ມື້ນີ້, ວັນທີ 13 ກໍລະກົດ 2022, ພໍດີ ຄົບຮອບ 114 ປີ ວັນເກີດຂອງປະທານ ສຸພານຸວົງ ຜູ້ນໍາທີ່ດີເດັ່ນ ແລະ ເຄົາລົບຮັກຂອງປະຊາຊົນລາວບັນດາເຜົ່າ; ຕະຫລອດຊີວິດຂອງເພິ່ນ ໄດ້ອຸທິດໃຫ້ແກ່ການປະຕິວັດ ຕໍ່ສູ້ປົດປ່ອຍຊາດ ຍາດເອົາເອກະລາດ ມາໃຫ້ແກ່ປວງຊົນລາວ ຈາກ ການເປັນຂ້ອຍຂ້າມ້າໃຊ້ຂອງຈັກກະພັດລ່າເມືອງຂຶ້ນ.
ຄືດັ່ງພວກເຮົາຮູ້ນໍາກັນແລ້ວວ່າທ່ານປະທານ ສຸພານຸວົງ ກໍາເນີດໃນຄອບຄົວເຊື້ອເຈົ້າ ທີ່ມີຄວາມພ້ອມພຽງທາງດ້ານຕ່າງໆ ໃນການດໍາລົງຊີວິດ, ແຕ່ເພິ່ນໄດ້ເສຍສະລະມາເປັນສາມັນຊົນ, ນໍາພາຕໍ່ສູ້ກັບຈັກກະພັດລ່າເມືອງຂຶ້ນທັງເກົ່າ ແລະ ໃໝ່ ເພື່ອກອບກູ້ເອກະລາດຂອງຊາດ. ໃນ ຊີວິດເຍົາໄວເພິ່ນກໍ່ເປັນຄົນດຸໝັ່ນ ຂະຫຍັນຮໍ່າຮຽນ ແລະ ມີພອນສະຫວັນຫລາຍດ້ານ. ເມື່ອໄດ້ອອກໄປສຶກສາຕໍ່ຢູ່ຕ່າງປະເທດ, ປະທານ ສຸພານຸວົງ ໄດ້ສຸມທຸກສະຕິປັນຍາ ເພື່ອຄົ້ນຄວ້າຮໍ່າຮຽນ, ທັງຮຽນເກັ່ງ ແລະ ດຸໝັ່ນໃນການເຝິກຫັດຕົວຈິງ. ພາຍຫລັງສຳເລັດການສຶກສາ ກັບມາປະ ຕິບັດໜ້າທີ່ວຽກງານຢູ່ລາວ, ເພິ່ນແມ່ນວິສະວະກອນດ້ານຂົວທາງ ຄົນທໍາອິດເຮັດວຽກກັບພວກຝຣັ່ງ ແລະ ໄດ້ສຳເລັດການກໍ່ສ້າງຂົວ-ທາງຫລາຍແຫ່ງ ຢູ່ອິນດູຈີນ ສະເພາະ ຢູ່ລາວ ກໍ່ແມ່ນຂົວຂ້າມ ນໍ້າເຊບັງຫຽງ ຢູ່ແຂວງສະຫວັນນະເຂດ.ໃນເວລາຮັບໜ້າທີ່ວຽກງານຢູ່ຫວຽດນາມ, ກໍາປູເຈຍ ແລະ ລາວ, ປະທານ ສຸພານຸວົງ ໄດ້ສ້າງຜົນງານຫລາຍຢ່າງອັນ ເປັນທີ່ຍອມຮັບໃນຖານະວິສະວະກອນ ທີ່ມີຄວາມຮູ້, ຄວາມສາ ມາດ ແລະ ເຮັດທໍາຈິງ. ສິ່ງສຳຄັນທີ່ສຸດແມ່ນເພິ່ນໄດ້ຮູ້, ເຫັນພຶດຕິກໍາຕົວຈິງ ແລະ ການກະທຳຂອງພວກຈັກກະພັດລ່າເມືອງຂຶ້ນຝຣັ່ງ ທີ່ມີຕໍ່ຄົນ ຂອງຊາດຫົວ ເມືອງຂຶ້ນ ເຊິ່ງໄດ້ສົ່ງຜົນກະທົບໂດຍກົງ ຕໍ່ສະພາບແນວຄິດຈິດໃຈຂອງເພິ່ນ ແລະ ເລືອກ ເອົາເສັ້ນທາງເດີນແຫ່ງຊີວິດຄື ການກ້າວສູ່ເສັ້ນທາງແຫ່ງການຕໍ່ສູ້ ເພື່ອກອບກູ້ເອົາຄວາມເປັນເອກະລາດ ມາໃຫ້ປະເທດ, ນໍາເອົາອິດສະລະພາບ ແລະ ສິດເປັນເຈົ້າມາໃຫ້ ປະຊາຊົນລາວບັນດາເຜົ່າ. ໃນຂະບວນການຕໍ່ສູ້ ເພື່ອກອບກູ້ເອກະລາດ ມາໃຫ້ ແກ່ປະເທດຊາດ ແລະ ປະຊາຊົນ ນັບຕັ້ງແຕ່ປີ 1945 ຈົນຮອດມື້ປົດປ່ອຍປະເທດຊາດ, ສະຖາປະນາສາທາລະນະລັດ ປະຊາທິປະໄຕ ປະຊາຊົນລາວ ໃນວັນທີ 2 ທັນວາ 1975; ພາຍໃຕ້ການນໍາພາຂອງພັກ, ປະທານ ສຸພານຸວົງ ພ້ອມ ກັບຜູ້ນໍາພັກ ປະຊາຊົນ ປະຕິວັດລາວ ແລະ ປວງຊົນລາວບັນດາເຜົ່າ ຕໍ່ສູ້ຢ່າງບໍ່ຮູ້ອິດເມື່ອຍ ແລະ ເຕັມໄປດ້ວຍຄວາມເສຍສະລະ ອັນສູງສົ່ງທີ່ສຸດ ຜ່ານໄລຍະປະຫວັດສາດ ອັນລະອິດລະອ້ຽວທີ່ສຸດ, ເປັນການຕໍ່ສູ້ເອົາເປັນເອົາຕາຍ ລະຫວ່າງກຳລັງຮັກຊາດ ຂອງພວກເຮົາກັບພວກລ່າເມືອງຂຶ້ນ ແລະ ລູກແຫລ້ງຕີນມືຂອງພວກເຂົາ.
