ການແຂ່ງຂັນເທັນນິດ ເອທີພີ ທົວ 500 ລາຍການ ຊິນ ແຊ໋ມປ້ຽນຊິບ 2023 ຊີງເງິນລາງວັນລວມ 2.195.175 ເອີໂຣ ທີ່ຄວີນ ຄລັບ ໃນນະຄອນຫຼວງລອນດອນ ປະເທດອັງກິດ ເມື່ອວັນທີ 25 ມິຖຸນາ 2023 ເປັນການແຂ່ງຂັນໃນຮອບຊີງຊະນະເລີດ ປະເພດຊາຍດ່ຽວ ຄາລອດ ອັນຄາຣາດ ມືວາງອັນດັບ 1 ຂອງລາຍການ ແລະ ມື 2 ຂອງໂລກຈາກແອັດສະປາຍ ພົບກັບ ອະເລັກ ເດີມິນໍ ມືວາງອັນດັບ 7 ຂອງລາຍການ ແລະ ມືອັນດັບ 18 ຂອງໂລກ ຈາກອົດສະຕຣາລີ.
ເຊັດທຳອິດທັງຄູ່ຫຼິ້ນກັນໄດ້ຢ່າງສູສີ ແລະ ຮັກສາເກມເສີບຂອງຕົນເອງໄດ້ຢ່າງໜຽວແໜ້ນ ຈົນມາເຖິງໃນໄລຍະທ້າຍເຊັດທຳອິດກາຍເປັນ ອັນຄາຣາດ ມາຊີງເບຣກເກມເສີບ ເດີມິນໍ ໄດ້ໃນເກມທີ 9 ແລ້ວກັບມາເປັນຝ່າຍເສີບ ກ່ອນເອົາຊະນະໄປໄດ້ທີ່ 6-4. ສ່ວນເຊັດສອງ ໄລຍະຕົ້ນເກມທັງຄູ່ເນັ້ນການຕີບານເລເປັນຫຼັກ ແຕ່ ເດີມິນໍ ມາພາດຕີເສຍເອງໃນເກມທີ 5 ເຮັດໃຫ້ຖືກເບຣກເກມເສີບຈົນ ອັນຄາຣາດ ຂຶ້ນນຳ 3-2 ແລ້ວ ອັນຄາຣາດ ຮັກສາຟອມການຫຼິ້ນໄດ້ຢ່າງໂດດເດັ່ນ ແລະ ເອົາຊະນະໄປໄດ້ 6-4 ເກມ ລວມເປັນຊະນະ 2-0 ເຊັດ ຄວ້າແຊ໋ມໄປຄອງໄດ້ສຳເລັດ ແລະ ເປັນແຊ໋ມເອທີພີ ທົວ ລາຍການທີ 9 ຂອງເຈົ້າຕົວ ພ້ອມຮັບເງິນລາງວັນ 477.795 ເອີໂຣ. ຂະນະທີ່ ອະເລັກ ເດີມິນໍ ຮອງແຊ໋ມຮັບເງິນລາງວັນ 220.800 ເອີໂຣ.
ຈາກການຄວ້າແຊ໋ມລາຍການນີ້ຂອງຄາລອດ ອັນຄາຣາດ ຈະເຮັດໃຫ້ເຂົ້າກັບຂຶ້ນມາໄປຄອງມື 1 ຂອງໂລກອີກຄັ້ງ ໃນການຈັດອັນດັບນັກເທັນນິດປະເພດຊາຍດ່ຽວ ໃນວັນທີ 26 ມິຖຸນາ 2023.
ຮຽບຮຽງໂດຍ: ພອນເພັດ ບຸນຄ້ຳ
