ກອງປະຊຸມເປີດກວ້າງຄົບຄະນະກາງສະໄໝຂອງຄະນະບໍລິຫານງານພັກກະຊວງຍຸຕິທຳ ສະໄໝທີ V ໄດ້ຈັດຂຶ້ນໃນວັນທີ 19 ມິຖຸນາ ນີ້ ທີ່ກະຊວງຍຸຕິທຳ ໂດຍການເຂົ້າຮ່ວມຂອງ ສະຫາຍນາງ ສູນທອນ ໄຊຍະຈັກ ຄະນະເລຂາທິການສູນກາງພັກ ຮອງປະທານສະພາແຫ່ງຊາດ, ມີ ສະຫາຍນາງ ບຸດສະດີ ທະນະເມືອງ ກໍາມະການສູນກາງພັກ ຮອງຫົວໜ້າຄະນະຈັດຕັ້ງສູນກາງພັກ, ມີບັນດາຄະນະພັກ, ສະມາຊິກພັກເຂົ້າຮ່ວມ.
ສະຫາຍ ໄພວີ ສີບົວລິພາ ກຳມະການສູນກາງພັກ ເລຂາຄະນະບໍລິຫານງານພັກ ລັດຖະມົນຕີກະຊວງຍຸຕິທຳກ່າວວ່າ: ຕະຫຼອດໄລຍະ 2 ປີເຄິ່ງຜ່ານມາ, ຄະນະບໍລິຫານງານພັກກະຊວງຍຸຕິທໍາໄດ້ເອົາໃຈໃສ່ນໍາພາ-ຊີ້ນໍາ ການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ (2021-2025) ຄັ້ງທີ IX ຂອງລັດ ກໍຄືມະຕິກອງປະຊຸມໃຫຍ່ຄັ້ງທີ V ຂອງອົງຄະນະພັກກະຊວງ, ແຜນພັດທະນາຂະແໜງການຍຸຕິທຳ 5 ປີ (2021-2025) ເຮັດໃຫ້ຂະແໜງການຍຸຕິທຳໄດ້ຮັບການພັດທະນາ ແລະ ປັບປຸງໃຫ້ດີຂຶ້ນເທື່ອລະກ້າວ, ສາມາດເຮັດຫຼ້ອນໜ້າທີ່ໃນການເປັນເສນາທິການໃຫ້ແກ່ຄະນະພັກ, ອົງການປົກຄອງລັດແຕ່ລະຂັ້ນກ່ຽວກັບວຽກງານກົດໝາຍ ແລະ ຍຸຕິທຳ, ບັນດາກົດໝາຍໄດ້ເຊື່ອມຊຶມເຂົ້າສູ່ການດຳລົງຊີວິດປະຈຳວັນຂອງປະຊາຊົນບັນດາເຜົ່າ ແລະ ຊັ້ນຄົນຕ່າງໆ ໃນສັງຄົມຢ່າງກວ້າງຂວາງ. ອັນພົ້ນເດັ່ນແມ່ນຂະບວນການເຄື່ອນໄຫວວຽກງານຍຸຕິທຳຮາກຖານໄດ້ຮັບການຂະຫຍາຍຕົວຢ່າງຕໍ່ເນື່ອງ ຊຶ່ງໃນປີ 2023 ນີ້, ກະຊວງຍຸຕິທຳໄດ້ນໍາສົ່ງພະນັກງານນໍາພາ-ຄຸ້ມຄອງຈຳນວນ 17 ສະຫາຍ ລົງສົມທົບກັບພະແນກຍຸຕິທໍາທ້ອງຖິ່ນເພື່ອກໍ່ສ້າງຮາກຖານການເມືອງ, ມາເຖິງປັດຈຸບັນເຫັນວ່າສະຕິເຄົາລົບກົດໝາຍຢູ່ໃນສັງຄົມ ພວມໄດ້ຮັບການເຊີດຊູຂຶ້ນຢ່າງບໍ່ຢຸດຢັ້ງ, ການເຂົ້າເຖິງກົດໝາຍ ແລະ ຂະບວນການຍຸຕິທຳຂອງປະຊາຊົນບັນດາເຜົ່າ ນັບມື້ນັບຫຼາຍຂຶ້ນ ແລະ ພວມກ້າວໄປສູ່ລວງເລິກ ອັນໄດ້ກາຍເປັນພື້ນຖານທີ່ໜັກແໜ້ນໃຫ້ແກ່ການເສີມຂະຫຍາຍປະຊາທິປະໄຕ ແລະ ການປະຕິບັດສິດເປັນເຈົ້າໃນທຸກດ້ານຂອງປະຊາຊົນບັນດາເຜົ່າ.
