ໃນໂອກາດສະເຫລີມສະຫລອງ ວັນສ້າງຕັ້ງອົງການສະຫະພັນແມ່ຍິງລາວຄົບຮອບ 68 ປີ ( 20 ກໍລະກົດ 1955-20 ກໍລະກົດ 2023 ) ນີ້, ທ່ານ ນາງ ພະນົມພອນ ຢ້ຽມພະບູ່ ໃນນາມປະທານນັກທຸລະກິດໜຸ່ມ ປະຈໍາແຂວງຄໍາມ່ວນໄດ້ກ່າວສະແດງຄວາມຮູ້ສຶກຂອງຕົນເອງຕໍ່ກັບວັນດັ່ງກ່າວວ່າ : ວັນທີ 20 ກໍລະກົດ ເປັນວັນທີ່ມີຄວາມໝາຍສໍາຄັນທາງດ້ານປະຫວັດສາດຂອງຊາດລາວເຮົາ, ພັກ ແລະ ລັດຖະບານລາວ ໄດ້ໃຫ້ຄວາມສໍາຄັນຕໍ່ແມ່ຍິງ ແລະ ໃຫ້ໂອກາດແມ່ຍິງໄດ້ມີສ່ວນຮ່ວມໃນພາລະກິດຕ່າງໆໃນການສ້າງສາພັດທະນາປະເທດຊາດ, ແມ່ຍິງລາວກໍ່ມີຄວາມຮູ້, ຄວາມສາມາດບໍ່ດ້ອຍໄປກວ່າຊາດອື່ນໆຢູ່ໃນໂລກ, ແມ່ຍິງລາວ ໄດ້ມີບົດບາດສໍາຄັນ, ມີຕໍາແໜ່ງ, ໜ້າທີ່ໃນການບໍລິຫານບໍ່ວ່າຈະຢູ່ໃນສາຍພັກ-ລັດ, ສາຍບໍລິຫານທຸລະກິດ, ສາມາດນໍາພາທຸລະກິດຂອງຕົນເອງໃຫ້ປະສົບຜົນສໍາເລັດໃນຫລາຍດ້ານ ແລະ ຖືໄດ້ວ່າ ແມ່ຍິງລາວຄືແຮງຂັບເຄື່ອນການພັດທະນາ ໄປຄຽງຄູ່ກັບເພດຊາຍ.
ທ່ານນາງ ນາງ ພະນົມພອນ ຢ້ຽມພະບູ່ ຍັງໃຫ້ຮູ້ອີກສ່າ: ປັດຈຸບັນນ, ຂ້າພະເຈົ້າແມ່ນໄດ້ຮັບການມອບໝາຍຈາກຂັ້ນເທິງໃຫ້ດໍາລົງຕໍາແໜ່ງເປັນປະທານນັກທຸລະກິດໜຸ່ມແຂວງຄໍາມ່ວນ, ທັງເປັນຄະນະບໍລິຫານງານສະຫະພັນແມ່ຍິງແຂວງ, ດ້ານທຸລະກິດສ່ວນຕົວແມ່ນເປັນປະທານບໍລິສັດພະນົມພອນການຄ້າ ຂາເຂົ້າ-ຂາອອກ ຈໍາກັດ, ມີ 6 ບໍລິສັດ . ປະຈຸບັນຖືວ່າໄດ້ປະສົບຜົນສໍາເລັດໃນການນໍາພາທຸລະກິດກ້າວໄປສູ່ອັນລະດັບຕົ້ນໆຂອງແຂວງ ແລະ ຂ້າພະເຈົ້າມີວັນນີ້ໄດ້ຍ້ອນມີພັກນໍາພາ-ຊີ້ທິດເຍືອງທາງໃນການບໍລິຫານທຸລະກິດ ໃຫ້ໄປຕາມເສັ້ນທາງທີ່ຖືກຕ້ອງຕາມລະບຽບກົດໝາຍ, ມີຈັງຫວະເຕີບໃຫຍ່ຂະຫຍາຍຕົວ. ຜ່ານມາທາງບໍລິສັດແມ່ນໄດ້ປະກອບສ່ວນຊ່ວຍເຫລືອສັງຄັມ ເປັນຕົ້ນ ກອງປະຊຸມ ຫລື ມີກິດຈະກໍາໃດໜຶ່ງກໍໄດ້ປະກອບສ່ວນດ້ວຍດີຕະຫລອດມາ . ພິເສດ ໄລຍະການແພ່ລະບາດຂອງພະຍາດໂຄວິດ-19 ຢູ່ແຂວງຄໍາມ່ວນ ຂ້າພະເຈົ້າໄດ້ປະກອບສ່ວນດ້ານສະຖານທີ່ ໂດຍໄດ້ມອບຕະຫລາດພະນົມພອນໃຫ້ເປັນສູນກັກ ກັນຜູ້ຕິດພະຍາດໂຄວິດ 19 ແລະ ໃນຕໍ່ໜ້າກໍຈະສືບຕໍ່ປະກອບສ່ວນທາງສັງຄົມ ຕື່ມອີກ.
ໃນໂອກາດນີ້, ທ່ານ ນາງ ພະນົມພອນ ຢ້ຽມພະບູ່ ຍັງໄດ້ສະເໜີມາຍັງພາກລັດ ຊ່ວຍເຫລືອຊຸກຍູ້ໃນການຊອກຫາແຮງງານ ເນື່ອງຈາກປັດຈຸບັນ, ທາງບໍລິສັດແມ່ນພົບບັນຫາການຂາດແຮງງານ ໂດຍສະເພາະພະນັກງານທີ່ມີທັກສະຄວາມຮູ້ດ້ານພາສາຕ່າງປະເທດ ແລະ ໃນໜໍ່ໆນີ້ພວກເຮົາຈະໄດ້ຂະຫຍາຍທຸລະກິດເປີດຮ້ານສັບພະສິນຄ້າ ໂດຍຈະມີການເປີດຮັບສະໝັກພະນັກງານແຕ່ແຮງງານບໍ່ມີ ແລະ ຊ່ວຍໃນການແກ້ໄຂບັນຫາຄ່າເງິນຕາທີ່ນັບມື້ນັບສູງ ເຊິ່ງໄດ້ສົ່ງຜົນກະທົບຕໍ່ການດໍາເນີນທຸລະກິດຂອງຜູ້ປະກອບການລວມ ເຖິງຄ່າຄອງຊີບຂອງພະນັກງານ, ທະຫານ, ຕໍາຫລວດ ແລະ ພໍ່ແມ່ປະຊາຊົນ.
ຂ່າວ : ມະນີວັນ
