ພະນັກງານບຳນານກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ(ຖວທ) ພ້ອມສື່ມວນຊົນສູນກາງ ແລະ ທ້ອງຖິ່ນນຳໂດຍ ທ່ານ ດວງຈິດ ສະຫວັດບຸນມີ ອະດີີດຫົວໜ້າບັນນາທິການໃຫຍ່ໜັງສືພິມປະຊາຊົນ ໄດ້ເຂົ້າຢ້ຽມຊົມອະນຸສອນສະຖານປະທານສຸພານຸວົງ ໃນວັນທີ 28 ກໍລະກົດ 2023 ເນື່ອງໃນໂອກາດລະນຶກວັນເກີດ ປະທານ ສຸພານູວົງ ຄົບຮອບ 114 ປີ (13/7/1909-13/7/2023) ໂດຍໄດ້ຮັບການຕ້ອນຮັບຈາກ ທ່ານ ວິໄລທອງ ແກ້ວມະນີວົງ ຮັກສາການຫົວໜ້າອະນຸສອນສະຖານປະທານສຸພານຸວົງ.
ໂອກາດນີ້, ຄະນະດັ່ງກ່າວ ໄດ້ເຂົ້າວາງກະຕ່າດອກໄມ້ຢູ່ຕໍ່ໜ້າຮູບປັ້ນຂອງປະທານສຸພານຸວົງ, ຈາກນັ້ນຄະນະຮັບຜິດຊອບ ກໍໄດ້ນຳພາທ່ຽວຊົມຮູບພາບມູນເຊື້ອທີ່ສ່ອງແສງໃຫ້ເຫັນເຖິງຜົນງານ ແລະ ຄຸນງາມຄວາມດີຂອງປະທານສຸພານຸວົງ ໃນຖານະທີ່ເປັນນັກຮົບຮັກຊາດຮຸ່ນທຳອິດ ທີ່ໄດ້ເອົາຊີວິດຂອງເພິ່ນຜູກພັນກັບການປະຕິວັດຕະຫລອດມາ ໂດຍບໍ່ງໍ້ງ່ຽງຕໍ່ຄວາມລໍາບາກ, ຄວາມເສຍສະຫລະໃດໆ ກະທັ້ງເຖິງບໍ່ຫວາດຫວັ່ນຕໍ່ກັບການຈັບກຸມຄຸມຂັງຂອງສັດຕູ, ຍາມໃດກໍຕໍ່ສູ້ເພື່ອອຸດົມຄະຕິປະຕິວັດອັນສູງສົ່ງ, ເພື່ອຄວາມເປັນເອກະລາດ ແລະ ຄວາມວັດທະນະຖາວອນຂອງປະເທດຊາດ, ເພື່ອອິດສະຫລະພາບ ແລະ ຄວາມຢູ່ດີກິນດີຂອງປະຊາຊົນລາວບັນດາເຜົ່າ.
ທ່ານ ດວງຈິດ ສະຫວັດບຸນມີ ໄດ້ກ່າວວ່າ: ຜ່ານການທ່ຽວຊົມອະນຸສອນສະຖານປະທານສຸພານຸວົງ, ພວກເຮົາຍິ່ງຮັບຮູ້ວ່າ ປະທານສຸພານຸວົງ ແມ່ນຜູ້ນຳທີ່ແສນເຄົາລົບຮັກຂອງປະຊາຊົນລາວບັນດາເຜົ່າ, ມີສວນຮ່ວມໃນການນຳພາກໍ່ຕັ້ງ, ທະນຸບຳລຸງ, ກໍ່ສ້າງພັກ ປປ ລາວ, ກໍ່ສ້າງກຳລັງປະກອບອາວຸດປະຕິວັດ, ຜູ້ນຳພາພາລະກິດຕໍ່ສູ້ກູ້ຊາດແລະ ກໍ່ຕັ້ງລັດສາທາ ລະນະລັດ ປະຊາທິປະໄຕ ປະຊາຊົນລາວ, ເພິ່ນເປັນປະທານສູນກາງແນວລາວອິດສະຫລະ ແລະ ປະທານປະເທດຜູ້ທຳອິດຂອງ ສປປ ລາວ.ໃນສະພາບປະເທດຊາດຂອງພວກເຮົາພາຍໃຕ້ການຊີ້ນຳ ແລະນຳພາຂອງພັກ ປປ ລາວ ມີສັນຕິພາບ, ມີການພັດທະນາຢ່າງຮອບດ້ານ, ຊີວິດການເປັນຢູ່ຂອງປະຊາຊົນລາວບັນດາເຜົ່າດີຂຶ້ນ ແລະ ພວມກ້າວເຂົ້າສູ່ຄົບຮອບ 48 ປີ ແຫ່ງການສະຖາປະນາ ສປປ ລາວ,ພວກເຮົາຍິ່ງມີຄວາມຄິດຮອດຄິດເຖິງການນຳສູງສຸດຂອງປະເທດຊາດ ແລະ ການປະຕິວັດລາວ, ໃນນັ້ນ ກໍລວມມີປະທານສຸພານຸວົງ. ພວກເຮົາພ້ອມແລ້ວຈະສືບຕໍ່ເພີ່ມພູນຄູນສ້າງ ແລະ ຮໍ່າຮຽນເອົາຄຸນສົມບັດສິນທຳປະຕິວັດ ແລະ ແບບແຜນດຳລົງຊີວິດຂອງປະທານສຸພານຸວົງ.
ພ້ອມກັນນີ້, ທ່ານ ດວງຈິດ ສະຫວັດບຸນມີ ຍັງໄດ້ຕາງໜ້າໃຫ້ຜູ້ເຂົ້າຮ່ວມຂຽນຄຳສະດຸດດີ ສະແດງຄວາມຮູ້ບຸນຄຸນ ແລະ ຊົມເຊີຍຕໍ່ຜົນງານການເຄື່ອນໄຫວຕະຫລອດຊີວິດຂອງປະທານສຸພານຸວົງ. ພ້ອມນີ້, ຍັງມອບວັດຖຸປັດໄຈຈຳນວນໜຶ່ງ ໃຫ້ຄະນະຮັບຜິດຊອບໄດ້ນຳໃຊ້ໃນວຽກງານຕື່ມອີກ.
