ຂ່າວຕ່າງປະເທດລາຍງານ ໃນວັນທີ 19 ມິຖຸນາ ຜ່ານມາ ວ່າ: ຟົສຟໍຣັສ ເປັນອົງປະກອບທາງເຄມີທີ່ສຳຄັນສຳລັບຂະບວນການທາງຊີວະວິທະຍາ ຖືເປັນແຮ່ທາດພື້ນຖານຂອງໂຄງສ້າງດີເອັນເອ ຫຼື ສານພັນທຸກຳ ຈັດເປັນສ່ວນສຳຄັນຂອງເຫຍື່ອຫຸ້ມເຊລ ແລະ ໂມເລກຸນທີ່ນຳພາພະລັງງານໂດຍມີຢູ່ໃນສິ່ງມີຊີວິດທຸກຮູບແບບເທິງໂລກ.
ນັກວິທະຍາສາດ ກວດພົບ ຟົສຟໍຣັສ ທີ່ມີຄວາມເຂັ້ມຂຸ້ນສູງໃນເມັດນໍ້າກ້ອນ ທີ່ພົ່ນອອກມາຈາກມະຫາສະໝຸດພາຍໃນຂອງດວງຈັນເອັນເຊລາດັສ ທີ່ເປັນບໍລິວານຂອງດາວເສົາ ສະຖານທີ່ໆເຊື່ອວ່າຈະຊ່ວຍໃນການກັກເກັບສິ່ງມີຊີວິດໄວ້ ການຄົ້ນພົບນີ້ອີງຕາມຂໍ້ມູນທີ່ຮວບຮວມໂດຍຍານອະວະກາດແຄສສິນີ ຂອງອົງການນາຊາ ສະຫະລັດອາເມຣິກາ ເປັນຍານລຳທຳອິດທີ່ໂຄຈອນຮອບດາວເສົາດົນເຖິງ 13 ປີ ຕັ້ງແຕ່ປີ 2004 – 2017 ຍານບໍ່ໄດ້ພຽງແຕ່ເກັບຂໍ້ມູນຮູບຮ່າງຂອງດາວເສົາທີ່ຖືວ່າເປັນດາວເຄາະໃຫຍ່ ຍັງເກັບຂໍ້ມູນວົງແຫວນທີ່ອ້ອມຮອບດາວ ແລະ ເກັບຂໍ້ມູນດວງຈັນ ບໍລິເວນຂອງດາວເສົາດ້ວຍເຊັ່ນກັນ ຊຶ່ງດວງຈັນເອັນເຊລາດັສ ອາດຈະມີສິ່ງມີຊີວິດເຊັ່ນຈຸລິນຊີພໍຢູ່ອາໄສໄດ້.
ນັກວິທະຍາສາດດາວເຄາະ ແຫ່ງມະຫາວິທະຍາໄລເສລີ ໃນນະຄອນຫຼວງເບີລິນ ປະເທດເຢຍລະມັນ ກ່າວວ່າ: ນີ້ເປັນຄັ້ງທຳອິດທີ່ທາດສຳຄັນຊະນິດນີ້ຖືກຄົ້ນພົບໃນມະຫາສະໝຸດນອກໂລກ ຊຶ່ງກ່ອນໜ້ານັ້ນທີມນັກວິທະຍາສາດຊຸດດຽວກັນນີ້ ເຄີຍຢືນຢັນວ່າເມັດນໍ້າກ້ອນເທິງດວງຈັນເອັນເຊລາດັສ ມີແຮ່ທາດ ແລະ ສານປະກອບອິນຊີ ທີ່ຊັບຊ້ອນຫຼາຍຢ່າງ ລວມເຖິງສ່ວນປະສົມຂອງກົດອະມິໂນ ທີ່ກ່ຽວຂ້ອງກັບສິ່ງມີຊີວິດ.
