ຕອນເຊົ້າຂອງວັນທີ 13 ກໍລະກົດ 2023 ນີ້ ເມືອງຊະນະຄາມແຂວງວຽງຈັນ ໄດ້ຈັດໃຫ້ມີພິທີປ່ອຍປາຄືນສູ່ທຳມະຊາດ ຢູ່ທີ່ບໍລິເວນ ວັງສະຫງວນ ຂອງບ້ານນາປາຝາ ເມືອງຊະນະຄາມ ແຂວງວຽງຈັນ ໂດຍການເປັນກຽດເຂົ້າຮ່ວມຂອງ ທ່ານ ແກ້ວ ພິມມະວົງ ກຳມະການພັກແຂວງ ເລຂາພັກເມືອງ ວ່າການເຈົ້າເມືອງ ເມືອງຊະນະຄາມ, ມີທ່ານ ບຸນຊ່ວງ ວັນສີ ຄະ ນະປະຈໍາພັກເມືອງ ຮອງເຈົ້າເມືອງ ເມືອງຊະນະຄາມ ມີຄະນະປະຈຳພັກເມືອງ, ກຳມະການພັກເມືອງ ຫົວໜ້າຫ້ອງການ ພະນັກງານ ອ້ອມຂ້າງເມືອງ ນັກທຸລະກິດ ພໍ່ຄ້າຊາວຂາຍ ອົງການປົກຄອງບ້ານ ແລະ ພໍ່ແມ່ປະຊາຊົນມກໍ່ເປັນກຽດເຂົ້າ ຮ່ວມເປັນຈຳນວນຫຼວງຫຼາຍ.
ໃນພິທີ ທ່ານ ຄໍາມີ ທອງປານສີ ຫົວໜ້າຫ້ອງການ ກະສິກໍາ ແລະ ປ່າໄມ້ເມືອງ ໄດ້ສະຫຼຸບການປ່ອຍປາໃນໄລຍະຜ່ານມາໂດຍຫຍໍ້ ເຊິ່ງການປ່ອຍປາໃນແຕ່ລະປີ ແມ່ນຈະໄດ້ຜັດປ່ຽນໜູນວຽນກັນໃນແຕ່ລະສະຖານທີ່ຕາມແຫຼ່ງນໍ້າທຳມະຊາດ ຂອງເມືອງ ໂດຍເປັນການຈັດຕັ້ງຜັນຂະຫຍາຍ ກົດໝາຍວ່າດ້ວຍ: ການປະມົງ ໃນການອານຸລັກສັດນໍ້າ-ສັດປ່າ ແຫ່ງຊາດ. ນັບແຕ່ປີ 1997 ຈົນເຖິງປັດຈຸບັນ ລວມມີປານໍາມາປ່ອຍທັງໝົດ 4.503.500 ໂຕ, ສະເພາະໃນປີ 2023 ນີ້ປາທີ່ນຳມາປ່ອຍທັງໝົດ ມີ 150 ຖົງ, ມີປາຈໍານວນທັງໜົດ 50.000ໂຕ ໃນນັ້ນມີປາ ນິນ, ປາໄນ, ປານວນຈັນ, ປາກິນຫຍ້າ, ປາຕະພຽນ, ປາເລັ່ງ ໂດຍໃຫ້ປະຊາຊົນມີສ່ວນຮ່ວມໃນການກຳນົດເປັນເຂດວັງສະຫງວນ ທິດເໜຶອ ມີຄວາມຍາວ 1.500 ແມັດ, ທິດໃຕ້ ມີຄວາມຍາວ 1.000 ແມັດເພື່ອປ້ອງກັນການລັກລອບຫາປາແບບບໍຖຶກຕ້ອງ.
ຈຸດປະສົງໃນການປ່ອຍປາ ໃນຄັ້ງນີ້ ກໍ່ເພື່ອ ອານຸລັກຮັກສາ ຊະນິດພັນປາ ແລະ ສັດນໍ້າຊະນະນິດອື່ນໆ ໃຫ້ຍຶນຍົງຢູ່ກັບແຫຼ່ງນໍ້າທຳມະຊາດຕະຫຼອດໄປ ເພື່ອຮັບປະກັນໃຫ້ແກ່ການຄຸ້ມຄອງແຫຼ່ງທີ່ຢູ່ອາໃສ ບ່ອນວາງໄຂ່ ແລະ ບ່ອນແຜ່ພັນ ຂອງປາຊະນິດພັນປາລວມທັງສັດນໍ້າຊະນິດອື່ນ ໄດ້ຢ່າງມີປະສິດທິຜົນ, ເພື່ອຢຸດຕິການໃຊ້ເຄື່ອງມືຫາປາແບບດັບສູນ ເຊັ່ນ:ການນໍາໃຊ້ໄຟຟ້າຊ໊ອດປາ, ການນຳໃຊ້ລະເບີດ ແລະ ວັດຖຸອື່ນໆ ເພື່ອບັນລຸຄາດໝາຍ ໃຫ້ແກ່ການວາງໄຂ່ ຂອງຊະນິດພັນປາທີ່ຂື້ນມາປະສົມພັນ ແລະວາງໄຂ່ໃຫ້ມີຜົນສຳເລັດ ພ້ອມທັງເປັນບ່ອນຄໍ້າສະບຽງອາຫານໃຫ້ຫຼາຍຂື້ນ.
ພາບ-ຂ່າວ ເມືອງຊະນະຄາມ ແຂວງວຽງຈັນ
