ແຫລ່ງຂ່າວຈາກ ແຂວງໄຊສົມບູນ ໃຫ້ຮູ້ວ່າ: ວັນທີ 21 ກໍລະກົດ 2023 ຜ່ານມາ, ທ່ານ ພັນຄໍາ ວິພາວັນ ອະດີດນາຍົກລັດຖະມົນຕີ ພ້ອມດ້ວຍພັນລະຍາ ເຄື່ອນໄຫວຢ້ຽມຢາມ ແລະ ເຮັດວຽກ ຢູ່ແຂວງໄຊສົມບູນ ໂດຍໄດ້ຮັບການຕ້ອນຮັບຈາກ ທ່ານ ພອຍຄຳ ຮຸ່ງບຸນຍວງ ເຈົ້າແຂວງໄຊສົມບູນ, ພ້ອມດ້ວຍຄະນະນຳຂອງແຂວງ.
ການມາຢ້ຽມຢາມແຂວງໄຊສົມບູນໃນຄັ້ງນີ້, ກໍເພື່ອເຂົ້າຮ່ວມພິທີການມອບ-ຮັບ ໂຄງການກໍ່ສ້າງ ໂຮງຮຽນມັດທະຍົມສົງ ແຂວງໄຊສົມບູນ, ພ້ອມທັງໄປຢ້ຽມຢາມພື້ນຖານເສດຖະກິດ, ວັດທະນະທຳ-ສັງຄົມ ແລະ ເຂົ້າຢ້ຽມຊົມສວນສາທະລະນະຖ້ຳເຈົ້າອະນຸວົງ ຊຶ່ງສະຖານທີ່ແຫ່ງນີ້ເປັນບ່ອນທ່ອງທ່ຽວທາງທໍາມະຊາດ ທີ່ຕິດພັນກັບຮ່ອງຮອຍປະຫວັດສາດທີ່ສຳຄັນຂອງຊາດທີ່ເລົ່າຂານ ກັນວ່າ ເຈົ້າອະນຸວົງ ໃຊ້ເປັນບ່ອນຫລົບລີ້ສັດຕູ ແລະ ນໍພາກອງທັບມາຈັ້ງທ່າຢູ່ສະຖານທີ່ແຫ່ງ ເພື່ອຕໍ່ສູກູ້ຊາດໃນສະໄໝສະຫຍາມຮຸກຮານລາວ, ພ້ອມທັງໄປກາບໄຫວ້ຫໍຫລັກເມືອງ ທີ່ເປັນມິ່ງຂວັນຂອງຊາວໄຊສົມບູນ ແລະ ທ່ຽວຊົມຈຸດຊົມວິວຂອງ ສະຖານີວິທະຍຸ-ໂທລະພາບ ແຂວງ ທີ່ໄດ້ຮັບການພັດທະນາໃຫ້ເປັນແຫລ່ງທ່ອງທ່ຽວທາງທຳມະຊາດທີ່ສຳຄັນຂອງແຂວງ.
ຂະນະດຽວກັນກໍເພື່ອເປັນການສົ່ງເສີມວຽກງານການທ່ອງທ່ຽວ ໃຫ້ເຕີບ ໃຫຍ່ຂະຫຍາຍຕົວຢ່າງຕໍ່ເນື່ອງ, ທັງປະກອບສ່ວນສໍາຄັນເຂົ້າໃນການພັດທະນາເສດຖະກິດ-ສັງຄົມ ຂອງແຂວງ ຕາມ 5 ທ່າແຮງທີ່ວາງໄວ້ ໃຫ້ປະກົດຜົນເປັນຈິງ.
