ຄະນະບໍລິຫານງານຊາວໜຸ່ມປະຊາຊົນປະຕິວັດລາວ (ຄຊປປລ) ກະຊວງສຶກສາທິການ ແລະ ກິລາ (ສສກ) ໄດ້ຈັດກອງປະຊຸມຄົບຄະນະກາງສະໄໝທີ VIII (2020-2023) ແລະ ຈັດພິທີມອບຮັບ ຫຼຽນກາລະນຶກ 65 ປີ ວັນສ້າງຕັ້ງ ຄຊປປລ ເມື່ອບໍ່ດົນມານີ້ ທີ່ມະຫາວິທະຍາໄລແຫ່ງຊາດ, ໂດຍການເປັນປະທານຂອງສະຫາຍ ປອ ຕຸດາວັນ ໜໍ່ເມືອງເສດ ເລຂາທິການສູນກາງຊາວໜຸ່ມປະຊາຊົນປະຕິວັດລາວ (ສຊປລ), ຄະນະພັກກະຊວງ, ເລຂາ ຄຊປປລ ກະຊວງສຶກສາທິການ ແລະ ກິລາ, ຊຶ່ງໃຫ້ກຽດເຂົ້າຮ່ວມຂອງສະຫາຍ ຮສ.ປອ ພຸດ ສິມມາລາວົງ ກຳມະການສູນກາງພັກ, ເລຂາຄະນະບໍລິຫານງານພັກ, ລັດຖະມົນຕີ ກະຊວງສຶກສາທິການ ແລະ ກິລາ, ສະຫາຍ ມອນໄຊ ລາວມົວຊົ່ງ ກໍາມະການສໍາຮອງສູນກາງພັກປະຊາຊົນປະຕິວັດລາວ, ເລຂາຄະນະບໍລິຫານງານ ສູນກາງຊາວໜຸ່ມປະຊາຊົນປະຕິວັດລາວ, ສະຫາຍ ຮສ.ປອ ອຸດົມ ພອນຄຳເພັງ ເລຂາຄະນະພັກ, ອະທິການບໍດີ ມະຫາວິທະໄລແຫ່ງຊາດ, ພ້ອມດ້ວຍຄະນະບໍລິຫານງານຊາວໜຸ່ມອ້ອມຂ້າງກະຊວງສຶກສາທິການ ແລະ ກິລາ, ອະດີດການນໍາຊາວໜຸ່ມກະຊວງສຶກສາທິການ ແລະ ກິລາ, ຕະຫຼອດຮອດແຂກທີ່ຖືກເຊີນຢ່າງພ້ອມພຽງ.
ໃນກອງປະຊຸມ, ສະຫາຍ ສີສຸພັນ ພົມມະນີວົງ ກໍາມະການສູນກາງຊາວໜຸ່ມ, ຮອງເລຂາ ຄຊປປລ ກະຊວງສຶກສາທິການ ແລະ ກິລາ ໄດ້ຕາງໜ້າຄະນະຜ່ານລາຍງານການເມືອງກາງສະໄໜຂອງຄະນະບໍລິຫານງານຊາວໝຸ່ມ ກະຊວງ ສສກ ໂດຍຕີລາຄາສະພາບການຈັດຕັ້ງປະຕິບັດມະຕິກອງປະຊຸມໃຫຍ່ຜູ້ແທນຊາວໝຸ່ມກະຊວງສຶກສາທິການ ແລະ ກິລາ ກາງສະໄໝທີ VIII (2020-2023) ໃຫ້ຊາບວ່າ: ຄຊປປລ ກະຊວງສຶກສາທິການ ແລະ ກິລາ ເປັນອົງການຈັດຕັ້ງມະຫາຊົນໜຶ່ງ ທີ່ເຄື່ອນໄຫວພາຍໃຕ້ການຊີ້ນໍາ-ນໍາພາຂອງຄະນະພັກ ກະຊວງ ສສກ ແລະ ສູນກາງຊາວໜຸ່ມປະຊາຊົນປະຕິວັດລາວ, ມີຄະນະບໍລິຫານງານ 23 ສະຫາຍ, ຍິງ 5 ສະຫາຍ, ປະກອບມີ 4 ຄະນະບໍລິຫານງານຂຶ້ນກັບ ຄື: ຄຊປປລ ມະຫາວິທະຍາໄລແຫ່ງຊາດ, ວິທະຍາໄລອ້ອມຂ້າງກະຊວງ, ສໍານັກກະຊວງ ແລະ ຄຊປປລ ສະມາຄົມການສຶກສາພາກເອກະຊົນ. ໃນນັ້ນ, ປະກອບມີ 41 ຮາກຖານ, 27 ໜ່ວຍຮາກຖານ, 145 ໜ່ວຍທີ່ຂຶ້ນກັບຮາກຖານ ແລະ ມີສະມາຊິກຊາວໜຸ່ມທັງໝົດ 21.966 ສະຫາຍ ຍິງ 9.255 ສະຫາຍ, ມີກອງເຍົາວະຊົນ 3 ກອງ, ມີສະມາຊິກຈໍານວນ 1.186 ນ້ອງ, ຍິງ 652 ນ້ອງ (ຂຶ້ນກັບຮາກຖານ ມຊ-ມສ ສາທິດ ແລະ ໂຮງຮຽນພອນສະຫວັນຊົນເຜົ່າກຽມມະຫາວິທະຍາໄລ) ແລະ ມີກອງເລຂາຊ່ວຍວຽກຊາວໜຸ່ມກະຊວງ ສສກ ຈໍານວນ 3 ສະຫາຍ, ຍິງ 1 ສະຫາຍ.
