ວິທະຍຸກະຈາຍສຽງຫວຽດນາມລາຍງານວ່າ: ເມື່ອບໍ່ດົນມານີ້ ທີ່ສຳນັກງານ ສປຊ ຢູ່ນະຄອນເຊີແນວ ປະເທດສະວິດ, ໄດ້ດຳເນີນກອງປະຊຸມສະພາເສດຖະກິດ-ສັງຄົມ ຂອງ ສປຊ ກ່ຽວກັບບັນດາການເຄື່ອນໄຫວຊ່ວຍເຫຼືອມະນຸດສະທຳ ປີ 2023. ກອງປະຊຸມລວມມີບັນດາວາລະປຶກສາຫາລື ກ່ຽວກັບການແກ້ໄຂສະພາບການການຂາດແຄນສະບຽງອາຫານ ແລະ ຄວາມສ່ຽງເກີດໄພອຶດຫິວໃນໂລກ ດ້ວຍການເຂົ້າຮ່ວມຂອງ ທ່ານນາງ ເລທິຕວຽດມາຍ ເອກອັກຄະລັດຖະທູດ ຫົວໜ້າຄະນະຜູ້ຕາງໜ້າ ຫວຽດນາມ ປະຈຳ ສປຊ, ອົງການການຄ້າໂລກ (WTO) ແລະ ບັນດາອົງການຈັດຕັ້ງສາກົນຕ່າງໆຢູ່ເຊີແນວ.
ທ່ານນາງ ເລທິຕວຽດມາຍ ຢັ້ງຢືນວ່າ: ຫວຽດນາມ ພ້ອມແລ້ວທີ່ຈະເຂົ້າຮ່ວມບັນດາຄວາມພະຍາຍາມຂອງປະຊາຄົມສາກົນ ໃນການຄ້ຳປະກັນດ້ານສະບຽງອາຫານໂລກ, ແກ້ໄຂບັນດາສິ່ງທ້າທາຍຢ່າງຮີບດ່ວນກ່ຽວກັບການຂາດແຄນສະບຽງອາຫານ ທີ່ພວມເພີ່ມຂຶ້ນ, ກໍຄືແບ່ງປັນບົດຮຽນປະສົບການ ກັບບັນດາປະເທດໃນການຄ້ຳປະກັນດ້ານສະບຽງອາຫານແຫ່ງຊາດ. ຫວຽດນາມ ແບ່ງປັນຄວາມສົນໃຈ ແລະ ຄຳໝັ້ນສັນຍາເຂົ້າຮ່ວມພ້ອມກັບປະຊາຄົມສາກົນ ໃນການແກ້ໄຂວິກິດການຄວາມໝັ້ນຄົງດ້ານສະບຽງອາຫານທົ່ວໂລກ ທີ່ພວມນາບຂູ່ໂດຍກົງຕໍ່ຊີວິດການເປັນຢູ່ຂອງປະຊາຊົນນັບແສນຄົນໃນໂລກ, ເປັນຕົ້ນແມ່ນຢູ່ບັນດາປະເທດດ້ອຍພັດທະນາ ແລະ ບັນດາປະເທດທີ່ຖືກຜົນກະທົບຈາກການປະທະກັນ, ໄພພິບັດ, ພະຍາດລະບາດ ຫຼື ການປ່ຽນແປງຂອງດິນຟ້າອາກາດ. ໃນການແກ້ໄຂສິ່ງທ້າທາຍທົ່ວໂລກ ກ່ຽວກັບການຂາດແຄນສະບຽງອາຫານ, ທ່ານນາງ ເລທິຕວຽດມາຍ ຖືວ່າ: ຕ້ອງຊຸກຍູ້ການຮ່ວມມືຫຼາຍຝ່າຍ ແລະ ຄວາມໝັ້ນຄົງສາກົນເພື່ອຊອກຫາມາດຕະການແກ້ໄຂຢ່າງຮອບດ້ານ ແລະ ທົ່ວໂລກ.
