ແມນເຊັສເຕີ ຊິຕີ ຄວ້າເງິນລາງວັນໄປເກືອບ 300 ລ້ານປອນ ຈາກສ່ວນແບ່ງເງິນລາງວັນ ຫຼັງຄວ້າ 3 ແຊັມມາຄອງໃນລະດູການນີ້.
ແມນເຊັສເຕີ ຊິຕີ ຫາກໍປະກາດສັກດາ ຄວ້າມາ 3 ແຊັມຢ່າງຍິ່ງໃຫຍ່ເປັນສະໄໝທຳອິດຂອງສະໂມສອນ ຫຼັງຈາກຄວ້າແຊັມລາຍການທີ 3 ຂອງລະດູການນີ້ໃນການແຂ່ງຂັນເຕະບານ UEFA Champions League ທີ່ເອົາຊະນະ ອິນເຕີ ມິລານ 1-0 ເມື່ອວັນເສົາທີ່ຜ່ານມາ.
Telegraph ສື່ຊື່ດັງຂອງອັງກິດເປີດເຜີຍວ່າ: ເງິນລາງວັນທີ່ ແມນເຊັສເຕີ ຊິຕີ ໄດ້ຮັບຈາກການຄວ້າທັງ 3 ລາຍການນັ້ນ ລວມມີຫຼາຍເຖິງ 294 ລ້ານປອນ.
ແມນເຊສເຕີ ຊີຕີ ໄດ້ຮັບເງິນລາງວັນຈາກພຣີເມຍລີກຫຼາຍສຸດທີ່ 180 ລ້ານປອນ ໃນຂະນະທີ່ເງິນລາງວັນແຊມຢູຟ່າ ແຊັມປຽນລີກ ຢູ່ທີ່ 110 ລ້ານປອນ ແລະ ໄດ້ເງິນລາງວັນອີກ 4 ລ້ານປອນໃນຖານະແຊັມ FA Cup.
ທັງນີ້ ຈໍານວນເງິນ 294 ລ້ານປອນ ເປັນລາຍໄດ້ສະເພາະເງິນລາງວັນພຽງຢ່າງດຽວ ບໍ່ລວມລິຂະສິດການຖ່າຍທອດສົດ ຄ່າ ບັດຜ່ານປະຕູ ຫຼືລາຍຮັບອື່ນໆ ຈາກການແຂ່ງຂັນໃນແຕ່ລະລາຍການ.