ຕະຫຼອດໄລຍະຜ່ານມາ ຄຊປປລ ກະຊວງສຶກສາທິການ ແລະ ກິລາ ໄດ້ຖືເອົາວຽກງານການສຶກສາອົບຮົມການເມືອງ-ແນວຄິດເປັນບັນຫາສຳຄັນ ໂດຍຕິດພັນກັບຂະບວນການເຄື່ອນໄຫວຂອງວຽກງານຊາວໜຸ່ມ ໂດຍສະເພາະແມ່ນສະມາຊິກຊາວໜຸ່ມທີ່ເປັນນັກຮຽນນັກສຶກສາໃຫ້ມີແນວຄິດອຸ່ນອ່ຽງທຸນທ່ຽງ, ມີຄວາມເຊື່ອໝັ້ນຕໍ່ການນຳພາ, ມີຄວາມສາມັກຄີຮັກແພງຊ່ວຍເຫຼືອເຊິ່ງກັນ ແລະ ກັນ, ເລັ່ງໃສ່ສະມາຊິກໃຫ້ມີສະຕິຕໍ່ການຈັດຕັ້ງ, ມີຄວາມຫ້າວຫັນ ແລະ ມີຄວາມຕື່ນຕົວສູງ ເພື່ອສະໝັກເຂົ້າຮ່ວມຂະບວນການສໍາຄັນຕ່າງໆຂອງຊາດ ກໍຄື ສສກ ແລະ ຮາກຖານຈັດຂຶ້ນຢ່າງສຸດກົກສຸດປາຍ, ຊຶ່ງສະແດງອອກໃນຫຼາຍໆຜົນງານທີ່ຍາດມາໄດ້ຕະຫຼອດໄລຍະຜ່ານມາ, ໂດຍທົ່ວໄປແລ້ວ ພະນັກງານ ແລະ ສາມາຊິກຊາວໜຸ່ມມີຄວາມເຊື່ອໝັ້ນຕໍ່ການນຳພາຂອງພັກ-ລັດ, ມີແນວຄິດອຸ່ນອ່ຽງທຸ່ນທ່ຽງຕໍ່ທຸກສະພາບການ, ມີຄວາມຮັບຜິດຊອບຕໍ່ວຽກງານທີ່ການຈັດຕັ້ງມອບໝາຍ, ໄດ້ຮັບການຊີ້ນໍາຢ່າງໃກ້ຊິດຈາກຄະນະພັກ ສສກ ຢ່າງຕໍ່ເນື່ອງ, ປັດໄຈທີ່ຕັດສິນກວ່າໝູ່ແມ່ນຄວາມຕັດສິນໃຈ, ຄວາມອົດທົນຜ່ານຜ່າຄວາມຫຍຸ້ງຍາກຕ່າງໆ ເສຍສະຫຼະເພື່ອສ່ວນລວມ ໂດຍສະເພາະໃນໄລຍະທີ່ມີການແຜ່ລະບາດຂອງພະຍາດ COVID-19 ໃນໄລຍະປີ 2020-2022, ລະບົບການຈັດຕັ້ງ, ການສ່ອງແສງລາຍງານໄດ້ຮັບການປະຕິບັດຢ່າງເປັນປົກກະຕິ. ນອກຈາກນັ້ນ, ໄດ້ຮັບການສະໜັບສະໜູນຈາກຄະນະພັກ ຄະນະນຳທຸກຂັ້ນທີ່ຄະນະຊາວໜຸ່ມແຕ່ລະຮາກຖານ, ແຕ່ລະຫ້ອງການ, ສູນ ແລະ ສະຖາບັນເປັນຢ່າງດີ. ຄຽງຄູ່ກັນນັ້ນ, ຍັງໄດ້ຮັບການຮ່ວມມືຢ່າງແໜ່ນແຟ້ນຈາກອົງການຈັດຕັ້ງສະຫະພັນກໍາມະບານ, ສະຫະພັນແມ່ຍິງ ມະຫາວິທະຍາໄລແຫ່ງຊາດ ແລະ ຂັ້ນຮາກຖານ.
ພ້ອມກັນນີ້, ຍັງໄດ້ມີພິທີປະດັບຫຼຽນກາລະນຶກ 65 ປີ ວັນສ້າງຕັ້ງຄະນະຊາວໜຸ່ມປະຊາຊົນປະຕິວັດລາວ (14 ເມາສາ 1955-14 ເມສາ 2020) ໃຫ້ແກ່ກົມກອງລວມໝູ່ ແລະ ບຸກຄົນ, ຄະນະນໍາກະຊວງ, ຄະນະບໍລິຫານງານຊາວໜຸ່ມ ແລະ ສະມາຊິກຊາວໜຸ່ມ ກະຊວງສຶກສາທິການ ແລະ ກິລາ ທີ່ມີຜົນງານດີເດັ່ນໃນການປະກອບສ່ວນວຽກງານຂອງຄະນະຊາວໜຸ່ມປະຊາຊົນປະຕິວັດລາວ ໃນໄລຍະທີ່ຜ່ານມາ ມີທັງໝົດ 164 ໜ່ວຍ.
ຫຼັງຈາກນັ້ນ, ຜູ້ເຂົ້າຮ່ວມຍັງໄດ້ຮັບຟັງການມີຄໍາເຫັນໂອ້ລົມຈາກຄະນະປະທານ ເພື່ອເປັນເຂັມຊີ້ທິດເຍືອງທາງໃນການຈັດຕັ້ງປະຕິບັດວຽກງານຊາວໜຸ່ມໃນຕໍ່ໜ້າ.
ຂໍ້ມູນໂດຍ ສື່ມວນຊົນລາວ
ຮຽບຮຽງໂດຍ ດາວຫວຽດ
