ພິທີມອບທຸງໄຊນຳໜ້າຂະບວນການແຂ່ງຂັນ 4 ບຸກ ໃຫ້ແກ່ ຄະນະຊາວໜຸ່ມຄະນະພົວພັນຕ່າງປະເທດສູນກາງພັກ (ຄຕພ) ແລະ ມອບຫລຽນກາລະນຶກ ວັນສ້າງຕັ້ງຄະນະຊາວໜຸ່ມປະຊາຊົນ ປະຕິວັດລາວ ຄົບຮອບ 65 ປີ ໃຫ້ແກ່ບຸກຄົນ ແລະ ກົມກອງ ຂອງ ຄຕພ ຈັດຂຶ້ນໃນວັນທີ 12 ມິຖຸນາ 2023, ຕາງໜ້າມອບໂດຍ ສະຫາຍ ມອນໄຊ ລາວມົວຊົ່ງ ກໍາມະການສຳຮອງສູນກາງພັກ, ເລຂາຄະນະພັກ, ເລຂາຄະນະບໍລິຫານງານ ສູນກາງຊາວໜຸ່ມ ປະຊາຊົນ ປະຕິວັດລາວ ໂດຍມີສະຫາຍ ທອງສະຫວັນ ພົມວິຫານ ກໍາມະການສູນກາງພັກ, ເລຂາຄະນະພັັກ, ຫົວໜ້າຄະນະພົວພັນຕ່າງປະເທດສູນກາງພັກ, ມີບັນດາສະຫາຍຄະນະພັກ-ຄະນະນຳ, ຄະນະຊາວໜຸ່ມອ້ອມຂ້າງສູນກາງພັກ, ຄະນະບໍລິຫານງານຊາວໜຸ່ມ ແລະ ສະມາຊິກຊາວໜຸ່ມ ພາຍໃນ ຄຕພ ແລະ ພາກສ່ວນກ່ຽວຂ້ອງ ຂອງສູນກາງຊາວໜຸ່ມ ປະຊາຊົນ ປະຕິວັດລາວ ເຂົ້າຮ່ວມ.
ໃນພິທີ, ສະຫາຍ ຄຳເຟື້ອງ ພັນທະໄຊ ເລຂາຄະນະບໍລິຫານງານຊາວໜຸ່ມ ຄຕພ ໄດ້ຜ່ານບົດສະຫລຸບລາຍງານການຈັດຕັ້ງປະຕິບັດຂໍ້ແຂ່ງຂັນ 4 ບຸກ ປະຈໍາປີ 2021, ເຊິ່ງໄດ້ຕີລາຄາຜົນສໍາເລັດການຈັດຕັ້ງປະຕິບັດ ຂໍ້ແຂ່ງຂັນ 4 ບຸກ ຕາມ 4 ເນື້ອໃນ 10 ມາດຖານ ຢ່າງພາວະວິໄສ, ພ້ອມທັງສັງເກດຕີລາຄາດ້ານດີ, ຈຸດຄົງຄ້າງ ແລະ ວາງທິດທາງໜ້າທີ່ຈຸດສຸມ ທີ່ ຄະນະຊາວໜຸ່ມ ຄະນະພົວພັນຕ່າງປະເທດສູນກາງພັກ ຕ້ອງໄດ້ສູ້ຊົນຈັດຕັ້ງປະຕິບັດໃຫ້ປະກົດຜົນເປັນຈິງ.
ໂອກາດດັ່ງກ່າວ, ສະຫາຍ ທອງສະຫວັນ ພົມວິຫານ ແລະ ສະຫາຍ ມອນໄຊ ລາວມົວຊົ່ງ ໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນສຳເລັດຂອງ ຄະນະຊາວໜຸ່ມ ຄະນະພົວພັນຕ່າງປະເທດສູນກາງພັກ ທີ່ຍາດມາໄດ້ໃນໄລຍະຜ່ານມາ ເຊິ່ງເປັນການສະແດງໃຫ້ເຫັນຜົນງານການເຄື່ອນໄຫວຮອບດ້ານ ຂອງຄະນະຊາວໜຸ່ມ ຄະນະພົວພັນຕ່າງປະເທດສູນກາງພັກ. ພ້ອມນັ້ນ, ຍັງໄດ້ໃຫ້ທິດຊີ້ນໍາ ແກ່ຄະນະຊາວໜຸ່ມ ຄະນະພົວພັນຕ່າງປະເທດສູນກາງພັກ ໃນການຈັດຕັ້ງປະຕິບັດວຽກງານຊາວໜຸ່ມ ຕິດພັນກັບວຽກງານວິຊາສະເພາະໃນຕໍ່ໜ້າ ໃຫ້ມີບາດກ້າວອັນໃໝ່, ມີປະສິດທິພາບ ແລະ ປະສິດທິຜົນ.
ພາບ: ເກດສະໜາ
