ພິທີສະເຫລີມສະຫລອງວັນສ້າງຕັ້ງ ສະຫະພັນແມ່ຍິງລາວ ຄົບຮອບ 68 ປີ (20 ກໍລະກົດ 1955 -20 ກໍລະກົດ 2023 ) ພາຍໃຕ້ຫົວຂໍ້: ການສ້າງຄວາມເຂັ້ມແຂງໃຫ້ແມ່ຍິງ ທາງດ້ານເສດຖະກິດໃນໄລຍະໄໝ່, ຈັດຂື້ນ ວັນທີ 19 ກໍລະກົດ 2023 ນີ້ຢູ່ທີ່ສະໂມສອນ ແຂວງ ຄໍາມ່ວນ ໂດຍການໃຫ້ກຽດເຂົ້າຮ່ວມຂອງ ທ່ານ ວັນໄຊ ພອງສະຫວັນ ກໍາມະການສູນກາງພັກ, ເລຂາພັກແຂວງ, ເຈົ້າແຂວງໆຄໍາມ່ວນ, ມີການນໍາຂອງແຂວງ, ຫົວໜ້າ, ຮອງຫົວໜ້າພະແນກການ, ພະນັກງານປະຕິວັດອາວຸໂສບຳນານ, ຄອບຄົວການນໍາຂອງແຂວງ, ຄະນະບໍລິຫານງານສະຫະພັນແມ່ຍິງແຂວງ, ຄະນະໜ່ວຍ, ຮາກຖານສະຫະພັນແມ່ຍິງທັງພາກລັດ ແລະ ລັດວິສາຫະກິດ ອ້ອມຂ້າງແຂວງເຂົ້າຮ່ວມ.
ໃນໂອກາດດັ່ງກ່າວ ທ່ານ ນາງ ກຽນຕາ ວັນມະນາ ປະທານສະຫະພັນແມ່ຍິງແຂວງ ໄດ້ລາຍງານຜົນງານການເຄື່ອນໄຫວທີ່ພົ້ນເດັ່ນ ຂອງສະຫະພັນແມ່ຍິງແຂວງໃນໄລຍະ 1 ປີເຄິ່ງ ຜ່ານມາ ທີ່ຄະນະນໍາສະຫະພັນແມ່ຍິງແຕ່ລະຂັ້ນໄດ້ນໍາພາສະມາຊິກສະຫະພັນແມ່ຍິງ, ເອື້ອຍນ້ອງແມ່ຍິງບັນດາເຜົ່າ ຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ X ຜູ້ແທນແມ່ຍິງແຂວງຄໍາມ່ວນ, ແຜນພັດທະນາແມ່ຍິງແຂວງ (2020-2024) ເຊິ່ງປະກອບມີ 9 ແຜນງານ, 24 ໂຄງການ; ຈັດຕັ້ງປະຕິບັດ ສອງວາລະແຫ່ງຊາດຂອງແມ່ຍິງແຂວງ, ແຜນພັດທະນາພະນັກງານເພດຍິງ ແຂວງຄໍາມ່ວນ ແລະ ບັນດາແຜນດໍາເນີນງານ ເພື່ອຄວາມສະເໝີພາບຍິງ-ຊາຍ, ເພື່ອແມ່ ແລະ ເດັກ, ປ້ອງກັນ ແລະ ລຶບລ້າງການໃຊ້ຄວາມຮຸນແຮງຕໍ່ແມ່ຍິງ ແລະ ເດັກ (2021-2025) ເຊິ່ງໄດ້ຮັບການຈັດຕັ້ງປະຕິບັດມີຜົນສໍາເລັດໃນຫຼາຍດ້ານ.
ໂອກາດດຽວກັນນີ້ ແມ່ ສີມມາ ພົງສະຫວັດ ອາດີດປະທານສະຫະພັນແມ່ຍິງ ແຂວງຄໍາມ່ວນໄດ້ປາຖະກະຖາເລົ່າປະຫວັດມູນເຊື້ອວັນສ້າງຕັ້ງຂອງອົງການສະຫະພັນແມ່ຍິງລາວ ຄົບຮອບ 68 ປີ ທີ່ໄດ້ຍົກໃຫ້ເຫັນເຖິງປະຫວັດມູນເຊື້ອການກຳເນີດເຕີບໃຫຍ່ຂະຫຍາຍຕົວຂອງອົງການຈັດຕັ້ງສະຫະ ພັນແມ່ຍິງລາວ ໃນແຕ່ລະໄລຍະ, ໂດຍສະເພາະແມ່ນບັນດາ ຜົນງານຂອງແມ່ຍິງບັນດາເຜົ່າໃນສະໄໝຕໍ່ສູ້ກູ້ຊາດ ທີ່ໄດ້ອຸທິດຕົນເພື່ອພາລະກິດຕໍ່ສູ້ປົດປ່ອຍຊາດຢ່າງສົມກຽດ ແລະ ການປະກອບສ່ວນຂອງແມ່ຍິງ ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດໃນປະຈຸບັນ, ພ້ອມດຽວກັນ ຍັງໄດ້ຍົກໃຫ້ເຫັນປະຫວັດ ມູນເຊື້ອການເຕີບໃຫຍ່ຂະຫຍາຍຕົວ ຂອງອົງການຈັດຕັ້ງສະຫະພັນແມ່ຍິງ ແຂວງຄໍາມ່ວນ.