ໃນພິທີໄດ້ສຳຫຼວດກວດກາຄືນຄວາມຮັບຜິດຊອບການເມືອງຕໍ່ກັບການຊີ້ນໍາ-ນໍາພາລວມ ແລະ ກວດກາຄວາມຮັບຜິດຊອບຂອງບຸກຄົນໃນຄະນະພັກຕາມການແບ່ງງານ, ແບ່ງຄວາມຮັບຜິດຊອບ. ນອກຈາກນັ້ນໄດ້ມີການທາບທາມຢັ່ງຫາງສຽງຄວາມເຊື່ອໝັ້ນໄວວາງໃຈຕໍ່ການນໍາພາລວມ ແລະ ບຸກຄົນໃນຄະນະບໍລິຫານງານພັກ, ຊອກໃຫ້ເຫັນດ້ານຕັ້ງໜ້າທີ່ຈະເສີມຂະຫຍາຍ, ດ້ານອ່ອນຂໍ້ຄົງຄ້າງທີ່ຈະຕ້ອງແກ້ໄຂ, ປັບປຸງຍົກສູງຄວາມຮັບຜິດຊອບການເມືອງ ກໍຄືການປະຕິບັດໜ້າທີ່ຂອງແຕ່ລະສະຫາຍ ເພື່ອເປັນການປະຕິບັດຫຼັກການໆຕໍານິຕິຊົມຕົນເອງ ແລະ ຕິຊົມຊຶ່ງກັນ ແລະ ກັນພາຍໃນພັກ, ເປັນໃຈກາງຫຼັກແຫຼ່ງໃຫ້ແກ່ການປັບປຸງກໍ່ສ້າງພັກໃຫ້ປອດໃສ, ເຂັ້ມແຂງ, ໜັກແໜ້ນ.
ໃນໂອກາດນີ້, ສະຫາຍນາງ ບຸດສະດີ ທະນະເມືອງ ໄດ້ຂຶ້ນຜ່ານຄຳສັ່ງຂອງຄະນະເລຂາທິການສູນກາງພັກ ເລກທີ 268/ຄລສພ, ລົງວັນທີ 20 ມັງກອນ 2023 ວ່າດ້ວຍການດຳເນີນກອງປະຊຸມຄົບຄະນະກາງສະໄໝຂອງຄະນະບໍລິຫານງານພັກແຕ່ລະຂັ້ນ, ຜ່າມມາດຖານຂອງພະນັກງານນຳພາ-ຄຸ້ມຄອງ, ສິດ ແລະ ໜ້າທີ່ຂອງຄະນະພັກ, ຂໍ້ຫ້າມສຳລັບສະມາຊິກພັກ. ໃນໂອກາດນີ້, ສະຫາຍນາງ ສູນທອນ ໄຊຍະຈັກ ໄດ້ມີຄຳເຫັນຕໍ່ການທາບທາມຢັ່ງຫາງສຽງຄວາມເຊື່ອໜັ້ນໄວ້ວາງໃຈຕໍ່ການນຳພາລວມ ແລະ ບຸກຄົນໃນຄະນະບໍລິຫານງານພັກ ກະຊວງຍຸຕິທຳ ເພື່ອໃຫ້ພະນັກງຫຼັກແຫຼ່ງໄດ້ປະກອບຄຳຄິດຄຳເຫັນຂອງຕົນ ຕໍ່ຄວາມຮັບຜິດຊອບລວມຂອງຄະນະພັກໂດຍສະເພາະໃຫ້ລົງເລິກປະກອບຄິດຄຳເຫັນໃຫ້ບັນດາສະຫາຍຄະນະພັກດ້ວຍຄວາມຈິງໃຈ ເພື່ອຊ່ວຍປັບປຸງກໍ່ສ້າງພະນັກງານນຳພາຄຸ້ມຄອງຂອງຕົນໃຫ້ມີຄວາມປອດໃສເຂັ້ມແຂງ, ໜັກແໜ້ນຮອບດ້ານ, ການປະກອບຄຳຄິດຄຳເຫັນຕຳນິສົ່ງຂ່າວ ເພື່ອຊ່ວຍໃຫ້ພະນັກງານນຳພາຄຸ້ມຄອງໄດ້ປັບປຸງປ່ຽນແປງຕົນເອງ, ແກ້ໄຂຈຸດອ່ອນ ແລະ ຂໍ້ຄົງຄ້າງເພື່ອກ້າວຂຶ້ນເຮັດສຳເລັດໜ້າທີ່ໆພັກ-ລັດມອບໝາຍໃຫ້.
ຂ່າວ-ພາບ: ບຸນຕອມ
