ຂ່າວຕ່າງປະເທດລາຍງານ ເມື່ອຕົ້ນອາທິດຜານມາ, ໄຮໂປ (Hypo) ຊຶ່ງເປັນສະຖາບັນສິນເຊື່ອຂອງແຟັງລັງໄດ້ເປີດເຜີຍບົດລາຍງານດ້ານຕະຫຼາດບ່ອນຢູ່ອາໄສ ໂດຍຄາດວ່າລາຄາບ່ອນຢູ່ອາໄສໃນແຟັງລັງຈະຫຼຸດລົງຫຼາຍທີ່ສຸດໃນປີນີ້ ນັບຕັ້ງແຕ່ປີ 1993 ເປັນຕົ້ນມາ.
ໄຮໂປ ລະບຸວ່າ ອັດຕາດອກເບ້ຍໃນລະດັບສູງ, ບັນດາຕຶກອາພາດເມັ້ນ (Apartment) ໃໝ່ຈຳນວນຫຼາຍ, ຄວາມຕ້ອງການບ່ອນຢູ່ອາໄສຫຼຸດລົງ ເນື່ອງຈາກການແປປ່ວນທາງດ້ານເສດຖະກິດມີສ່ວນສົ່ງເສີມທ່າອ່ຽງຂາລົງ ຊຶ່ງປະລິມານທຸລະກຳດ້ານອະສັງຫາລິມະຊັບໃນປີ 2023 ຈະຫຼຸດລົງ 1 ໃນ 3 ເມື່ອທຽບກັບປີ 2022 ຜ່ານມາ ແລະ ຫຼຸດລົງ 1 ໃນ 5 ເມື່ອທຽບກັບປີ 2019 ຊຶ່ງເປັນປີສຸດທ້າຍກ່ອນເກີດການແຜ່ລະບາດຂອງພະຍາດໂຄວິດ-19. ທ່ານ ຈູໂຮ ເຄສກິເນນ ນັກເສດຖະສາດຂອງ Hypo ກ່າວວ່າ: ອັດຕາເງິນເຟີ້ສູງ ແລະ ແຮງກົດດັນຈາກອັດຕາດອກເບ້ຍຈະກະທົບຕໍ່ການປັບຂຶ້ນລາຄາໃນປັດຈຸບັນຫຼາຍກວ່າທີ່ມີການຄາດຄະເນໄວ້ໃນໄລຍະເລີ່ມຕົ້ນຂອງປີນີ້.
ບົດລາຍງານຄາດວ່າ ລາຄາບ່ອນຢູ່ອາໄສທົ່ວປະເທດແຟັງລັງຈະຫຼຸດລົງສະເລ່ຍ 7% ຕະຫຼອດປີ 2023 ພ້ອມທັງຄາດຄະເນໄປໃນທ່າອ່ຽງທາງບວກວ່າ ລາຄາບ່ອນຢູ່ອາໄສຈະເລີ່ມປັບເພີ່ມຂຶ້ນແບບພໍດີໄປຈົນເຖິງທ້າຍປີນີ້ຂຶ້ນຢູ່ກັບການປ່ຽນແປງດ້ານຄວາມຕ້ອງການ. ທັງນີ້, ທ່ານ ເຄສກິເນນ ຊີ້ໃຫ້ເຫັນວ່າ ສະຖານະການດັ່ງກ່າວໜ້າຈະປ່ຽນໄປໃນປີ 2024 ເນື່ອງຈາກອາດຈະມີການກໍ່ສ້າງ Apartment ໃໝ່ ໜ້ອຍລົງ ອັດຕາດອກເບ້ຍມີສະຖຽນລະພາບຫຼາຍຂຶ້ນ ແລະ ຄວາມຕ້ອງການມີທ່າອ່ຽງຂະຫຍາຍຕົວ.