ທ່ານ ວັນໄຊ ພອງສະຫວັນ ເຈົ້າແຂວງໆຄໍາມ່ວນ ໄດ້ມີຄໍາເຫັນ ແລະ ເນັ້ນໜັກໃນພິທີຄັ້ງນີ້ວ່າ : ໃຫ້ທຸກພາກສ່ວນ ອົງການຈັດຕັ້ງສັງຄົມ ເອົາໃຈໃສ່ເສີມຂະຫຍາຍມູນເຊື້ອອັນດີງາມຂອງແມ່ຍິງລາວເປັນຕົ້ນ ມູນເຊື້ອອົງອາດກ້າຫານຂອງແມ່ຍິງ ໃນໄລຍະການຕໍ່ສູ້ກູ້ຊາດ, ມູນເຊື້ອດຸໜັ່ນຂະຫຍັນພຽນໃນການດໍາລົງຊີວິດຂອງເອື້ອຍນ້ອງແມ່ຍິງ ເພີ່ມທະວີການສຶກສາອົບຮົມດ້ານການເມືອງ-ແນວຄິດ, ລະບຽບກົດໝາຍ, ນິຕິກໍາຕ່າງໆ,ພາລະບົດບາດຂອງແມ່ຍິງ ໃຫ້ທຸກພາກສ່ວນຂອງສັງຄົມ ໄດ້ຮັບຮູ້ຢ່າງກວ້າງຂວາງ. ສືບຕໍ່ປັບປຸງກົງຈັກການຈັດຕັ້ງແມ່ຍິງແຕ່ລະຂັ້ນໃຫ້ເຂັ້ມແຂງ ຕໍ່ເນື່ອງ, ຄຽງຄູ່ກັນນັ້ນຕ້ອງໄດ້ສົ່ງເສີມພູມປັນຍາຂອງແມ່ຍິງ ຕາມທ່າແຮງ ເພື່ອເຮັດແນວໃດສ້າງໃຫ້ເຂົາເຈົ້າມີຄວາມເຂັ້ມແຂງ. ເພີ່ມທະວີບົດບາດການນໍາພາຂອງເອື້ອຍນ້ອງແມ່ຍິງ ເຂົ້າໃນທຸກຂະບວນການຈັດຕັ້ງສັງຄົມ ໃຫ້ແມ່ຍິງໄດ້ມີສ່ວນຮ່ວມໃນການປະກອບສ່ວນ ສ້າງສາພັດທະນາປະເທດຊາດ ທີ່ສໍາຄັນກໍ່ຄືເພີ່ມທະວີບົດບາດຄວາມສາມັກຄີ ຂອງທົ່ວປວງຊົນໃຫ້ມີຄວາມໜັກແໜ້ນເຂັ້ມແຂງ, ນອກນັ້ນ ຍັງຮຽກຮ້ອງໃຫ້ເປັນເຈົ້າການເອົາໃຈໃສ່ໃນການປ້ອງກັນການລະບາດຂອງພະຍາດໄຂ້ຍຸງລາຍ ທີ່ແຂວງພວກເຮົາກໍາລັງປະເຊີນໃນປະຈຸບັນ ລວມເຖິງພະຍາດລະດູການທີ່ອາດຈະເກີດຂຶ້ນ.
ພາຍໃຕ້ບັນຍາກາດຂອງການສະເຫຼີມສະຫຼອງບັນດາຜູ້ເຂົ້າຮ່ວມ ໄດ້ຮັບຊົມການສະແດງສິນລະປະ : ບົດຟ້ອນວິຖີຊີວິດເຜົ່າຜູ້ໄທ ຜ້າຝ້າຍລາວ ແລະ ບົດຟ້ອນແມ່ຍິງ 3 ດີ, ທີ່ສະແດງໂດຍ ນ້ອງນັກຮຽນ ແລະ ຄະນະແມ່ສາຍບຸນ ເຊິ່ງໄດ້ສ້າງບັນຍາກາດ ແລະ ຄວາມຟົດຟື້ນໃຫ້ແກ່ຜູ້ມາຮ່ວມໃນງານດ້ວຍຄວາມເບີກບານມ່ວນຊື່ນ.
