ເຂດພັດທະນາກວມລວມໄຊເສດຖາເປັນເຂດໜຶ່ງທີ່ນອນໃນແຜນຍຸດທະສາດ ຂໍ້ລິເລີ່ມ “ໜຶ່ງແລວ ໜຶ່ງເສັ້ນທາງ”ເປັນເຂດພັດທະນາທີ່ໄດ້ຮັບຄວາມເອົາໃຈໃສ່ຈາກລັດຖະບານທັງສອງປະເທດ ພ້ອມນັ້ນເຂດດັ່ງກ່າວຍັງໄດ້ໃຫ້ຄວາມສໍາຄັນແກ່ວຽກງານໂຄສະນາ ເພື່ອໃຫ້ນັກລົງທຶນໄດ້ເຂົ້າເຖິງບັນດານະໂຍບາຍຕ່າງໆໄດ້ຢ່າງທັນການ ແລະ ຖືກຕ້ອງ ແລະ ພາຍຫຼັງທີ່ໄດ້ເປີດນຳໃຊ້ທາງລົດໄຟລາວ-ຈີນ ໄດ້ສົ່ງຜົນໃຫ້ການດຶງດູດການລົງທຶນໃນເຂດພັດທະນາກວມລວມໄຊເສດຖາຄືກຄື້ນຂຶ້ນ ສະແດງໃຫ້ເຫັນໃນປີ 2023 ວາງແຜນດຶງດູດການລົງທຶນພຽງ 15 ບໍລິສັດ ແຕ່ໃນເຄິ່ງປີ 2023 ສາມາດດຶງດູດການລົງທຶນໄດ້ 21 ບໍລິສັດ ເກີນແຜນທີ່ວາງໄວ້.
ທ່ານ ຫຼີຢີງຈົ່ງ ຮອງອຳນວຍການບໍລິສັດຮ່ວມທຶນລາວ-ຈີນ ຈຳກັດ ໄດ້ໃຫ້ສຳພາດເນື່ອງໃນໂອກາດທີ່ ສື່ມວນຊົນລາວ-ຈີນໄດ້ລົງໄປສຳພາດຕາມທາງລົດໄຟ ລາວ-ຈີນ ໃນຫົວຂໍ້ ໝູ່ເພື່ອນໜຶ່ງແລວໜຶ່ງເສັ້ນທາງ ໃນວັນທີ 17 ກໍລະກົດ 2023 ວ່າ: ເຂດພັດທະນາກວມລວມໄຊເສດຖາໄດ້ລົງທຶນ ແລະ ກໍ່ສ້າງໂດຍກຸ່ມບໍລິສັດລົງທຶນກໍ່ສ້າງແຂວງຢຸນນານ ແລະ ອົງການປົກຄອງ ນະຄອນຫຼວງວຽງຈັນ ໃນປີ 2010 ເປັນໂຄງການຮ່ວມມືທີ່ລັດຖະບານຈີນ ແລະ ລາວ ໄດ້ຮ່ວມກັນກໍານົດເຂົ້າໃນແຜນຍຸດທະສາດ “ໜຶ່ງແລວ ໜຶ່ງເສັ້ນທາງ” ຜ່ານຄວາມມຸ້ງໝັ້ນ ແລະ ພັດທະນາມາຫຼາຍປີ ປັດຈຸບັນເຂດດັ່ງກ່າວໄດ້ສໍາເລັດການກໍ່ສ້າງໄລຍະທີໜຶ່ງຈໍານວນ 400 ເຮັກຕາ ໄດ້ກາຍເປັນເຂດພັດທະນາທີ່ມີພື້ນຖານໂຄງລ່າງສະດວກສະບາຍ ແລະ ປອດໄພ ພ້ອມນັ້ນມີຫົວໜ່ວຍວິສາຫະກິດທີ່ໄດ້ເຊັນສັນຍາລົງທຶນທັງໝົດ 128 ບໍລິສັດ ໃນນີ້ມີ 64 ບໍລິສັດ ໄດ້ເລີ່ມທໍາການຜະລິດແລ້ວ ໂດຍເປັນນັກລົງທຶນມາຈາກສປ ຈີນ ໄທ ຍີ່ປຸ່ນ ແລະ ປະເທດອື່ນໆລວມ 8 ປະເທດ ໃນນີ້ປະກອບມີ ສໍານັກງານໃຫຍ່ຂອງບໍລິສັດທາງລົດໄຟລາວ-ຈີນ ກຸ່ມບໍລິສັດຄວາມຫວັງໃໝ່ ກຸ່ມບໍລິສັດ ໂຮຢາ ລາວ ຈໍາກັດ ບໍລິສັດ ລາວພັນທະມິດຟາມ ກຣຸບ ຈໍາກັດ ບໍລິສັດ ເປ້ເຕີເຄື່ອງນຸ່ງຫົ່ມ ລາວ ຈໍາກັດ ລວມມີແຮງງານເຖິງ 6.000 ຄົນ ພາຍຫຼັງບໍລິສັດດັ່ງກ່າວເຂົ້າມາທໍາການຜະລິດສາມາດສ້າງມູນຄ່າການຜະລິດໄດ້ເຖິງ 1,8 ຕື້ໂດລາສະຫາລັດ ແລະ ຄາດວ່າຈະສາມາດສ້າງວຽກເຮັດງານທໍາໄດ້ຫຼາຍກວ່າ 10.000 ຄົນ.
