ຄະນະສະຫະພັນແມ່ຍິງທະນາຄານ ແຫ່ງ ສປປ ລາວ (ທຫລ) ໄດ້ຈັດພິທີປາຖະກະຖາມູນເຊື້ອການກໍາເນີດ, ເຕີບໃຫຍ່ຂະຫຍາຍຕົວຂອງອົງການ ຈັດຕັ້ງສະຫະພັນແມ່ຍິງລາວ ຄົບຮອບ 68 ປີ (20 ກໍລະກົດ 1955-20 ກໍລະກົດ 2023) ຂຶ້ນໃນວັນທີ 4 ສິງຫານີ້ ທີ່ ທຫລ ພາຍໃຕ້ການເປັນປະທານ ແລະ ປາຖະກະຖາຂອງ ທ່ານນາງ ສາຍສະໝອນ ຈັນທະຈັກ ຄະນະບໍລິຫານງານສູນກາງສະຫະພັນແມ່ຍິງລາວ ປະທານຄະນະບໍລິຫານງານສະຫະພັນແມ່ຍິງ ທຫລ, ໃຫ້ກຽດເຂົ້າຮ່ວມຂອງທ່ານນາງ ຂັນແກ້ວ ຫຼ້າມະນີເງົາ ຮອງຜູ້ວ່າການ ທຫລ ຜູ້ຊີ້ນໍາວຽກງານສາມອົງການຈັດຕັ້ງມະຫາຊົນ; ມີຮອງປະທານສະຫະພັນແມ່ຍິງ ແລະ ຕາງໜ້າສາມອົງການ ຈັດຕັ້ງມະຫາຊົນເຂົ້າຮ່ວມ.
ທ່ານນາງ ສາຍສະໝອນ ຈັນທະຈັກ ໄດ້ຍົກໃຫ້ເຫັນຕົ້ນກຳເນີດ, ບົດບາດຄວາມສຳຄັນຂອງແມ່ຍິງລາວໃນພາລະກິດຕໍ່ສູ້ກູ້ຊາດ ແລະຜົນງານການເຄື່ອນໄຫວຕະຫຼອດໄລຍະຜ່ານມາ ໃນຂະບວນການຂອງອົງການຈັດຕັ້ງສະຫະພັນແມ່ຍິງລາວ ເປັນທີ່ເອກອ້າງທະນົງໃຈທີ່ສຸດ ທີ່ແມ່ຍິງລາວບັນດາເຜົ່າໄດ້ເສຍສະຫຼະເລືອດເນື້ອ, ເຫື່ອແຮງ ແລະ ສະຕິປັນຍາຄຽງບ່າຄຽງໄຫຼ່ກັບເພດຊາຍຢ່າງພິລະອາດຫານ, ຍາດເອົາເອກະ ລາດ ແລະ ຜືນແຜ່ນດິນອັນຄົບຖ້ວນຂອງປະເທດລາວເຮົາ. ຫວັງຢ່າງຍິ່ງວ່າຈະເປັນບົດຮຽນອັນດີໃນຫຼາຍດ້ານໃຫ້ແກ່ເອື້ອຍນ້ອງແມ່ຍິງຂອງພວກເຮົາໄດ້ສືບທອດ, ຮ່ຳຮຽນເອົາເປັນແບບຢ່າງ ແລະ ໝູນໃຊ້ເຂົ້າໃນການເຄື່ອນໄຫວວຽກງານທີ່ຕົນຮັບຜິດຊອບໃນຕໍ່ໜ້າ ຖືເອົາການດຳລົງຊີວິດການເມືອງ, ການຕຳນິກໍ່ສ້າງຊ່ວຍເຫຼືອຊຶ່ງກັນ ແລະ ກັນ ຈັດຕັ້ງປະຕິບັດຄຳຂວັນ ແລະ ຂໍ້ແຂ່ງຂັນ 3 ດີທີ່ສູນກາງສະຫະພັນແມ່ຍິງລາວວາງອອກ.
ການປາຖະກະຖາຄັ້ງນີ້ແນໃສ່ເຮັດໃຫ້ສະມາຊິກແມ່ຍິງ ແລະ ສາມອົງການຈັດຕັ້ງມະຫາຊົນມີຄວາມຮັບຮູ້ ແລະ ເຂົ້າໃຈຢ່າງເລິກເຊິ່ງຕໍ່ມູນເຊື້ອ, ການເຕີບໃຫຍ່ຂະຫຍາຍຕົວ ແລະ ຜົນງານການເຄື່ອນໄຫວວຽກງານອັນພົ້ນເດັ່ນໃນແຕ່ລະໄລຍະຂອງອົງການຈັດຕັ້ງສະຫະພັນແມ່ຍິງລາວທີ່ໄດ້ພ້ອມພຽງກັນສຸມທຸກເຫື່ອແຮງ, ສະຕິປັນຍາປະກອບສ່ວນເຂົ້າໃນພາລະກິດຕໍ່ສູ້ປົດປ່ອຍຊາດໃນເມື່ອກ່ອນ ກໍຄືພາລະກິດປົກປັກຮັກສາ ແລະ ສ້າງສາພັດທະນາປະເທດຊາດໃນປັດຈຸບັນ. ພ້ອມທັງຮັບຟັງການລາຍງານສະພາບການເຄື່ອນໄຫວວຽກງານຂອງສະຫະພັນແມ່ຍິງ ທຫລ ປະຈໍາ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2023 ອີກດ້ວຍ.
ຂ່າວ-ພາບ: ຍຸພິນທອງ+ວັນເພັງ
