ສຳນັກຂ່າວຊິນຮວາຂອງ ສປຈີນ, ວັນທີ 25 ມິຖຸນາ, ສະມາຄົມເພື່ອການໂທລະຄົມທາງການເງິນ ລະຫວ່າງທະນາຄານ ທົ່ວໂລກ ຫລື ສະວີຟ (SWIFT) ລາຍງານວ່າ: ສະກຸນເງິນ ຫລຽນຫມິນປີ້ (RMB) ຫລື ເງິນຢວນ ຂອງ ຈີນ ກວມເອົາສ່ວນແບ່ງສະກຸນເງິນທີ່ໃຊ້ງານໃນທົ່ວໂລກເພີ່ມຂຶ້ນ ໃນເດືອນພືດສະພາ ຜ່ານມາ. ສະກຸນເງິນຢວນ ຄອງອັນດັບ 5 ດ້ານ ໃນການໃຊ້ຈ່າຍ ລະຫວ່າງ ປະເທດ ດ້ວຍສ່ວນແບ່ງ 2,54% ໃນເດືອນພືດສະພາ, ເພີ່ມຂຶ້ນຈາກ 2,29% ໃນເດືອນເມສາ ຜ່ານມາ. ດ້ວຍມູນຄ່າ ການຊຳລະເງິນຢວນ ເພີ່ມຂຶ້ນ 20,38% ຈາກ ເດືອນເມສາ, ໃນຂະນະທີ່ ມູນຄ່າ ການຊໍາລະເງິນ ທັງໝົດ ໂດຍພາບລວມ ເພີ່ມຂຶ້ນ 8,75%. ສະກຸນ ເງິນຢວນ ຄອງອັນດັບ 6 ດ້ານ ໃນການຊໍາລະເງິນ ລະຫວ່າງປະເທດ (ຖ້າຫາກ ບໍ່ຄິດໄລ່ລວມ ການຊໍາລະເງິນ ພາຍໃນ ເອີໂຣໂຊນ) ດ້ວຍສ່ວນແບ່ງ 1,51%. ນອກນັ້ນ ເຂດບໍລິຫານພິເສດ ຮົງກົງ ຂອງ ຈີນ ເປັນຕະຫລາດ ຂະໜາດໃຫຍ່ທີ່ສຸດ ສຳລັບ ການເຮັດທຸລະກຳເງິນຢວນ ດ້ວຍອັດຕາສ່ວນ 73,48%, ຖັດມາແມ່ນ ອັງກິດ 5,17% ແລະ ສິງກະໂປ 3,84%. /.
