ສວນພຶກສາ ໄດ້ຮ່ວມກັບຫລາຍພາກສ່ວນກ່ຽວຂ້ອງ ສຶກສາຄົ້ນຄວ້າເປັນເວລາ 30 ກວ່າປີກ່ຽວກັບການດໍາລົງຊີວິດ ແລະ ວັດທະນະທໍາ ຮີດຄອງປະເພນີບັນດາຊົນເຜົ່າ ໃນທົ່ວປະເທດ ລວມທັງໝົດ 50 ຊົນເຜົ່າ ເພື່ອໂຮມເຂົ້າມາສ້າງເປັນຫ້ອງວາງສະແດງຊົນເຜົ່າໄວ້ໃນສວນພຶກສາ ໃຫ້ນັກທ່ອງທ່ຽວທັງພາຍໃນ ແລະ ຕ່າງປະເທດ ເຂົ້າມາທ່ຽວຊົມ ແລະ ຮຽນຮູ້ ວັດທະນະທຳທີ່ເປັນເອກະລັກຂອງແຕ່ລະຊົນເຜົ່າ ທີ່ສັງຮວມໄວ້ໃນຈຸດດຽວກັນ.
ທ່ານ ພູວົງ ພະມີສິດ ປະທານ ສວນພຶກສາ ໄດ້ໃຫ້ສໍາພາດຕໍ່ນັກຂ່າວ ສຳນັກຂ່າວສານປະເທດລາວ ເມື່ອບໍ່ດົນນີ້ວ່າ: ສວນພຶກສາ ເປັນສະຖານທີ່ທ່ອງທ່ຽວທໍາມະຊາດ ຕິດພັນກັບການອະນຸລັກຮັກສາວັດທະນາທໍາຮີດຄອງປະເພນີອັນດີງາມຂອງປະຊາຊົນລາວບັນດາເຜົ່າ ແລະ ໄດ້ເອົາໃຈໃສ່ກໍ່ສ້າງພ້ອມທັງປັບປຸງ ແລະ ພັດທະນາຢ່າງຕໍ່ເນື່ອງ ເຮັດໃຫ້ພາຍໃນສວນພຶກສາ ມີຫລາຍກິດຈະກໍາການ ທ່ອງທ່ຽວທີ່ສຳຄັນ ແລະ ໂດດເດັ່ນ. ປັດຈຸບັນ, ສວນພຶກສາກຳລັງສ້າງຫ້ອງວາງສະແດງຊົນເຜົ່າ ໂດຍມີຈຸດ ປະສົງເພື່ອອະນຸລັກວັດທະນາທໍາ ແລະ ຮີດຄອງປະເພນີອັນດີງາມຂອງແຕ່ລະເຜົ່າ ໃຫ້ນັກຮຽນຮູ້ປັນຍາຊົນ ໄດ້ສຶກສາຮຽນຮູ້ກ່ຽວກັບຮີດຄອງປະເພນີ, ການດໍາລົງຊີວິດທີ່ມີຄວາມແຕກຕ່າງກັນ ແລະ ເປັນເອກະລັກສະເພາະຂອງໃຜລາວ. ນອກນັ້ນ, ຈະໄດ້ປຸກເຮືອນຂອງແຕ່ລະເຜົ່າ ໂດຍປຸກສ້າງຈາກນ້ອຍຫາໃຫຍ່ຈົນຄົບແຕ່ລະເຜົ່າ ເພື່ອເພີ່ມຄວາມໂດດເດັ່ນຂອງສວນ ແລະ ຮວບຮວມເອົາການດໍາລົງຊີວິດ, ວັດທະນະທໍາຂອງບັນດາເຜົ່າ ທີ່ມີຄວາມສວຍງາມໄວ້ໃນຈຸດດຽວ ດັ່ງຄໍາເວົ້າຂອງ ປະທານ ໄກສອນ ພົມວິຫານ ທີ່ວ່າ: “ຊົນເຜົ່າຕ່າງໆບ້ານເຮົາມີຫລາກຫລາຍ ປຽບເໝືອນດອກໄມ້ນາໆຊະນິດຢູ່ໃນສວນ ມີຄວາມງົດງາມ ແລະ ສົ່ງກິນຫອມຫວນແຕກຕ່າງກັນ” ເຊິ່ງການກໍ່ສ້າງດັ່ງກ່າວ, ມີຄວາມຄືບໜ້າ 50% ແລະ ຄາດວ່າຈະໃຫ້ສໍາເລັດໃນທ້າຍປີ 2023 ເພື່ອໃຫ້ທັນກັບປີທ່ອງທ່ຽວລາວ 2024.
ທ່ານ ພູວົງ ພະມີສິດ ໃຫ້ຮູ້ອີກວ່າ: ການປັບປຸງ ແລະ ພັດທະນາສວນພຶກສາ ແມ່ນແທດເໝາະ ກັບການກະກຽມຕ້ອນຮັບປີທ່ອງທ່ຽວລາວ 2024 ເຊິ່ງສວນພຶກສາ ມີຄວາມພ້ອມ 100% ໃນການຕ້ອນຮັບນັກທ່ອງທ່ຽວທັງພາຍໃນ ແລະ ຕ່າງປະເທດ ໂດຍສະເພາະກນສ້າງຫ້ອງວາງສະແດງບັນດາ 50 ຊົນເຜົ່າຂອງລາວ ກໍຈະໃຫ້ສໍາເລັດທັນກັບປີທ່ອງທ່ຽວລາວ 2024, ພ້ອມນັ້ນ ຈະເອົາໃຈໃສ່ພັດທະ ນາ ແລະ ປະດັບປະດາບໍລິເວນອ້ອມຮອບສວນ ໃຫ້ມີຄວາມໂດດເດັ່ນເພີ່ມຂຶ້ນ ແນໃສ່ດຶງດູດນັກທ່ອງທ່ຽວໃຫ້ເຂົ້າມາທ່ອງທ່ຽວ ສປປ ລາວ ກໍຄື ນະຄອນຫລວງວຽງຈັນ ນັບມື້ເພີ່ມຂຶ້ນ, ພ້ອມທັງສ້າງວຽກເຮັດງານທໍາ ແລະ ສົ່ງອອກກັບທີ່ ເຮັດໃຫ້ເງິນຕາຕ່າງປະເທດເຂົ້າມາຫລາຍທີ່ສຸດ, ປະຊາຊົນມີລາຍຮັບ ແລະ ມີຊີວິດການເປັນຢູ່ທີ່ດິຂຶ້ນ.
ຂ່າວ-ພາບ: ວຽງສະຫວັນ
