ທ່ານນາງ ເຂັມມະນີ ພົນເສນາ ຫົວໜ້າຫ້ອງວ່າການສໍານັກງານປະທານປະເທດ (ຫສປທ) ໄດ້ຕ້ອນຮັບການເຂົ້າຢ້ຽມຂໍ່ານັບອໍາລາຂອງ ທ່ານນາງ ຫຼຽວ ຊຸຍ ລິນ (Lecw Siu Lin) ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງສິງກະໂປ ປະຈໍາ ສປປ ລາວ ໃນວັນທີ 13 ມິຖຸນານີ້ ທີ່ ຫສປທ.
ໃນໂອກາດດັ່ງກ່າວ, ທ່ານ ນາງ ເຂັມມະນີ ພົນເສນາ ໄດ້ສະແດງຄວາມຕ້ອນຮັບ, ຊົມເຊີຍ ຕໍ່ ທ່ານ ນາງ ຫຼຽວ ຊຸຍ ລິນ ທີ່ໄດ້ມາປະຕິບັດໜ້າທີ່ການທູດ ຢູ່ ສປປ ລາວ ຈົນສໍາເລັດ ຊຶ່ງເປັນການປະກອບສ່ວນເສີມສ້າງສາຍພົວພັນມິດຕະພາບ ແລະ ການຮ່ວມມື ອັນສະໜິດແໜ້ນ ລະຫວ່າງ ສອງປະເທດ ລາວ-ສິງກະໂປ ທີ່ເຄີຍມີມາແລ້ວນັ້ນ ໃຫ້ນັບມື້ຂະຫຍາຍຕົວກ້າວເຂົ້າສູ່ລວງເລິກ. ທ່ານນາງເຂັມມະນີ ພົນເສນາ ໄດ້ສະແດງຄວາມຂອບໃຈ ພ້ອມທັງ ຕີລາຄາສູງຕໍ່ລັດຖະບານສິງກະໂປ ທີ່ໄດ້ປະກອບສ່ວນໃຫ້ການຊ່ວຍເຫຼືອ ສປປ ລາວ ໃນໄລຍະຜ່ານມາ, ຈາກນັ້ນ ຍັງໄດ້ອວຍໄຊໃຫ້ພອນແດ່ທ່ານນາງ ຫຼຽວ ຊຸຍ ລິນ ຈົ່ງມີຄວາມສຸກໃນໜ້າທີ່ວຽກງານໃໝ່ຂອງທ່ານ ແລະ ຈົ່ງເດີນທາງກັບປະ ເທດດ້ວຍຄວາມສະຫວັດດີພາບ.
ນອກຈາກນັ້ນ, ທ່ານ ນາງ ຫຼຽວ ຊຸຍ ລິນ ໄດ້ສະແດງຄວາມຂອບໃຈຕໍ່ ທ່ານ ນາງ ເຂັມມະນີ ພົນເສນາ ທີ່ໄດ້ໃຫ້ການຕ້ອນຮັບອັນອົບອຸ່ນໃນຄັ້ງນີ້. ສິງກະໂປ ສ້າງຕັ້ງສາຍພົວພັນການທູດກັບ ສປປ ລາວ ໃນວັນທີ 2 ທັນວາ 1974.
(ຂ່າວ-ພາບ: ແສງຈັນ)