ສຳລັບການກໍ່ສ້າງໄລຍະທີ 2 ແມ່ນໄດ້ລິເລີ່ມກໍ່ສ້າງຕາມແຜນການສ້າງເມືອງສົ່ງເສີມອຸດສາຫະກຳ ແລະ ອຸດສາຫະກຳສົ່ງເສີມຕົວເມືອງ ກໍຄືການສ້າງຕົວເມືອງໃໝ່ຂອງນະຄອນຫຼວງວຽງຈັນຢູ່ພາຍໃນເຂດພັດທະນາດັ່ງກ່າວເຊິ່ງໃນເບື້ອງຕົ້ນແມ່ນໄດ້ນຳໃຊ້ເນື້ອທີ່ 10 ເຮັກຕາ ໄດ້ກໍ່ສ້າງເຊັ່ນ: ໂຮງແຮມ ສູນການຄ້າ ແລະ ວຽກອື່ນໆອີກຈຳນວນໜຶ່ງ ແລະ ຈະພັດທະນາເນື້ອທີ່ເພີ່ມຕື່ມ ເຊິ່ງຈະສູ້ຊົນສ້າງໃຫ້ສຳເລັດໃນປີ 2030-2035 ແຕ່ກໍ່ຂຶ້ນກັບການດຶງດູດການລົງທຶນຖ້າມີນັກລົງທຶນໃຫ້ຄວາມສົນໃຈມາລົງທຶນຫຼາຍໂຄງການກໍ່ສ້າງເມືອງ ໃໝ່ກໍ່ອາດຈະສຳເລັດໄວກ່ອນກຳນົດ ເຊິ່ງພາຍຫຼັງທີ່ໄດ້ເປີດນຳໃຊ້ເສັ້ນທາງລົດໄຟລາວ-ຈີນໄດ້ສົ່ງຜົນໃຫ້ການດຶງດູດການລົງທຶນໃນເຂດຂອງພວກເຮົາມີຄວາມຄືກຄື້ນຂຶ້ນ ຕາມແຜນການທີ່ວາງໄວ້ໃນປີ 2023 ວາງແຜນດຶງດູດນັກລົງທຶນໃນຈຳນວນ 15 ບໍລິສັດ ແຕ່ຕົວຈິງນັບແຕ່ເດືອນມັງກອນ ຫາ ເດືອນກໍລະກົດ 2023 ສາມາດດຶງດູດການລົງທຶນໄດ້ສຳເລັດແລ້ວ 21 ບໍລິສັດເຊິ່ງເກີນແຜນທີ່ກຳນົດໄວ້ນັ້ນກໍຍ້ອນນັກລົງທຶນເຫັນໄດ້ການຂົນສົ່ງສິນຄ້າແມ່ນມີຄວາມສະດວກຂຶ້ນຜ່ານລົດໄຟລາວ-ຈີນ.
ທ່ານ ຫຼີຢີງຈົ່ງໄດ້ກ່າວຕື່ມວ່າ: ປັດຈຸບັນບັນດາບໍລິສັດໃນເຂດຂອງພວກເຮົາໄດ້ເປີດດຳເນີນການຜະລິດແມ່ນໄດ້ນຳໃຊ້ແຮງງານລາວກວມ 90% ແລະ ອີກ 10%ແມ່ນໄດ້ນຳໃຊ້ວິຊາການຕ່າງປະເທດເພື່ອມາເຝິກອົບຮົມໃຫ້ແຮງງານລາວຖ້າແຮງງານລາວເກີດຄວາມຊຳນານແມ່ນຈະຫັນມານຳໃຊ້ແຮງງານລາວ 100% ແລະ ກໍຍັງມີຫຼາຍບໍລິສັດທີ່ຍັງມີຄວາມຕ້ອງການແຮງງານຫຼາຍພັນຄົນເຂົ້າມາເຮັດວຽກໃນເຂດດັ່ງກ່າວ ຖ້າວ່າທ່ານໃດ ຫຼື ບຸກຄົນໃດຕ້ອງການເຮັດວຽກກໍສາມາດເຂົ້າມາພົວພັນໄດ້ຢູ່ໃນເຂດຂອງພວກເຮົາ.
