ຣັດເຊຍ ມີຊື່ຢ່າງເປັນທາງການວ່າ ສະຫະພັນຣັດເຊຍ (Russia Federation) ເປັນປະເທດໃນຢູເຣເຊຍເໜືອ ແລະ ເປັນປະເທດໃຫຍ່ທີ່ສຸດໃນໂລກ ມີເນື້ອທີ່ຫຼາຍກວ່າ 17.098.246 ກິໂລຕາແມັດ ຄວບຄຸມພື້ນທີ່ໆສາມາດຢູ່ອາໄສເຖິງ 1 ໃນ 8 ດ້ວຍປະຊາກອນສູງເຖິງ 146.117.108 ຄົນ ໂດຍອີງຕາມຂໍ້ມູນໃນວັນທີ 7 ມິຖຸນາ 2023. ຣັດເຊຍເປັນປະເທດທີ່ມີປະຊາກອນຫຼາຍທີ່ສຸດເປັນອັນດັບທີ 9 ຂອງໂລກ ແລະ ຫຼາຍທີ່ສຸດໃນເອີຣົບ, ມີຊາຍແດນດິນກັບ 16 ປະເທດ ຖືວ່າເປັນປະເທດທີ່ມີຊາຍແດນຕິດກັບຫຼາຍປະເທດທີ່ສຸດໃນໂລກ.
ຣັດເຊຍ ມີຫຼາກຫຼາຍສະຖານທີ່ທ່ອງທ່ຽວທີ່ສຳຄັນ ແລະ ມີສະຖານທີ່ທ່ອງທ່ຽວ ທີ່ເວລາໄປຮອດຣັດເຊຍແລ້ວບໍ່ຄວນພາດໄດ້ແກ່: ພະຣາຊະວັງເຄຣມລິນ (Kremlin Palace) ເປັນປ້ອມແຫ່ງນະຄອນຫຼວງມົສກູ ເປັນພະຣາຊະວັງທີ່ມີຄວາມສຳຄັນມາຕັ້ງແຕ່ບູຮານ ສ້າງຂຶ້ນເພື່ອເປັນສະຖານທີ່ອາໄສຂອງພະເຈົ້າຊາທຸກພະອົງ ຈົນອົງການໆສຶກສາ ວິທະຍາສາດ ແລະ ວັດທະນະທຳແຫ່ງສະຫະປະຊາຊາດ (UNESCO) ໄດ້ຈັດໃຫ້ ພະຣາຊະວັງເຄຣມລິນ ເປັນມໍລະດົກໂລກ. ດັ່ງນັ້ນ, ການເດີນທາງມາທ່ອງທ່ຽວຣັດເຊຍຖ້າບໍ່ໄດ້ມາຢ້ຽມຊົມ ພະຣາຊະວັງເຄຣມລິນ ຖືວ່າມາບໍ່ຮອດຣັດເຊຍ. ປັດຈຸບັນ, ພະຣາຊະວັງເຄຣມລິນ ຖືໄດ້ວ່າເປັນພິພິທະພັນທີ່ໃຫຍ່ທີ່ສຸດໃນໂລກແຫ່ງໜຶ່ງ ເປັນໜຶ່ງໃນສາມພິພິທະພັນທີ່ເກັບຮວບຮວມຊັບສົມບັດຂອງພະເຈົ້າແຜ່ນດິນທີ່ສົມບູນແບບ ທັງຮູບພາບທາງສາສະໜາ ແລະ ສົມບັດຂອງພະເຈົ້າຊາ ລ້ວນແຕ່ຖືກເກັບຢູ່ໃນຫ້ອງຕ່າງໆໃນພະຣາຊະວັງເຄຣມລິນ ຢ່າງຫຼວງຫຼາຍຈົນບໍ່ສາມາດປະເມີນຄ່າໄດ້.
