ສະຫາຍ ບຸນທອງ ຈິດມະນີ ກຳມະການກົມການເມືອງສູນກາງພັກ, ຜູ້ປະຈໍາການຄະນະເລຂາທິການສູນກາງພັກ, ຮອງປະທານປະເທດ ໄດ້ໃຫ້ກຽດໂອ້ລົມ ຕໍ່ກອງປະຊຸມຄົບຄະນະກາງສະໄໝຂອງຄະນະບໍລິຫານງານພັກກະຊວງການເງິນ ສະໄໝທີ III ໃນວັນທີ 15 ກໍລະກົດ 2023 ໂດຍເນັ້ນໃຫ້ກະຊວງການເງິນ ສືບຕໍ່ເພິ່ມທະວີຄວາມສາມັກຄີພາຍໃນຄະນະພັກ, ຄະນະປະຈຳ ໃຫ້ໜັກແໜ້ນ ແລະ ມີຄວາມເປັນເອກະພາບສູງ, ເປັນໃຈກາງນຳພາເຕົ້າໂຮມຄວາມ ສາມັກຄີ ໃນຖັນແຖວສະມາຊິກພັກ, ພະນັກງານ-ລັດຖະກອນ ໃນທົ່ວກະຊວງ ໃຫ້ເປັນປຶກ ແຜ່ນແໜ້ນໜາຍິ່ງຂຶ້ນ; ຄະນະປະຈຳພັກກະຊວງ ຕ້ອງເປັນແບບຢ່າງນຳໜ້າກວ່າໝູ່, ເປັນຫລັກແຫລ່ງທີ່ແຂງແກ່ນ ເພື່ອນຳພາເຕົ້າໂຮມຄວາມສາມັກຄີພາຍໃນຄະນະບໍລິຫານ ງານພັກກະຊວງ ແລະ ໃຫ້ເປັນກຳລັງແຮງສືບຕໍ່ນຳພາທົ່ວອົງຄະນະພັກກະຊວງ ສູ້ຊົນປະ ຕິບັດບັນດາຄາດໝາຍທີ່ກຳນົດໄວ້ ໃນມະຕິກອງປະຊຸມໃຫຍ່ ຄັ້ງທີ III ຂອງອົງຄະນະພັກ ພວກສະຫາຍ ໃຫ້ບັນລຸຕາມຄາດໝາຍທີ່ວາງໄວ້.
ສະຫາຍ ບຸນທອງ ຈິດມະນີ ໄດ້ກ່າວອີກວ່າ: ຜົນຂອງການດຳເນີນຊີວິດການເມືອງກາງສະໄໝ ຂອງຄະນະບໍລິຫານງານພັກກະຊວງການເງິນຄັ້ງນີ້, ຖືເປັນຜົນສຳເລັດເບື້ອງຕົ້ນ ຫລື ເປັນຂໍ້ມູນພື້ນຖານ ທີີ່ຈະຕ້ອງໄດ້ສືບຕໍ່ຄົ້ນຄວ້າສຳຫລວດກວດກາຄືນຕົນເອງ ໃຫ້ເລິກເຊິ່ງຕື່ມ ອັນໃດມີຈິງ, ອັນໃດບໍ່ມີຈິງ ເພື່ອເປັນເຈົ້າການປັບປຸງແກ້ໄຂໃຫ້ຕົກໄປ ໂດຍມີການໄຈ້ແຍກໃຫ້ຈະແຈ້ງວ່າ ອັນໃດເປັນຄວາມຮັບຜິດຊອບລວມ ໝູ່ຄະນະຈະສຸມໃສ່ແກ້ໄຂແນວໃດ, ອັນໃດ ແມ່ນຄວາມຮັບຜິດຊອບການເມືອງ ແລະ ບັນຫາສ່ວນຕົວຂອງແຕ່ລະສະຫາຍ ກໍພ້ອມກັນປັບປຸງແກ້ໄຂ(ປ່ຽນແປງ)ໃຫ້ໄດ້; ໃຫ້ມີຄວາມເຂົ້າໃຈຖືກຕ້ອງ ແລະ ເປັນເອກະພາບ ຕໍ່ຜົນຂອງການທາບທາມ ກໍຄື ການປະກອບຄຳຄິດຄຳເຫັນຕຳນິສົ່ງຂ່າວ ຈາກພະນັກງານຫລັກແຫລ່ງ ທີ່ເຂົ້າຮ່ວມທາບທາມນັ້ນ ຖືວ່າອັນນັ້ນ ແມ່ນການສະແດງເຖິງຄວາມເປັນຫ່ວງເປັນໄຍ ຕໍ່ການນຳພາ ລວມຂອງຄະນະພັກ ແລະ ຕໍ່ແຕ່ລະສະຫາຍ ໃນຄະນະພັກກະຊວງ, ທັງແມ່ນການປະຕິ ບັດຫລັກການ ໃຫ້ຂັ້ນລຸ່ມຕຳນິຕິຊົມ ແລະ ປະກອບຄຳເຫັນຕໍ່ຂັ້ນເທິງ ແລະ ຫລັກການ ໃຫ້ມະຫາຊົນເຂົ້າຮ່ວມການປັບປຸງກໍ່ສ້າງພັກ ເຊິ່ງມີທັງການປັບປຸງກໍ່ສ້າງລວມໝູ່ຄະນະພັກ ແລະ ບຸກຄົນໃນຄະນະພັກ; ການປະກອບຄຳເຫັນດັ່ງກ່າວ ແມ່ນຄວາມມຸ່ງຫວັງ ຂອງສະມາຊິກພັກ ທີ່ເປັນພະນັກງານຫລັກແຫລ່ງ ທີ່ຫວັງຢາກຮັກສາບົດບາດ ແລະ ຄວາມສາມາດນຳພາຂອງຄະນະພັກ ແລະ ຂອງແຕ່ລະສະຫາຍ ໃນຄະນະພັກ ເພື່ອໃຫ້ບັນດາສະຫາຍ ສືບຕໍ່ເປັນຫລັກແຫລ່ງ-ເປັນແບບຢ່າງ ຫລື ເປັນແວ່ນແຍ່ງທີ່ໃສແຈ້ງ ຂອງທົ່ວອົງຄະນະພັກຂອງພວກສະຫາຍ. ສະນັ້ນ ສະເໜີໃຫ້ບັນດາສະຫາຍ ນຳເອົາການປະກອບຄວາມຄິດຄຳເຫັນ ກໍຄື ການຕຳນິສົ່ງຂ່າວນັ້ນ ໄປຄົ້ນຄວ້າ-ຕຶກຕອງ ເບິ່ງໃຫ້ເລິກເຊິ່ງ, ຖີ່ຖ້ວນ, ບໍ່ຖືເບົາ ເຖິງວ່າຈະແມ່ນຫາງສຽງບໍ່ຫລາຍ ພຽງແຕ່ 1-2 ສຽງກໍຕາມ ແຕ່ອາດເປັນບັນຫາ ທີ່ພວມຮຽກຮ້ອງ ໃຫ້ຕິດຕາມ-ແກ້ໄຂແຕ່ຫົວທີ ບໍ່ໃຫ້ບານປາຍຕໍ່ໄປ, ບໍ່ໃຫ້ເຂົ້າໃຈວ່າ ເປັນການຫາເລື່ອງບໍ່ຈິງໃສ່ຕົວເອງ ແລະ ອື່ນໆ.
