ເມືອງຜົ້ງສາລີ ແມ່ນເມືອງໜຶ່ງຂອງແຂວງຜົ້ງສາລີ ຕັ້ງຢູ່ເໜືອສຸດຂອງປະເທດລາວ ມີຊາຍແດນຕິດກັບປະເທດຈີນ ແລະ ສສ ຫວຽດນາມ, ມີທໍາມະຊາດ ພູຜາ, ປ່າໄມ້ທີ່ສວຍສົດງົດງາມ ແລະ ມີອາກາດທີ່ປອດໂປ່ງ, ການເດີນທາງໄປເມືອງດັ່ງກ່າວໃນປັດຈຸບັນມີຄວາມສະດວກສະບາຍ ຊຶ່ງມີຫຼາຍທາງເລືອກ ຄື: ສາມາດເດີນທາງດ້ວຍລົດເມປະຈໍາທາງ ຈາກນະຄອນຫຼວງວຽງຈັນ ໄປເຖິງເມືອງຜົ້ງສາລີ ໃຊ້ເວລາ 2 ມື້ກັບໜຶ່ງຄືນ ແລະ ອີກທາງເລືອກໜຶ່ງເດີນທາງດ້ວຍລົດໄຟລາວ-ຈີນ ໄປລົງສະຖານີເມືອງໄຊ ແຂວງອຸດົມໄຊ, ຈາກນັ້ນ ນັ່ງລົດຈາກອຸດົມໄຊ ໄປຍັງເມືອງຜົ້ງສາລີ ໃຊ້ເວລາພຽງ 1 ມື້, ຕະຫຼອດໄລ ຍະຂອງເສັ້ນທາງ ນອກຈາກໄດ້ສໍາຜັດກັບທໍາມະຊາດພູຜາ, ປ່າໄມ້ທີ່ມີລຽບຕາມແຄມສອງຟາກທາງແລ້ວ ຍັງໄດ້ເຫັນວິຖີການດໍາລົງຊີວິດຂອງປະຊາຊົນຢູ່ຕາມບ້ານຕ່າງໆຕື່ມອີກ.
ໃນໂອກາດທີ່ທີມງານສື່ມວນຊົນ ປະກອບມີສື່ເອເລັກໂຕຣນິກ ແລະ ສື່ສິ່ງພິມຈາກຫຼາຍພາກສ່ວນໄດ້ເດີນຮ່ວມກັບອົງການອາຫານໂລກ ປະຈໍາລາວ ເຄື່ອນໄຫວເກັບກໍາຜົນການຈັດຕັ້ງປະຕິບັດໂຄງການຕ່າງໆຢູ່ພາກສະໜາມ ຢູ່ເມືອງ ແລະ ແຂວງຜົ້ງສາລີ, ທີມງານ, ໄດ້ເລືອກການເດີນທາງດ້ວຍລົດໄຟລາວ-ຈີນ ປະສົມປະສານກັບການເດີນທາງດ້ວຍລົດ, ເນື່ອງຈາກມີເວລາຈໍາກັດ, ການເດີນທາງໄດ້ເລີ່ມອອກຈາກສະຖານີລົດໄຟນະຄອນຫຼວງວຽງຈັນ ເວລາ 7:30 ໂມງ, ໄປຮອດສະຖານີລົດໄຟເມືອງໄຊ ແຂວງອຸດົມໄຊ ເວລາ 10:30 ໂມງ, ຈາກນັ້ນ ໄດ້ພາກັນພັກກິນເຂົ້າທ່ຽງທີ່ເມືອງໄຊ ແລ້ວຈຶ່ງອອກເດີນທາງດ້ວຍລົດທີ່ທາງໂຄງການກະກຽມໄວ້ ໃນນີ້ ຕະຫຼອດໄລຍະໃນການເດີນທາງໄດ້ຊົມທີວທັດທໍາມະຊາດຕາມຮ່ອມພູທັງສອງຟາກທາງທີ່ມີຕົ້ນໄມ້ປົກຫຸ້ມສີຂຽວງົດງາມ, ເຫັນບາງໜ່ວຍພູ, ປະຊາຊົນໄດ້ທໍາການຜະລິດປູກເຂົ້າ, ສາລີ ແລະ ພືດອື່ນໆ ຍ້ອນເຂດບໍລິເວນດັ່ງກ່າວປະມານ 