ກະຊວງເຕັກໂນໂລຊີ ແລະ ການສື່ສານຕ້ອງຫັນວຽກງານໃຫ້ເປັນແຜນງານໂຄງການ, ມະຕິ, ຄໍາສັ່ງ, ກົນໄກ, ລະບອບລະບຽບການ ໃຫ້ເປັນອັນລະອຽດ ໃນຂະນະດຽວກັນຕ້ອງຖືວິໃສທັດ, ຍຸດທະສາດ ແລະ ແຜນພັດທະນາເສດຖະກິດດີຈີຕອນ ເປັນປາຍແຫຼມ ແລະ ເປັນວຽກບຸລະມະສິດໃນການພັດທະນາເສດຖະກິດ-ສັງຄົມ.
ສະຫາຍ ໄຊສົມພອນ ພົມວິຫານ ກຳມະການກົມການເມືອງສູນກາງພັກ ປະທານສະພາແຫ່ງຊາດໄດ້ໂອ້ລົມ ຕໍ່ກອງປະຊຸມຄົບຄະນະກາງສະໄໝ ຂອງອົງຄະນະພັກກະຊວງເຕັກໂນໂລຊີ ແລະ ການສື່ສານ (ກຕສ) ສະໄໝທີ II ເມື່ອວັນທີ 13 ກໍລະກົດ ນີ້ ທີ່ ກຕສ ໂດຍມີ ສະຫາຍ ບໍ່ວຽງຄໍາ ວົງດາລາ ກຳມະການສູນກາງພັກ ເລຂາຄະນະບໍລິຫານງານພັກ ກະຊວງເຕັກໂນໂລຊີ ແລະ ການສື່ສານ, ບັນດາຄະນະປະຈໍາພັກ, ຄະນະບໍລິຫານງານພັກ ແລະ ສະມາຊິກພັກເຂົ້າຮ່ວມ.
ສະຫາຍ ໄຊສົມພອນ ພົມວິຫານ ໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນງານທີ່ອົງຄະນະພັກກະຊວງເຕັກໂນໂລຊີ ແລະ ການສື່ສານ ຍາດມາໄດ້ໃນໄລຍະທີ່ຜ່ານມາ ແລະ ໄດ້ເນັ້ນໃຫ້ສືບຕໍ່ຈັດຕັ້ງຜັນຂະຫຍາຍ ມະຕິກອງປະຊຸມໃຫຍ່ຄັ້ງທີ XI ຂອງພັກ ແລະ ມະຕິກອງປະຊຸມໃຫຍ່ຜູ້ແທນສະມາຊິກພັກ ຂອງອົງຄະນະພັກກະຊວງເຕັກໂນໂລຊີ ແລະ ການສື່ສານ ຄັ້ງທີ II ໂດຍຫັນເປັນແຜນງານໂຄງການ, ມະຕິ, ຄໍາສັ່ງ, ກົນໄກ, ລະບອບລະບຽບການ ໃຫ້ເປັນອັນລະອຽດ ແລະ ຄຽງຄູ່ກັນນັ້ນ, ໃຫ້ຖືເອົາວິໃສທັດ, ຍຸດທະສາດ ແລະ ແຜນພັດທະນາເສດຖະກິດດີຈີຕອນ ເປັນປາຍແຫຼມ ແລະ ເປັນວຽກບຸລິມະສິດໃນການພັດທະນາເສດຖະກິດ-ສັງຄົມ, ສຸມໃສ່ວຽກງານປັບປຸງ ແລະ ກໍ່ສ້າງພັກໃຫ້ຖືກຕ້ອງຕາມ 5 ຫຼັກການ ແລະ 3 ທິດນໍາໃນການກໍ່ສ້າງພັກໃຫ້ມີຄວາມໜັກແໜ້ນ ແລະ ເຂັ້ມແຂງ ທາງດ້ານການເມືອງ, ແນວຄິດ, ການຈັດຕັ້ງ ແລະ ແບບແຜນນໍາພາ, ສ້າງມະຫາຊົນກ້າວໜ້າທີ່ຈະຂະຫຍາຍເຂົ້າເປັນສະມາຊິກພັກໃໝ່ ໃຫ້ຮັບປະກັນໄດ້ທາງດ້ານຄຸນນະພາບ, ສູ້ຊົນສ້າງໜ່ວຍພັກ ປອດໃສ, ເຂັ້ມແຂງ, ໜັກແໜ້ນ ໃຫ້ໄດ້ຕາມທິດທາງແຜນການທີ່ກໍານົດໄວ້ ໂດຍຖືເອົາຄຸນນະພາບເປັນກົກ, ເອົາໃຈໃສ່ຊີ້ນໍາ-ນໍາພາ ວຽກງານບໍາລຸງ-ກໍ່ສ້າງພະນັກງານ ໃຫ້ມີລະດັບຄວາມຮູ້ທາງດ້ານທິດສະດີການເມືອງ-ການປົກຄອງ, ມີຄຸນສົມບັດສິນທໍາປະຕິວັດ ແລະ ຄວາມຮູ້ທາງດ້ານວິຊາສະເພາະຢ່າງໜັກແໜ້ນ, ສາມາດຮອງຮັບໜ້າທີ່ວຽກງານໃນໄລຍະໃໝ່; ສຸມໃສ່ຊີ້ນໍາ-ນໍາພາ ການຄົ້ນຄວ້າປັບປຸງນິຕິກໍາເກົ່າທີ່ບໍ່ສອດຄ່ອງ ແລະ ສ້າງນິຕິກໍາໃໝ່ໃຫ້ພຽງພໍ, ສາມາດຮັບຮອງວຽກງານເຕັກໂນໂລຊີ ແລະ ການສື່ສານ ທີ່ນັບມື້ນັບເຕີບໃຫຍ່ຂະຫຍາຍຕົວຢ່າງວ່ອງໄວ ໃນຍຸກອຸດສາຫະກຳ 4.0, ກິດຈະກໍາໃດທີ່ມີຄວາມສ່ຽງ ຈະຕ້ອງໄດ້ສ້າງນິຕິກໍາຄຸ້ມຄອງ ລວມທັງກໍານົດມາດຕະການ ຢ່າງລະອຽດ, ຮັດກຸມ, ເອົາໃຈໃສ່ໂຄສະນາເຜີຍແຜ່ ກ່ຽວກັບການປະຕິວັດອຸດສາຫະກໍາຄັ້ງທີ 4, ກາລະໂອກາດ ແລະ ສິ່ງທ້າທາຍ ສຳລັບ ສປປ ລາວ ແລະ ການຫັນເປັນດີຈີຕອນຂອງປະເທດເຮົາ ໃຫ້ສັງຄົມຮັບຮູ້ ແລະ ເຂົ້າໃຈຢ່າງກວ້າງຂວາງ, ທົ່ວເຖິງ ແລະ ເລິກເຊິ່ງ.
ຕ້ອງພັດທະນາພື້ນຖານໂຄງລ່າງເຕັກໂນໂລຊີ ແລະ ການສື່ສານ, ສືບຕໍ່ຊຸກຍູ້ບັນດາບໍລິສັດລັດວິສະຫະກິດດ້ານໄປສະນີ ແລະ ໂທລະຄົມມະນາຄົມ ຂະຫຍາຍເຄືອຂ່າຍການບໍລິການໄດ້ຢ່າງທົ່ວເຖິງ, ແຂ່ງຂັນດໍາເນີນທຸລະກິດຢ່າງຖືກຕ້ອງຕາມລະບຽບກົດໝາຍ, ເສຍພາສີ, ອາກອນ ແລະ ປະກອບສ່ວນມອບພັນທະໃຫ້ລັດ ໃຫ້ໄດ້ຕາມແຜນການ ຫຼື ລື່ນຄາດໝາຍທີ່ກໍານົດໄວ້.
ສະຫາຍ ໄຊສົມພອນ ພົມວິຫານ ເນັ້ນຕື່ມວ່າ: ຄະນະພັກ, ຄະນະນຳ ກະຊວງເຕັກໂນໂລຊີ ແລະ ການສື່ສານ ຕະຫຼອດເຖິງ ສະມາຊິກພັກ, ພະນັກງານ-ລັດຖະກອນ ຕ້ອງເປັນເຈົ້າການຝຶກຝົນຫຼໍ່ຫຼອມ, ປັບປຸງຕົນເອງ, ບືນຕົວຍົກສູງລະດັບຄວາມຮູ້-ຄວາມສາມາດ, ຄວາມຮັບຜິດຊອບຕໍ່ໜ້າທີ່ການເມືອງ ກໍຄືໜ້າທີ່ວຽກງານທີ່ໄດ້ຮັບມອບໝາຍ, ກ້າເຮັດ, ກ້າຮັບຜິດຊອບ, ອົດທົນ, ເສຍສະຫຼະ, ປະດິດສ້າງ ແລະ ມີການເຄື່ອນໄຫວ ສອດຄ່ອງຕາມພາລະບົດບາດຂອງຕົນ, ຊື່ສັດ, ໂປ່ງໄສ ແລະ ຍຸຕິທໍາ, ເດັດຂາດສະກັດກັ້ນ ການສວຍໃຊ້ສິດ, ໜ້າທີ່ເພື່ອສ້າງອຳນາດອິດທິພົນ ຫຼື ມີການແອບແຝງດ້ານຜົນປະໂຫຍດສ່ວນຕົວ, ກຸ່ມກ້ອນ ອັນຈະສ້າງຄວາມເສຍຫາຍ ຕໍ່ບົດບາດການນຳພາຂອງພັກ, ການຄຸ້ມຄອງຂອງລັດ ກໍຄື ກະທົບຕໍ່ຄວາມເຊື່ອຖື ໄວ້ວາງໃຈ ຂອງສັງຄົມຕໍ່ພັກ-ລັດເຮົາ.
(ຂ່າວ-ພາບ: ສຳນານ)