ວັນທີ 1-2 ທັນວາ 1975, ກອງປະຊຸມໃຫຍ່ຜູ້ແທນປະຊາຊົນທົ່ວປະເທດ ໄດ້ເປັນເອກະສັນກັນແຕ່ງຕັ້ງທ່ານປະທານ ສຸພານຸວົງ ເປັນປະທານປະເທດຄົນທຳອິດ ຂອງ ສປປ ລາວ ແລະ ເປັນປະທານສະພາປະຊາຊົນສູງສຸດ. ນັບແຕ່ປີ 1975- 1995, ທ່ານ ປະທານ ສຸພານຸວົງ ໄດ້ນຳ ພາປະຊາຊົນຜ່ານຜ່າອຸປະສັກຕ່າງໆ ໃນໄລຍະຂ້າມຜ່ານ, ນຳພາປະຊາຊົນດຳເນີນພາລະກິດປ່ຽນແປງໃໝ່ ແລະ ນຳພາປະຊາຊົນ ສ້າງສາພັດທະນາປະເທດຊາດ ໃຫ້ຈະເລີນຮຸ່ງເຮືອງເທື່ອລະກ້າວ.
ທຸກໄລຍະຂອງການປະຕິວັດ ປະທານ ສຸພານຸວົງ ໄດ້ສຸມສະຕິປັນຍາ ແລະ ເຫື່ອແຮງຂອງຕົນເພື່ອຊີ້ນຳ-ນຳພາ ຂະບວນການປະຕິວັດລາວຍາດ ເອົາໄຊຊະນະອັນຍິ່ງໃຫຍ່ ມາໃຫ້ແກ່ປະເທດຊາດ. ປະທານ ໄກສອນ ພົມວິຫານ ໄດ້ເວົ້າເຖິງປະ ທານ ສຸພານຸວົງ ວ່າ: “ຊື່ສຽງຮຽງນາມ ຂອງ ສະຫາຍ ໄດ້ພົ້ນເດັ່ນຂຶ້ນໃນຖານະທີ່ເປັນນັກຮົບຮັກຊາດ ຮຸ່ນທຳອິດທີ່ໄດ້ເອົາຊີວິດຂອງຕົນຜູກພັນ ກັບການປະຕິວັດຕະຫລອດມາໂດຍບໍ່ງໍ້ງ່ຽງ ຕໍ່ຄວາມລຳບາກ, ຄວາມເສຍສະລະໃດໆ ກະທັງເຖິງບໍ່ຫວາດ ຫວັ່ນຕໍ່ກັບການຈັບກຸມຄຸມຂັງຂອງສັດຕູ, ຍາມໃດກໍ່ຕໍ່ສູ້ ເພື່ອອຸດົມຄະຕິປະຕິວັດ ອັນສູງສົ່ງ, ເພື່ອຄວາມເປັນເອກະລາດ ແລະ ຄວາມວັດທະນາຖາວອນ ຂອງປະເທດຊາດ, ເພື່ອອິດສະລະພາບ ແລະ ຄວາມຢູ່ດີກິນດີ ຂອງປະຊາຊົນ…”.
ປະທານສຸພານຸວົງ ຜູ້ນໍາທີ່ດີເດັ່ນ ແລະ ເຄົາລົບຮັກຂອງປະຊາຊົນລາວ ບັນດາເຜົ່າຍືນຍົງໃນດວງໃຈຂອງພວກເຮົາຕະຫລອດກາລະນານ!
ແຫຼ່ງຂໍ້ມູນ: ຂປລ