90% ເປັນພູສູງ ສະນັ້ນ ເສັ້ນທາງເດີນຈຶ່ງຄົດ,ໂຄ້ງ, ຂຶ້ນພູ, ລົງພູ ແຕ່ທີມງານກໍບໍ່ຮູ້ອິດເມື່ອຍ ຍ້ອນມີຄວາມຕື່ນເຕັ້ນກັບທໍາມະຊາດທີ່ສວຍງາມ ແລະ ອາກາດປອດໂປ່ງ. ສິ່ງທີ່ປະທັບໃຈທີ່ສຸດ ໃນການເດີນທາງຄັ້ງນີ້ ແມ່ນໄດ້ເຫັນຕົ້ນໄມ້ທີ່ເກີດຕາມທໍາມະຊາດ ຢັ່ງຢາຍສະຫຼັບສັບຊ້ອນຕາມຮ່ອມຫ້ວຍ, ພູເຂົາ ຊຶ່ງເປັນທັດສະນີຍະພາບທີ່ແສນປະທັບໃຈຂອງຜູ້ພົບເຫັນ, ຍ້ອນວ່າ ປ່າໄມ້ແຂວງຜົ້ງສາລີຍັງເປັນປ່າໄມ້ໃຫຍ່ດົງດິບຫຼາຍ, ອາກາດເຢັນສົດຊື່ນທີ່ສຸດ, ຕອນເຊົ້າ ຍັງມີໝອກໜາປົກຄຸມພື້ນທີ່ຢັ່ງຢາຍໄປທົ່ວບໍລິເວນ ທັ້ງໆທີ່ວ່າ ການເດີນທາງ ແມ່ນໄລຍະເດືອນພຶດສະພາ. ສະນັ້ນ ຈຶ່ງສາມາດເວົ້າໄດ້ວ່າ: ບໍ່ເຄີຍເຫັນທໍາມະຊາດໃນແຂວງໃດຈະສວຍສົດງົດງາມ ເທົ່າກັບ ທໍາມະຊາດໃນແຂວງຜົ້ງສາລີ, ສົມກັບບົດເພງ ທີ່ມີຊື່ວ່າ: “ຜົ້ງສາລີແດນງາມ”
ພາຍຫຼັງການເດີນທາງທີ່ຍາວໄກ, ໃນທີ່ສຸດທີມງານກໍເດີນທາງໄປເຖິງຈຸດໝາຍໃນເວລາ 17:00 ໂມງຂອງວັນດຽວກັນ ພໍໄປຮອດເມືອງຜົ້ງສາລີໄດ້ເຂົ້າພັກເຊົາທີ່ໂຮງແຮມ ເຢັນສະບາຍ (Yensabai) ພ້ອມນັ້ນຍັງສາມາດເບິ່ງເຫັນຈຸດເດັ່ນຂອງເມືອງ ຄື: ໜອງຂຽວ, ການປຸກສ້າງທີ່ຢູ່ອາໄສຂອງປະຊາຊົນ ຕາມເຈີ້ຍຕີນພູ ເຖິງຈອມພູ; ຕອນເຊົ້າ ເຫັນປະຊາຊົນໄປໄຮ່, ໄປສວນ, ເຫັນບັນດາຜູ້ເຖົ້າຈໍານວນຫຼາຍໆທີ່ຢູ່ເຝົ້າເຮືອນ, ນັ້ນສະແດງໃຫ້ເຫັນຢ່າງຈະແຈ້ງແລ້ວວ່າ: ສິ່ງແວດລ້ອມດີ ເປັນທີ່ໜ້າຢູ່ອາໄສ ຈຶ່ງພາໃຫ້ອາກາດຜົ້ງສາລີບໍລິສຸດ, ປະຊາຊົນມີອາຍຸທີ່ຍືນຍາວ, ຕອນຄໍ່າຄືນອາກາດຍິ່ງເຢັນສະບາຍ, ເວລານອນຫຼັບຈົນໄດ້ຫົ່ມຜ້າ, ສິ່ງທີ່ພິເສດໄປກວ່ານັ້ນ, ເມືອງຜົ້ງສາລີ ມີຄວາມສະຫງົບ, ລົດຈັກຈອດໄວ້ ໂດຍບໍ່ມີຜູ້ເຝົ້າ ກໍບໍ່ໄດ້ເສຍຫາຍໄປ. ນອກນີ້ ໂຮງແຮມ, ຍັງຢູ່ໃກ້ກັບຕະຫຼາດ ເຮັດໃຫ້ມີຄວາມສະດວກສະບາຍໃນການຊອກຫາອາຫານ.
