ແຫລ່ງຂ່າວຈາກ ແຂວງສາລະວັນ ໃຫ້ຮູ້ວ່າ: ເມື່ອບໍ່ດົນມານີ້, ທ່ານ ພູທົງ ຄຳມະນີວົງ ຮອງເຈົ້າແຂວງສາລະວັນ, ຜູ້ຊີ້ນຳວຽກງານເສດຖະກິດ ພ້ອມດ້ວຍຫົວໜ້າ-ຮອງພະແນກການກ່ຽວ ຂ້ອງລົງເຄື່ອນໄຫວຊຸກຍູ້ວຽກງານການຈັດເກັບລາຍຮັບ ແລະ ການສົ່ງເສີມການລົງທຶນໃນຂອບເຂດທົ່ວເມືອງ, ວຽກງານຈຸດສຸມຕ່າງໆຂອງເມືອງ ຢູ່ເມືອງຕະໂອ້ຍ ເປັນຕົ້ນ ການພັດທະນາເສດຖະກິດ-ສັງຄົມ, ການແກ້ໄຂຄວາມທຸກຍາກຂອງປະຊາຊົນ.
ໂອກາດນີ້, ທ່ານ ບຸນເນື້ອ ຫລອງຄຳໄຕ ເຈົ້າເມືອງຕະໂອ້ຍ ກໍໄດ້ລາຍງານໂດຍຫຍໍ້ໃນການຈັດ ຕັ້ງປະຕິບັດວຽກງານ, ເສດຖະກິດຂອງເມືອງຂະຫຍາຍຕົວຢ່າງຕໍ່ເນື່ອງ ໂດຍສະເພາະແມ່ນການຫັນປ່ຽນອາຊີບຂອງປະຊາຊົນ ຈາກການເຮັດໄຮ່ປູກເຂົ້າຢ່າງດຽວໄປສູ່ການເຮັດນາປູກເຂົ້າ, ໄປສູ່ການປູກພືດທາດແປ້ງ, ປູກໄມ້ອຸດສາຫະກໍາ, ປູກພືດຜັກສວນຄົວເພື່ອຂາຍ, ການທຳການຜະລິດ ເພີ່ມຂຶ້ນໃນທຸກໆປີ ແລະ ໄດ້ສ້າງລາຍຮັບໃຫ້ແກ່ປະຊາຊົນ, ເສັ້ນທາງການຄົມມະນາຄົມ ສາມາດທຽວໄດ້ສອງລະດູກວມເອົາ 92,85%, ບ້ານທີ່ໄດ້ນໍາໃຊ້ໄຟຟ້າ 54 ບ້ານ, ການຄຸ້ມຄອງການລົງທຶນຂອງລັດ ແລະ ໂຄງການຊ່ວຍເຫລືອລ້າ ກໍໄດ້ຮັບການຈັດຕັ້ງປະຕິບັດຢ່າງເຂັ້ມງວດ ໂດຍທົ່ວເມືອງມີໂຄງການລົງທຶນທັງໝົດໃນໄລຍະເຄິ່ງສະໄໝ (2020-2023) ຈໍານວນ 58 ໂຄງການ, ມີມູນຄ່າ 126,21 ຕື້ກີບ. ໃນນີ້, ໂຄງການລົງທຶນຂອງລັດທີ່ສະພາຮັບຮອງ 26 ໂຄງການ, ມູນຄ່າຕາມສັນຍາ 34 ຕື້ກີບ, ໃນປີ 2023 ສາມາດຊອກແຫລ່ງລາຍຮັບເຂົ້າງົບປະມານໄດ້ 1 ຕື້ກວ່າກີບ, ເທົ່າກັບ 50%, ໄດ້ກໍານົດຈຸດສຸມຂອງການພັດທະນາ ເປັນຕົ້ນ ຈຸດສຸມແກ້ໄຂຄວາມທຸກຍາກ 20 ບ້ານ, ຈຸດສຸມສ້າງບ້ານພັດທະນາ 10 ບ້ານ, ຈຸດສຸມສ້າງບ້ານໃຫຍ່ໃຫ້ກາຍເປັນຕົວເມືອງນ້ອຍໃນຊົນນະບົດ 4 ບ້ານ; ທົ່ວເມືອງມີບ້ານພັດທະນາ 1 ບ້ານ, ບ້ານພົ້ນທຸກ 37 ບ້ານ ແລະ ບ້ານທຸກຍາກ 19 ບ້ານ (ທຽບໃສ່ປີ 2020 ມີບ້ານທຸກຍາກຫລຸດລົງ 4 ບ້ານ ) ແລະ ຄອບຄົວພົ້ນທຸກ 4.516 ຄອບຄົວ.
ໂອກາດດຽວກັນ, ບັນດາຫົວໜ້າພະແນກການ, ຂະແໜງການທີ່ກ່ຽວຂ້ອງຂອງແຂວງ ແລະ ເມືອງຕະໂອ້ຍ ກໍໄດ້ມີຄຳເຫັນແລກປ່ຽນຄຳຄິດເຫັນ ປະກອບໃສ່ເນື້ອໃນວຽກງານໃນແຕ່ລະດ້ານ, ແຕ່ລະຂົງເຂດ ໃນການຈັດຕັ້ງປະຕິບັດດ້ານການຈັດເກັບລາຍຮັບ, ການສົ່ງເສີມ ແລະ ຄຸ້ມຄອງດ້ານການລົງທຶນ, ທັງຊີ້ໃຫ້ເຫັນສ່ອງທາງໃນການແກ້ໄຂບັນຄວາມຫຍຸ້ງຍາກ, ວິທີການ ແລະ ຂອດການປະສານງານ, ສົມທົບກັນໃຫ້ກົມກຽວຫລາຍຂຶ້ນກວ່າເກົ່າ ລະຫວ່າງອົງການປົກຄອງເມືອງ ກັບແຂວງ ກໍຄື ຂະແໜງການຕ່າງໆ ໃຫ້ມີຄວາມເປັນເອກະພາບ, ໄປໃນທິດທາງດຽວກັນ ເພື່ອຈັດຕັ້ງປະຕິບັດວຽກງານຮອບດ້ານຢູ່ເມືອງຕະໂອ້ຍ ໃຫ້ມີຄວາມຄືບໜ້າ ແລະ ບັນລຸຕາມລະດັບຄາດໝາຍທີ່ວາງໄວ້.
ຂ່າວ-ພາບ: ວິໄລວອນ ສິດທິໄຊ
