ຂ່າວຕ່າງປະເທດລາຍງານ ເມື່ອທ້າຍອາທິດຜ່ານມາ, ກະຊວງການຕ່າງປະເທດຍີ່ປຸ່ນໄດ້ເປີດເຜີຍບົດລາຍງານໂດຍລະບຸວ່າ: ທາງການຍີ່ປຸ່ນໄດ້ອອກວີຊາ 1,29 ລ້ານສະບັບ ໃຫ້ກັບຄົນຕ່າງປະເທດໃນປີ 2022 ຜ່ານມາ ເພີ່ມຂຶ້ນປະມານ 14 ເທົ່າຈາກປີ 2021 ຫຼັງຈາກມີການຍົກເລີກມາດຕະການຄວບຄຸມການເດີນທາງຂ້າມປະເທດ ເພື່ອປ້ອງກັນພະຍາດໂຄວິດ-19.
ກະຊວງການຕ່າງປະເທດຂອງຍີ່ປຸ່ນລະບຸວ່າ: ລວມຍອດດັ່ງກ່າວຍັງຫ່າງຈາກສະຖິຕິສູງທີ່ສຸດກ່ອນເກີດພະຍາດໂຄວິດ-19 ທີ່ 8,28 ລ້ານສະບັບໃນປີ 2019 ແຕ່ໂຕເລກນີ້ເພີ່ມຂຶ້ນໃນຮອບ 3 ປີ ຫຼັງຈາກຍີ່ປຸ່ນຜ່ອນຄາຍມາດຕະການຄວບຄຸມການເດີນທາງຂ້າມປະເທດທີ່ກ່ຽວຂ້ອງກັບການປ້ອງກັນພະຍາດໂຄວິດ-19 ໃນເດືອນເມສາຜ່ານມາ. ຈຳນວນວີຊາເຂົ້າຍີ່ປຸ່ນຫຼຸດລົງຢ່າງວ່ອງໄວໃນໄລຍະພະຍາດໂຄວິດ-19 ແຜ່ລະບາດ ຫຼຸດລົງເຫຼືອ 1,12 ລ້ານສະບັບໃນປີ 2020 ຊຶ່ງເປັນປີທີ່ຍີ່ປຸ່ນເລີ່ມເຂັ້ມງວດມາດຕະການຄວບຄຸມການເດີນທາງຂ້າມປະເທດ ແລະ ຫຼຸດລົງເຫຼືອ 90.306 ສະບັບໃນປີ 2021 ຊຶ່ງເປັນໂຕເລກທີ່ຕໍ່າທີ່ສຸດນັບຕັ້ງແຕ່ມີຂໍ້ມູນທີ່ປຽບທຽບກັນໄດ້ໃນປີ 1999.
ໃນປີ 2022 ຜ່ານມາ, ມີການອອກວີຊາໃນຈີນ ຈຳນວນ 186.577 ສະບັບ ຫຼື ຄິດເປັນ 14% ຂອງວີຊາທັງໝົດ ຮອງລົງມາແມ່ນຫວຽດນາມ ຈຳນວນ 177.329 ສະບັບ, ຟີລິບປິນ ຈຳນວນ 134.607 ສະບັບ, ສ ເກົາຫຼີ ຈຳນວນ 104.937 ສະບັບ, ອິນໂດເນເຊຍ ຈຳນວນ 92.663 ສະບັບ ແລະ ອາເມຣິກາ ຈຳນວນ 88.557 ສະບັບ.
