ຄະນະຮັບຜິດຊອບ ຄົ້ນຄວ້າປັບປຸງກົດໝາຍວ່າດ້ວຍ ການບັນຊີ ຂອງກະຊວງການເງິນ ຈັດກອງປະຊຸມທາບທາມ, ປະກອບຄຳຄິດຄໍາເຫັນຕໍ່ຮ່າງກົດໝາຍວ່າດ້ວຍການບັນຊີ (ສະບັບປັບປຸງ) ໃນວັນທີ 9 ມິຖຸນາ 2023 ທີ່ແຂວງຄໍາມ່ວນ ໂດຍການເປັນປະທານຂອງ ທ່ານ ສົມສະອາດ ຮອງເຈົ້າແຂວງຄໍາມ່ວນ ແລະ ທ່ານ ນາງ ດາວອນ ທອງຈັນ ຫົວໜ້າກົມຄຸ້ມຄອງການບັນຊີ ກະຊວງການເງິນ, ມີຮອງຫົວໜ້າພະແນກການເງິນແຂວງຄໍາມ່ວນ, ຄະນະຮັບຜິດຊອບຄົ້ນຄວ້າປັບປຸງກົດໝາຍ, ຄະນະວິຊາການຈາກບັນດາກົມອ້ອມຂ້າງກະຊວງການເງິນ, ກົມກົດໝາຍກະຊວງຍຸຕິທຳ, ກຳມາທິການກົດໝາຍ ແລະ ກຳມາທິການແຜນການ, ການເງິນ ແລະ ການກວດສອບຂອງສະພາແຫ່ງຊາດ, ທະນາຄານແຫ່ງ ສປປ ລາວ, ພະແນກການເງິນ 4 ແຂວງພາກກາງ (ແຂວງຄໍາມ່ວນ, ບໍລິຄໍາໄຊ, ໄຊສົມບູນ ແລະ ແຂວງວຽງຈັນ), ມີພາກສ່ວນກ່ຽວຂ້ອງ, ພ້ອມດ້ວຍຫົວໜ່ວຍທຸລະກິດອ້ອມຂ້າງແຂວງຄໍາມ່ວນ ເຂົ້າຮ່ວມ.
ການປັບປຸງກົດໝາຍວ່າ ດ້ວຍການບັນຊີ ຄັ້ງນີ້ ເປັນເທື່ອທີ 3 ນັບແຕ່ສະພາແຫ່ງຊາດໄດ້ຮັບຮອງເອົາໃນປີ 1990 ເປັນຕົ້ນມາ, ຊຶ່ງເທື່ອທີ 1 ໄດ້ປັບປຸງໃນປີ 2007 ແລະ ເທື່ອທີ 2 ໄດ້ປັບປຸງໃນປີ 2013. ຮ່າງກົດໝາຍວ່າດ້ວຍການບັນຊີ (ສະບັບປັບປຸງ) ໃນຄັ້ງນີ້ ປະກອບມີ X ພາກ, 12 ໝວດ ແລະ 93 ມາດຕາ (ທຽບກັບກົດໝາຍສະບັບປີ 2013 ມີ XI ພາກ, 12 ໝວດ ແລະ 101 ມາດຕາ) ໃນນີ້, ໄດ້ປັບປຸງມີ 47 ມາດຕາ, ສ້າງໃໝ່ 4 ມາດຕາ, ຕັດອອກ 8 ມາດຕາ ແລະ ຮັກສາໄວ້ຄືເກົ່າ 42 ມາດຕາ. ທັງນີ້, ກໍເພື່ອຍົກສູງປະສິດທິພາບໃນການຄຸ້ມຄອງວຽກງານບັນຊີ ສາ ມາດໃຫ້ຮອງຮັບການຫັນປ່ຽນໃໝ່ ການພັດທະນາເສດຖະກິດ-ສັງຄົມ ພາຍໃນປະເທດ, ສອດຄ່ອງກັບການຂະຫຍາຍຂອງເສດຖະກິດ ພາກພື້ນ ແລະ ສາກົນ ແຕ່ລະໄລຍະ; ຊຸກຍູ້ສົ່ງເສີມຫົວໜ່ວຍທຸລະກິດ ໃຫ້ຖືບັນຊີຖືກຕ້ອງຄົບຖ້ວນ ແລະ ຫັນເປັນທັນສະໄໝກ້າວສູ່ລະບົບດີຈິຕອນ; ປັບປຸງໃຫ້ສອດຄ່ອງກັບຫລັກການ ແລະ ກົດໝາຍອື່ນທີ່ກ່ຽວຂ້ອງ ທີ່ໄດ້ຮັບການຮັບຮອງ ແລະ ປະກາດໃຊ້ໃນປັະຈຸບັນ ຈຶ່ງເຫັນໄດ້ວ່າມີຄວາມຈໍາເປັນຕ້ອງໄດ້ປັບປຸງກົດໝາຍດັ່ງກ່າວ.
ໂອກາດນີ້, ທ່ານທານກອງປະຊຸມ ກໍໄດ້ມີຄໍາເຫັນເຈາະຈີ້ມ ເພື່ອເປັນແນວທາງໃຫ້ຜູ້ທີ່ເຂົ້າຮ່ວມກອງປະຊຸມ ໄດ້ປະກອບຄຳຄິດຄຳເຫັນຖືກຕ້ອງຕາມເປົ້າໝາຍ ຂອງການຄົ້ນຄວ້າກົດໝາຍດັ່ງກ່າວ ແລະ ທັງຮຽກຮ້ອງໃຫ້ສຸມສະຕິປັນຍາເຂົ້າໃສ່ການຄົ້ນຄວ້າ ປະກອບຄໍາເຫັນຢ່າງກົງໄປກົງມາ ເພື່ອເຮັດໃຫ້ຮ່າງກົດໝາຍສະບັບດັ່ງກ່າວ ມີເນື້ອໃນຄົບຖ້ວນ, ສົມບູນ ແລະ ສາມາດຈັດຕັ້ງປະຕິບັດໄດ້ຕົວຈິງ.
ຂ່າວ-ພາບ: ກະຊວງການເງິນ