ຈະຕຸລັດແດງ ຣັດເຊຍ (Red Square) ສູນລວມສະຖາປັດຕະຍະກຳຂອງຣັດເຊຍ ຊຶ່ງ ຈະຕຸລັດແດງ ຖືວ່າເປັນເດີ່ນກິດຈະກໍາທີ່ມີຜູ້ຄົນມາທ່ຽວຫຼາຍທີ່ສຸດຂອງນະຄອນຫຼວງມົສກູ ຊຶ່ງຜູ້ຄົນທີ່ເດີນທາງໄປທ່ຽວຣັດເຊຍຈະຕ້ອງແວ່ຊົມສະຖານທີ່ທ່ອງທ່ຽວແຫ່ງນີ້ທຸກຄົນ ໂດຍການມາທ່ຽວແຫ່ງນີ້ບ່ອນດຽວກໍຈະໄດ້ຊົມຄວາມງົດງາມຂອງສະຖາປັດຕະຍະກຳທີ່ຫຼາກຫຼາຍຂອງຣັດເຊຍບໍ່ວ່າຈະເປັນພະຣາຊະວັງ ຫຼື ໂບດວິຫານຕ່າງໆ ຄຳວ່າ ຈະຕຸລັດແດງ ນັ້ນມີທີ່ມາຈາກສະຖາປັດຕະຍະກໍາໂດຍອ້ອມຮອບເປັນສີແດງ ແລະ ສີແດງເປັນສີທີ່ຄົນຣັດເຊຍໝາຍເຖິງສິ່ງທີ່ສວຍງາມ, ສີແຫ່ງຄວາມໂຊກລາບ, ຄວາມໝັ້ນຄົງ, ຄວາມຮັ່ງມີ ແລະ ໄຊຊະນະ ມີລັກສະນະເປັນເດີ່ນກວ້າງ ຊຶ່ງໃນສະໄໝກ່ອນເປັນເວທີຂອງເຫດການສຳຄັນໃນປະຫວັດສາດຂອງຣັດເຊຍ ບໍ່ວ່າຈະເປັນງານສະເຫຼີມສະຫຼອງທາງສາສະໜາ, ທາງການເມືອງ ແລະ ຍັງເຄີຍເປັນສະຖານທີ່ຮັບຟັງພະບໍຣົມຣາຊະໂອງການຈາກແທ່ນຫີນທີ່ຂອງຄຣິສຕະຈັກ ເປັນສະຖານທີ່ສູດມົນສາທາລະນະ ແລະ ເປັນສະຖານທີ່ປະຫານນັກໂທດອີກດ້ວຍ. ປັດຈຸບັນ, ໄດ້ກາຍເປັນສະຖານທີ່ທ່ອງທ່ຽວຂອງຜູ້ຄົນຈາກທົ່ວທຸກມູມໂລກ ແລະ ຍັງໃຊ້ໃນການສະເຫຼີມສະຫຼອງເນື່ອງໃນໂອກາດຕ່າງໆບໍ່ວ່າຈະເປັນ ວັນຂຶ້ນປີໃໝ່, ວັນຊາດ, ວັນແຮງງານ ແລະ ວັນລະນຶກສົງຄາມໂລກຄັ້ງທີ 2.
ພະຣາຊະວັງປີເຕີຮອບ (Peterhof) ຕັ້ງຢູ່ເມືອງເຊນປີເຕີສະເບີກ (Saint Petersburg) ເປັນພະຣາຊະວັງລະດູຮ້ອນຕັ້ງຢູ່ໃນເຂດຊານເມືອງ ເປັນພະຣາຊະວັງທີ່ສວຍງາມ ເຈົ້າຊີວິດປີເຕີຮອບ ສ້າງຂຶ້ນຢ່າງພິຖີພິຖັນ ພາຍໃນພະຣາຊະວັງອອກແບບໃນຮູບແບບປະສົມປະສານ ເນັ້ນການຕົບແຕ່ງພາຍໃນທີ່ປານີດໃຊ້ໂຄມໄຟ, ໄມ້ແກະສະຫຼັກ ແລະ ຮູບແຕ້ມສີນ້ຳມັນເປັນຫຼັກ ທາງດ້ານນອກເປັນເດີ່ນນ້ຳພຸ ຍິ່ງໃຫຍ່ສຸດສາຍຕາ ແລະ ແສງຂອງຕາເວັນກະທົບໃສ່ຜິວນ້ຳ ແລະ ຂອບອ່າງສີຄຳ ມີນ້ຳພຸເຖິງ 27 ຂັ້ນ ຕົກແຕ່ງດ້ວຍຮູບປັ້ນ 155 ອັນ ຊຶ່ງຖືວ່າເປັນຈຸດຫຼັກຂອງພະຣາຊະວັງແຫ່ງນີ້ທີ່ດຶງດູດນັກທ່ອງທ່ຽວໃຫ້ມາຢ້ຽມຊົມ.
ມະຫາວິຫານເຊນໄອແຊດ (Saint Isaac’s Cathedral) ໂດດເດັ່ນດ້ວຍໂຄມໄຟສີຄຳ ເປັນເອກະລັກ. ມະຫາວິຫານເຊນໄອແຊດ ເປັນພຽງໂບດໄມ້ທຳມະດາ ຊຶ່ງຕໍ່ມາໄດ້ຮັບການປັບປຸງເປັນໂບດຫີນ ແລະ ຖືກສ້າງໃໝ່ຢ່າງງົດງາມໃນສະໄໝພະເຈົ້າອະເລັກຊານເດີທີ 1 ທີ່ປາຖະໜາຈະໃຫ້ວິຫານແຫ່ງນີ້ເປັນວິຫານທີ່ມີຄວາມຍິ່ງໃຫຍ່ທີ່ສຸດຂອງໂລກ ພະອົງຈຶ່ງທຸ່ມເທທັງກຳລັງຄົນ ແລະ ກຳລັງຊັບຢ່າງມະຫາສານ ຊຶ່ງສະເພາະຍອດໂຄມໃຊ້ຄຳແຜ່ນປິດ ນໍ້າໜັກ 100 ກິໂລ ຊຶ່ຶງໃຊ້ເວລາກໍ່ສ້າງດົນເຖິງ 40 ປີ ປັດຈຸບັນ ມະຫາວິຫານເຊນໄອແຊດ ໄດ້ຮັບການຍົກໃຫ້ເປັນໜຶ່ງໃນໂບດທີ່ງົດງາມທີ່ສຸດໃນໂລກ.
ຮຽບຮຽງໂດຍ: ວິໄລພອນ ເພັດໄພບູນ