ນອກຈາກນີ້, ໃຫ້ນຳເອົາຄວາມຄິດຄວາມເຫັນ ທີ່ໝູ່ຄະນະ ແລະ ພະນັກງານ ຫລັກແຫລ່ງ ທີ່ເຂົ້າຮ່ວມການທາບທາມຄວາມໄວ້ວາງໃຈ ໄດ້ປະກອບຕໍ່ການນຳພາລວມ ແລະ ການປະກອບຄຳເຫັນ ກໍຄື ການສະເໜີຂອງແຕ່ລະໜ່ວຍນັ້ນ ໄປຄົ້ນຄວ້າປັບປຸງບົດສຳຫລວດການນຳພາລວມ ຂອງຄະນະພັກ ໃຫ້ເລິກເຊິ່ງແທດເຖິງກັບຕົວຈິງຕື່ມ, ພ້ອມທັງນຳມາຄົ້ນຄວ້າປຶກສາຫາລື ແລະ ມີມາດຕະການນຳພາ-ຊີ້ນຳແກ້ໄຂຕົວຈິງ ໃນແຕ່ລະຂະແໜງການ; ມອບໃຫ້ກົມກວດກາ ແລະ ກົມຈັດຕັ້ງ-ພະນັກງານ ຄົ້ນຄວ້າສະຫລຸບສັງລວມຄວາມຄິດຄວາມເຫັນດັ່ງກ່າວ ແຕ່ລະບັນຫາເພື່ອໃຫ້ຄະນະປະຈຳພັກກະຊວງ ຊີ້ນຳແຕ່ລະພາກສ່ວນປັບປຸງແກ້ໄຂຕາມຄວາມຮັບຜິດຊອບ ຂອງແຕ່ລະຂະແໜງການ. ສຳລັບ ການປະກອບຄຳເຫັນ ຕໍ່ແຕ່ລະສະຫາຍນັ້ນ ກໍໃຫ້ບັນດາສະຫາຍ ເອົາໄປຄົ້ນ ຄວ້າ-ກວດກາຄືນຕົນເອງອັນໃດມີຈິງ ກໍໃຫ້ປັບປຸງແກ້ໄຂໃຫ້ໄດ້, ອັນໃດບໍ່ຖືກ ຫລື ບໍ່ມີຄວາມຈິງ ກໍເອົາເປັນບົດຮຽນ-ເປັນການເຕືອນ ໃຫ້ມີສະຕິ ເພື່ອຫລີກເວັ້ນບໍ່ໃຫ້ເກີດຂຶ້ນກັບຕົນເອງໃນຕໍ່ໜ້າ.
ພາຍຫລັງການດຳເນີນຊີວິດການເມືອງເທື່ອນີ້, ໃຫ້ສືບຕໍ່ປັບປຸງ ການນຳພາຂອງຄະນະພັກ ໃຫ້ມີວິທະຍາສາດ-ແທດເຖິງ ກັບຕົວຈິງຫລາຍກວ່າເກົ່າ, ນຳພາຢ່າງມີຈຸດສຸມ, ແກ້ໄຂບັນຫາຕ່າງໆ ໃຫ້ໄວ-ທັນການ, ເຖິງລະດັບ ແລະ ມີຜົນສຳເລັດຢ່າງຂາດຕົວ; ໃຫ້ເບິ່ງຄືນການແບ່ງງານ, ແບ່ງຄວາມຮັບຜິບຊອບ ນັບທັງການແບ່ງຄະນະປະຈຳ ຊີ້ນຳແຕ່ລະຂະແໜງການ ຍັງມີບັນຫາໃດຄວນໄດ້ປັບປຸງໃຫ້ແທດເໝາະເພື່ອສືບຕໍ່ນຳພາ-ຊີ້ນຳ ໃຫ້ແທດເຖິງກວ່າເກົ່າ; ເອົາໃຈໃສ່ປັບປຸງແບບແຜນນຳພາ ແລະ ວິທີເຮັດວຽກ ໃຫ້ຖືກຕ້ອງຕາມຫລັກການນຳພາຂອງພັກ, ທຸກບັນຫາທີ່ໄດ້ວາງອອກ-ໄດ້ຕົກລົງເປັນເອກະພາບ ຕ້ອງມີການຈັດຕັ້ງນຳພາປະຕິບັດຕົວຈິງ, ມີການຕິດ ຕາມ-ກວດກາ, ຊຸກຍູ້ມີການປະເມີນຜົນເປັນປົກກະຕິ ເພື່ອເຫັນໄດ້ອັນທີ່ເຮັດສຳເລັດ ແລະ ບັນຫາທີ່ຄົງຄ້າງ ເພື່ອປັບປຸງແກ້ໄຂໃຫ້ທັນເວລາ; ການນຳພາຂອງຄະນະພັກ, ຄະນະປະຈຳຕ້ອງມີຈຸດສຸມ, ອັນໃດຄວນສຸມໃສ່ນຳພາແກ້ໄຂກ່ອນ ແລະ ແກ້ໄຂຕໍ່ໆ ໄປ.
ຂ່າວ: ກິດຕາ
ພາບ: ອ່າຍຄຳ
