ແຫລ່ງຂ່າວຈາກ ແຂວງສະຫວັນນະເຂດ ໃຫ້ຮູ້ວ່າ: ຫ້ອງການສາທາລະນະສຸກ ນະຄອນ ໄກສອນ ພົມວິຫານ ຮ່ວມກັບ ພະແນກສາທາລະນະສຸກແຂວງ ເປີດຂະບວນການ ຕ້ານການລະບາດຂອງພະຍາດໄຂ້ຍຸງລາຍ ໃນວັນທີ 15 ກໍລະກົດ 2023 ຜ່ານມາ ໂດຍຮ່ວມກັບຫລາຍພາກສ່ວນອ້ອມຂ້າງນະຄອນ ແລະ ກຸ່ມບ້ານຕ່າງໆ ອ້ອມຂ້າງນະຄອນໄກສອນ ພົມວິຫານ ເພື່ອປຸກລະດົມຂະບວນການອະນາໄມ ທຳລາຍແຫລ່ງແຜ່ພັນໜອນນໍ້າຍຸງລາຍ ໂດຍການເປັນປະທານຂອງ ທ່ານ ນາງ ຫລິງທອງ ແສງຕາວັນ ຮອງເຈົ້າເເຂວງສະຫວັນນະເຂດ, ຜູ້ຊີ້ນຳຂົງເຂດວຽກງານວັດທະນະທຳ-ສັງຄົມ, ມີທ່ານ ແຖ່ນແກ້ວ ພົມບິດາ ຮອງເຈົ້ານະຄອນ, ຜູ້ຊີ້ນຳວຽກງານວັດທະນະທຳ-ສັງຄົມ, ທ່ານ ດຣ ຕຽງຄຳ ປ້ອງວົງສາ ຮອງຫົວໜ້າພະແນກສາທາລະນະສຸກແຂວງ ແລະ ພາກສ່ວນກ່ຽວຂ້ອງ ເຂົ້າຮ່ວມ ຢ່າງເປັນຂະບວນ;
ທ່ານ ວັນແກ້ວ ຫລວງຈັນດາວົງ ຮອງຫົວໜ້າ ຫ້ອງການສາທາລະນະສຸກນະຄອນໄກສອນ ພົມວິຫານ ໄດ້ໃຫ້ຮູ້ ກ່ຽວກັບສະພາບການລະບາດຂອງພະຍາດໄຂ້ຍຸງລາຍໃນທົ່ວນະຄອນໄກສອນ ພົມວິຫານ ວ່າ: ມີການລາຍງານພົບກໍລະນີ ເປັນໄຂ້ເລືອດອອກ ກະເເຈກກະຈາຍ ນັບແຕ່ ເດືອນມັງກອນ ເປັນຕົ້ນມາ ແລະ ໄດ້ມີການເພີ່ມຂຶ້ນຫລັງເດືອນເມສາ ແລະ ສືບຕໍ່ມາຮອດປັດຈຸບັນ ແລະ ມີຄົນເຈັບເປັນຍ້ອນໄຂ້ຍຸງລາຍທັງໝົດ 85 ຄົນ, ຍິງ 38 ຄົນ. ແຕ່ຍັງບໍ່ທັນມີ ການລາຍງານກໍລະນີເສັຍຊີວິດ. ໄລຍະຜ່ານມາ, ຫ້ອງການສາທາລະນະສຸກນະຄອນ ໄກສອນ ພົມວິຫານ ໄດ້ລົງເຮັດການສໍາຫລວດໜອນນໍ້າຍຸງລາຍ 44 ຄັ້ງ, ມີເຮືອນທີ່ໄດ້ຮັບການສໍາຫລວດທັງໝົດ 1.927 ຫລັງ, ພົບໜອນນໍ້າ 203 ຫລັງ, ມີພາຊະນະທີ່ໄດ້ຮັບການສໍາຫລວດ 5.333 ພາຊະນະ, ພົບໜອນນໍ້າ 330 ພາຊະນະ, ລົງພົ່ນຢາໄດ້ 2 ຄັ້ງ ທີ່ບ້ານ ຕົ້ນເຜິ້ງ 1 ຄັ້ງ, ພົ່ນຢູ່ຫ້ອງການສາທາລະນະສຸກນະຄອນ 1 ຄັ້ງ, ມີປະຊາຊົນໄດ້ຮັບການປ້ອງກັນທັງໝົດ 822 ຄົນ ແລະ ລົງໂຄສະນາສຸຂະສຶກສາ ວິທີປ້ອງກັນພະຍາດໄຂ້ຍຸງລາຍໃນເທສະບານ ແລະ ນອກເທສະບານໄດ້ 8 ຄັ້ງ, ອັດຄລິບສຽງໃສ່ ໂຄສະນາໃສ່ໂທລະໂຄ່ງບ້ານປ້ອງກັນພະຍາດໄດ້ 31 ບ້ານ ແລະ ສ້າງຂະບວນການຕ້ານພະຍາດໄຂ້ຍຸງລາຍຂັ້ນນະຄອນໄດ້ 1 ຄັ້ງ.
ໂອກາດນີ້, ທ່ານ ນາງ ຫລິງທອງ ແສງຕາເວັນ ກໍໄດ້ຊີ້ນໍາ ໃຫ້ທຸກພາກສ່ວນໃນສັງຄົມທົ່ວເເຂວງ ເອົາໃຈໃສ່ຊີ້ນຳພາ, ປະຊາຊົນ ແລະ ອົງການຈັດຕັ້ງຕ່າງໆ ໃນພື້ນທີ່ຮັບຜິດຊອບຂອງຕົນ, ພ້ອມກັນສ້າງຂະບວນການ ຕ້ານພະຍາດໄຂ້ຍຸງລາຍ ເຊັ່ນດຽວກັນກັບການປະຕິບັດຢູ່ ນະຄອນ ໄກສອນ ພົມວິຫານ ແລະ ຮຽກຮ້ອງໃຫ້ມີການຈັດຕັ້ງປະຕິບັດ ຢ່າງຕໍ່ເນື່ອງ ແລະ ເປັນປະຈຳ ເພື່ອເຮັດໃຫ້ປະຊາຊົນໃນທົ່ວເເຂວງ ມີຄວາມເຂົ້າໃຈໄປໃນທິດທາງດຽວ ກັບກ່ຽວກັບເນື້ອໃນ ແລະ ສິ່ງທີ່ຄວນເຮັດ ເພື່ອຕ້ານ ແລະ ສະກັດກັ້ນການແພ່ລະບາດຂອງພະຍາດໄຂ້ຍຸງລາຍ ແລະ ຮຽກຮ້ອງ ມາຍັງອຳນາດການປົກຄອງ ທຸກຂັ້ນ, ອົງການຈັດຕັ້ງທຸກພາກສ່ວນ ແລະ ບັນດາສື່ມວນຊົນຕ່າງໆ ໄດ້ໃຫ້ການສະໜັບສະໜູນ ໃນວຽກງານການໂຄສະນາ ສຸຂະສຶກສາ ໃຫ້ປະຊາຊົນໄດ້ຮັບຮູ້ ເເລະ ເຂົ້າໃຈ ຢ່າງທົ່ວເຖິງ ກ່ຽວກັບ ວິທີການປະຕິບັດ ຍຸດທະສາດ 5ປ ຂອງກະຊວງສາທາລະນະສຸກວາງອອກ ເພື່ອໃຫ້ມີປະສິດທິ ພາບ ແລະ ປະສິດທິຜົນສູງ.
ຂ່າວ-ພາບ: ນະຄອນ ໄກສອນ ພົມວິຫານ
