ພິທີເປີດການນຳໃຊ້ ສະໜາມບານເຕະຫຍ້າທຽມ ແລະ ຮ້ານອາຫານ ເບ ສະຫວັນ ເອັຟຊີ ໄດ້ຈັດຂຶ້ນວັນທີ 20 ກໍລະກົດ 2023 ຢູ່ບ້ານຄໍາສະຫວາດ ເມືອງໄຊເສດຖາ ນະ ຄອນຫຼວງວຽງຈັນ (ນວ) ໂດຍມີ ທ່ານ ພູວົງ ວົງຄຳຊາວ ຮອງເຈົ້າຄອງ ນວ ທ່ານ ເດດສົງຄາມ ທໍາມະວົງ ເຈົ້າເມືອງສີສັດຕະນາກ ປະທານສະຫະພັນບານເຕະ ນວ ທ່ານ ວິລະວັນ ບຸນສຸກໄທ ຫົວໜ້າກົມກີລາມວນຊົນ ພະລະ ແລະ ສິ ລະປະສຶກສາ ກະຊວງສຶກສາທິການ ແລະ ກີລາ ມີບັນດາທ່ານການນຳພັກ-ລັດ ແລະ ແຂກຖືກເຊີນ ເຂົ້າຮ່ວມ.
ທ່ານ ບຸນມີ ຫຼ່ຽມໄຊຍະຈັກ ປະທານກຸ່ມບໍລິສັດ ເບ ສະ ຫວັນ ກຣຸບ ທັງເປັນປະທານສະຫະພັນບານເຕະຄົນພິ ການຕາ ນວ ແລະ ປະທານສະຫະພັນບານເຕະຄົນພິການຕາແຫ່ງຊາດ ກ່າວວ່າ: ສະໜາມແຫ່ງນີ້ ໄດ້ເລີ່ມກໍ່ສ້າງແຕ່ວັນທີ 6 ກໍລະກົດ 2022 ແລະ ສຳເລັດໃນການກໍ່ສ້າງ 100% ໃນວັນທີ 20 ກໍລະກົດ 2023 ຈຸດປະສົງ ກໍຍ້ອນຈິດໃຈຂອງຂ້າພະເຈົ້າເອງ ແລະ ຄອບຄົວມີຄວາມຮັກມັກໃນການສົ່ງເສີມສຸຂະພາບດ້ວຍການຫຼິ້ນກີລາເພື່ອຫ່າງໄກສິ່ງເສບຕິດ ແລະ ສ້າງໃຫ້ສຸຂະພາບແຂງແຮງ ທັງເປັນການປຸກລະດົມໃຫ້ອານຸຊົນ ເຍົາວະຊົນ ແລະ ຊາວໜຸ່ມ ພະນັກງານ ທະຫານ ຕຳຫຼວດ ພໍ່ແມ່ປະຊາຊົນ ໄດ້ມາອອກກຳລັງກາຍ ດ້ວຍຮູບແບບກີລາບານເຕະ ທີ່ສະໜາມກີລາແຫ່ງນີ້ ແລະ ເປັນການປະກອບສ່ວນໃຫ້ແກ່ສັງຄົມ ກໍຄືປະເທດຊາດ ໃນການສົ່ງເສີມສ້າງຊັບພະຍາກອນມະນຸດ ຜູ້ທີ່ມີພອນສະຫວັນດ້ານກີລາບານເຕະ ໃຫ້ເຕີບໃຫຍ່ຂະຫຍາຍຕົວເປັນວົງກວ້າງ ເພື່ອຊຸກຍູ້ສົ່ງເສີມນັກກີລາປົກກະຕິ ແລະ ຄົນພິການ ໃຫ້ມີການເຄື່ອນໄຫວສະເໜີພາບ ດ້ວຍຮູບການເຝິກແອບ ເຝິກຊ້ອມ ເຂົ້າໃນສະໂມສອນຂອງພວດເຮົາ ເພື່ອຄັດເລືອກເອົານັກກີລາ ຜູ້ດີເດັ່ນເຂົ້າຮ່ວມໃນລະດັບຕ່າງໆ ເຊັ່ນ:ລະດັບຂັ້ນບ້ານ ຂັ້ນເມືອງ ຂັ້ນນະຄອນຫຼວງ ແລະ ລະດັບຊາດ ເພື່ອຮ່ວມແຂ່ງຂັນໃນລະດັບພາກພື້ນ ອານຸພາກພື້ນ ແລະ ສາກົນ.
ການເປີດເດີ່ນເຕະບານແຫ່ງນີ້ກໍເປັນການປະກອບສ່ວນສໍາຄັນໃນການສົ່ງເສີມໃຫ້ປະຊາຊົນໃນເຂດບ້ານຄຳສະ ຫວາດ ໄດ້ມີວຽກເຮັດງານທຳ ເປັນຕົ້ນແມ່ນໄດ້ຮັບເອົາກຳມະການຕັດສິນ ແລະ ອຶ່ນໆ ເພື່ອມາປະກອບອາຊີບຢູ່ໃນສະໜາມກີລາແຫ່ງນີ້ ເພື່ອສ້າງລາຍຮັບ ແກ້ໄຂຊີວິດການເປັນຢູ່ຂອງພໍ່ແມ່ປະຊາຊົນ.
…………………………………………..
