ຂ່າວສານຊີອາໄອລາຍງານ ເມື່ອທ້າຍອາທິດຜ່ານມາ, ທະນາຄານໂລກ (WB) ໄດ້ປະກາດບົດລາຍງານ “ການຄາດຄະເນເສດຖະກິດໂລກ” ສະບັບຫຼ້າສຸດ ໂດຍຄາດວ່າເສດຖະກິດໂລກຈະເຕີບໂຕ 2,1% ໃນປີ 2023, ປັບຂຶ້ນ 0,4% ເມື່ອທຽບໃສ່ການຄາດຄະເນໃນເດືອນມັງກອນຜ່ານມາ ແຕ່ຍັງຕ່ຳກວ່າຈັງຫວະການເຕີບໂຕໃນປີ 2022 ຢູ່ໃນລະດັບ 3,1%; ສ່ວນເສດຖະກິດຈີນຄາດວ່າຈະເຕີບໂຕ 5,6% ໃນປີ 2023, ປັບຂຶ້ນ 1,3% ເມື່ອທຽບໃສ່ການຄາດຄະເນໃນເດືອນມັງກອນປີນີ້.
ບົດລາຍງານຍັງຊີ້ໃຫ້ເຫັນວ່າ: ພາຍໃຕ້ສະຖານະການໂລກໃນປັດຈຸບັນຍັງດຳເນີນຕໍ່ໄປ ແລະ ນະໂຍບາຍເງິນຕາຍັງສືບຕໍ່ຮັດກຸມເພື່ອສະກັດກັ້ນໄພເງິນເຟີ້, ຈັງຫວະການເຕີບໂຕຂອງເສດຖະກິດໂລກຈະຕ່ຳກວ່າປີ 2022 ຢ່າງຫຼວງຫຼາຍ ຊຶ່ງຄາດວ່າເສດຖະກິດໂລກຈະເຕີບໂຕ 2,4% ໃນປີ 2024, ປັບລົງ 0,3% ເມື່ອທຽບໃສ່ການຄາດຄະເນໃນເດືອນມັງກອນຜ່ານມາ, ສ່ວນຈັງຫວະການເຕີບໂຕຂອງກຸ່ມເສດຖະກິດຕົ້ນຕໍກໍໄດ້ຖືກປັບລົງຢ່າງຫຼວງຫຼາຍ.
