ໃນວັນທີ 14 ກໍລະກົດ 2023 ນີ້, ຄະນະຜູ້ແທນພັກ ປປ ລາວ ນໍາໂດຍ ສະຫາຍ ວາລະໄຊ ເລັ່ງສະຫວັດ ຮອງຫົວໜ້າຄະນະພົວພັນຕ່າງປະເທດສູນກາງພັກ, ພ້ອມຄະນະ ໄດ້ເຂົ້າຮ່ວມກອງປະຊຸມໂຕະມົນ ຜ່ານວີດີໂອທາງໄກ ພາຍໃຕ້ຫົວຂໍ້ “ການພົວພັນແລກປ່ຽນ ລະຫວ່າງ ບັນດາອະລິຍະທຳ: ບັນດາປະເທດຢູ່ພາຍໃນທະວີບ ແລະ ໝູ່ເກາະ” ໂດຍການເປັນເຈົ້າພາບຂອງພັກ ຣັດເຊຍເອກະພາບ ໂດຍມີຄະນະຜູ້ແທນຈາກ 4 ພັກການເມືອງຄື: ພັກກອມມູນິດຫວຽດນາມ, ພັກປະຊາຊົນປະຕິວັດລາວ, ພັກປະຊາຊົນກຳປູເຈຍ ແລະ ພັກໂກນກາ ຈາກອິນໂດເນເຊຍ ເຂົ້າຮ່ວມ. ກອງປະຊຸມຄັ້ງນີ້, ຈັດຂຶ້ນໂດຍຖືເປັນກິດຈະກຳໜຶ່ງຂອງແນວຄິດລິເລີ່ມ ກຳຈັດກາ (Kamchatka) ເຊິ່ງເປັນ “ເທສະການມາຣາທອນ ກ່ຽວກັບວັດທະນະທຳ” ຄັ້ງທີ 6.
ໃນກອງປະຊຸມ, ຫົວໜ້າຄະນະຜູ້ແທນພັກ ປປ ລາວ ໄດ້ປະກອບຄຳເຫັນ ໂດຍໄດ້ຕີລາຄາສູງ ແລະ ຊົມເຊີຍຕໍ່ການເປັນເຈົ້າພາບຈັດກອງປະຊຸມດັ່ງກ່າວ ຂອງພັກຣັດເຊຍເອກະພາບ, ພ້ອມທັງສະແດງການສະໜັບສະໜູນແນວຄິດລິເລີ່ມ ຂອງບັນດາປະເທດເພື່ອນມິດ ທີ່ກ່ຽວຂ້ອງກັບການພົວພັນແລກປ່ຽນ ລະຫວ່າງ ບັນດາອະລິຍະທໍາ, ລວມທັງແນວຄິດລິເລີ່ມ ຂອງພັກຣັດເຊຍເອກະພາບ ໃນຄັ້ງນີ້ ເພື່ອເສີມຂະຫຍາຍການແລກປ່ຽນລະຫວ່າງ ບັນດາປະເທດໃນທະວີບ ແລະ ໝູ່ເກາະຕ່າງໆໃນດ້ານການເມືອງ, ດ້ານເສດຖະກິດ, ວັດທະນະທໍາ-ສັງຄົມ, ການສຶກສາ, ວິທະຍາສາດ ແລະ ອື່ນໆ. ພ້ອມນີ້, ສະຫາຍຍັງ ຍົກໃຫ້ເຫັນການພັດທະນາອະລິຍະທໍາ ຂອງພາກພື້ນອາຊີ-ປາຊີຟິກ ໃນຂອບອາຊຽນ ກໍຄື ອະລິຍະທໍາຂອງປະເທດລາວ ທີ່ໄດ້ຮັບການພັດທະນາມາແຕ່ສະໄໝບູຮານ ເຊິ່ງຊາດລາວເປັນປະເທດໜຶ່ງທີ່ມີເອກະລັກສະເພາະ ແລະ ຄວາມອຸດົມສົມບູນທາງດ້ານວັດທະນະທຳ;ພັກ ປປ ລາວ ຖືເອົາວັດທະນະທໍາ ເປັນພື້ນຖານແຫ່ງການຍືນຍົງຂອງຊາດ, ເປັນໜຶ່ງໃນກຳລັງຊຸກດັນໃຫ້ແກ່ການຂະຫຍາຍຕົວຂອງເສດຖະກິດ-ສັງຄົມ ທັງແມ່ນຈຸດໝາຍຂອງການພັດທະນາ. ບົນພື້ນ ຖານດັ່ງກ່າວ, ພັກ ປປ ລາວ ຍົກສູງວຽກງານວັດທະນະທໍາ ແລະ ວາງແນວທາງນະໂຍບາຍ, ຍຸດທະສາດ ເພື່ອອະນຸລັກ, ສົ່ງເສີມ ແລະ ພັດທະນາວັດທະນະທໍາຂອງຊາດ, ເສີມຂະຫຍາຍຄຸນຄ່າວັດທະ ນະທຳທີ່ມີລັກສະນະຊາດ, ປະຊາຊົນ ແລະ ກ້າວໜ້າ ເພື່ອຮັບປະກັນຄວາມໝັ້ນຄົງ, ຄວາມຍຸຕິທໍາ, ຄວາມປອງດອງພາຍໃນຊາດ, ເຂົ້າຮ່ວມໃນການພັດທະນາວັດທະນະທໍາ ກໍຄື ອະລິຍະທໍາ ຂອງພາກພື້ນອາຊີ-ປາຊີຟິກ ແລະ ທະວີບອື່ນໆໃນໂລກ ໂດຍການອະນຸລັກຮັກສາຈິດໃຈ, ຄວາມເປັນເອກະ ລັກຂອງພາກພື້ນ ແລະ ທະວີບຕ່າງໆ.
ພ້ອມນີ້, ສະຫາຍ ວາລະໄຊ ເລັ່ງສະຫວັດ ຍັງໄດ້ສະແດງຄວາມໝາຍໝັ້ນຂອງພັກ ປປ ລາວ ໃນການສືບຕໍ່ປຶກສາຫາລື ແລະ ຮ່ວມມືກັບບັນດາພັກການເມືອງ, ບັນດາປະເທດເພື່ອນມິດ ເພື່ອສົ່ງເສີມການພົວພັນແລກປ່ຽນ ລະຫວ່າງ ບັນດາອະລິຍະທໍາ ຂອງບັນດາປະເທດຕ່າງໆ ເພື່ອສັນຕິ ພາບ, ຄວາມໝັ້ນຄົງ, ມິດຕະພາບ, ການຮ່ວມມືເພື່ອການພັດທະນາ ແລະ ຄວາມຈະເລີນຮຸ່ງເຮືອງຂອງບັນດາປະຊາຊາດໃນໂລກ.
