມສໍາຄັນຕໍ່ລັດຖະບານ ທີ່ຈະໃຫ້ການສະໜັບສະໜູນໃນການພັດທະນາອຸດສາຫະກໍາພາຍໃນ ໂດຍຜ່ານການປະຕິຮູບລະບຽບການທີ່ປັບປຸງສະພາບແວດລ້ອມການດຳເນີນທຸລະກິດໃຫ້ດີຂຶ້ນກວ່າເກົ່າ.
ຂ່າວ: ຄ. ຄຳປະສິດ
